ءبىر كۇنى  اۋا جۇتقانىمىز  ءۇشىن، دارەتحاناعا بارعانىمىز  ءۇشىن، قىسقاسى بيولوگيالىق قاجەتتىلىكتىڭ بارلىعىن وتەۋ  ءۇشىن  سالىق تولەمەسەك بولعانى.  سالىق تۇرلەرىنىڭ كوبەيۋى بارلىق تاريحي جاعدايدا حالىقتىڭ ءدۇمپۋ جاساۋىنا الىپ كەلگەن. تەڭگەنىڭ تاعدىرىنا الاڭداعان حالىقتىڭ ونسىز دا جۇيكەسى جۇقارعان. بالكىم، قازىرگى بولىپ جاتقان جاعدايلاردان ەل نازارىن اۋدارعىسى كەلدى  مە، قىسقاسى الەۋمەتتىك جەلى الەمىنە ارنايى تالقىلايتىن  تاقىرىپ تاۋىپ بەردى. قازاقستان مۇسىلماندارىنىڭ وداعى (قمو) مەن ورتالىق ازياداعى ادام قۇقىقتارى بويىنشا مۇسىلماندار كوميتەتى قازاقستانعا  سەكسۋالدى سالىق ەنگىزۋ ۇسىنىسىن جاسادى. بۇنداي يدەيا جيدەكتەر مەن ساڭىراۋقۇلاقتاردى جيناۋعا ۇكىمەتتىڭ سالىق ەنگىزۋىنەن كەيىن تۋىنداعان. ۇيىم باسشىسى مۇرات تەلىبەكوۆتىڭ ءوزىنىڭ  Facebook پاراقشاسىندا جاريالانعان قمو باسپا ءسوز حابارلاماسىندا وداق قىزمەتكەرلەرى جەتەكشى ەكونوميستەر جانە سەكسولوگتارمەن اقىلداسا وتىرىپ، ينتيمدىك سالاعا سالىق سالۋدىڭ جۇيەسىن ويلاستىرىپ قويعانى ايتىلادى. ارينە بۇل جاي عانا ۇسىنىس(اۋىزەكى تىلمەن ايتساق، ساندىراق). الايدا بۇل ۇسىنىس ءقازىر الەۋمەتتىك جەلىلەردە قارقىندى تالقىلانىپ جاتىر. ۇسىنىستا  «زاڭدى نەكەگە تۇرعان ءاربىر قازاقستاندىق 1 جىنىستىق قاتىناس ءۇشىن 584 تەڭگە تولەۋگە مىندەتتى. ەگەر جىنىستىق قاتىناس ازاماتتىق نەكەدەگىلەردىڭ اراسىندا بولسا، سالىق 748 تەڭگەنى قۇرايتىن بولادى. نەكەسىز جىنىستىق قاتىناس – 1893 تەڭگە. گەيلەر مەن لەسبيلەردىڭ جىنىستىق قاتىناسى – 2741 تەڭگە. ءداستۇرلى ەمەس جىنىستىق قاتىناس – 4892 تەڭگە»، – دەپ قمو وكىلدەرى الدىن الا سالىق مولشەرلەمەلەرىن انىقتاپ قويعان ەكەن.

 1 جىنىستىق قاتىناستىڭ ۇزاقتىعى 14 مينۋتتان اسپاۋ كەرەكتىگى جازىلعان. اسقان جاعدايدا قوسىمشا سالىقتار تولەيتىن بولادى. ال شەتەلدىكتەر ءۇشىن سالىق قۇنى ەكى ەسەلەنەدى. سونىمەن قاتار، «ءار قازاقستاندىق اي سايىنعى ابونەمەنت نەمەسە 1 جىلدىق اقىلى بيلەت ساتىپ الا الادى. بۇل ولاردىڭ قاراجاتىن ۇنەمدەۋىنە سەپتىك بولادى. زاڭدى بۇزعان جاعدايدا كىنالىلەر 500 اەك كولەمىندە ايىپپۇل تولەۋگە مىندەتتەلەدى. نەمەسە قوعامدىق جۇمىستارعا جەگىلەدى»، – دەيدى قمو.

وزدەرىنىڭ قيالعا تولى ۇسىنىستارىندا ولار ادام ومىرىندەگى مۇنداي ماڭىزدى سالانى قاراۋسىز قالدىرۋعا بولمايتىدىعىن باستى نازارعا الىپتى. كۇلكىلى ءھام ۇيالۋعا تۋرا كەلەتىن ۇسىنىس. اتىڭ شىقپاسا جەر ورتە. ءبىراق ءقازىر جەر ورتەۋدىڭ قاجەتى جوق،  ينتەرنەتتى دۋ ەتكىزە سالاتىن «جاڭعىش» اقپارات ويلاپ تاپساڭ بولعانى. انىعىندا بۇل ۇسىنىس ادامزاتتىق ءھام ازاماتتىق نورمالارعا قايشى كەلەدى. سوندىقتان دا بولار بۇل ۇسىنىس تەك قانا كەكەسىن كۇلكى شاقىرىپ، قىزۋ تالقىعا تۇسۋدە. ۇسىنىس ۇكىمەتتىڭ جابايى جيدەكتەر مەن ساڭىراقۇلاقتاردى تەرۋگە بايلانىستى سالىق ەنگىزۋىنە قارسىلىق ءبىلدىرۋ ماقساتىندا شىققان. قوعام تاراپىنان استارعا تولى اششى ۇسىنىس جاسالعانىن ۇكىمەت تۇسىنە قويار ما ەكەن؟

اينۇر تولەۋ