ق ر پرەمەر-مينيسترى ورىنباسارى داريعا نازاربايەۆا تاتارستان رەسپۋبليكاسى پرەزيدەنتى رۋستام ميننيحانوۆتى سالتاناتتى ۇلىقتاۋ راسىمىنە قاتىسۋ ءۇشىن  قازان قالاسىنا بارعان ساپارىندا قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان نازاربايەۆ اتىنداعى كوشەنى ارالادى. بۇل تۋرالى «قامشى» پورتالى تاتارستان رەسپۋبليكاسى باسپا ءسوز قىزمەتىنە سىلتەمە جاساي وتىرىپ حابارلايدى.

تاتارستان رەسپۋبليكاسىنداعى قازاق ۇلتتىق-مادەني اۆتونومياسى بەلسەندىلەرىنىڭ باستاماسى بويىنشا قازان قالاسىنداعى ءىرى كوشەلەردىڭ بىرىنە قازاقستاننىڭ تۇڭعىش پرەزيدەنتىنىڭ ەسىمى بەرىلگەن بولاتىن.

«قازاقستان پرەزيدەنتىنىڭ ەسىمىمەن اتالاتىن كوشە شىنىمەن دە ۇلكەن. قالانىڭ ورتالىعىندا ورنالاسقان جانە  10 قاتار ارقىلى اۆتوكولىكتەر قوزعالىس جاساي الادى. بۇل كوشەنىڭ بويىندا حالىقتار دوستىعى ءۇيى،  قازان قالالىق بوتانيكالىق باقشا، تاتارستان رەسپۋبليكالىق فيلارمونياسى، قازان قالالىق ەنەرگەتيكا كوللەدجى ت.ب. ورنالاسقان»،- دەيدى تاتارستانداعى قازاقتار قاۋىمداستىعىنىڭ وكىلى ساعيت جاقسىبايەۆ.

تاتارستانداعى ەتنيكالىق قازاقتار مۇنىمەن شەكتەلمەك ەمەس. قازاق مادەنيەتىنە ەڭبەگى سىڭگەن قايراتكەرلەردىڭ ەسكەرتكىشتەرىن قويۋ جوسپارلانىپ وتىر ەكەن.

ال، تاتارستان پرەزيدەنتى رۋستام ميننيحانوۆتى ۇلىقتاۋ راسىمىنە قازاقستان پرەزيدەنتىنىڭ قۇتتىقتاۋ حاتىن الا كەلگەن پرەمەر-مينيسترىدىڭ ورىنابسارى داريعا نازاربايەۆ اكەسىنىڭ اتىمەن اتالاتىن كوشەنى ارالاپ، ونداعى قازاق مادەني ورتالىعىمەن تانىسقان.

ال، پرەزيدەنتتى ۇلىقتاۋ راسىمىنەن كەيىن داريعا نۇرسۇلتان قىزى تاتارستان پرەزيدەنتىمەن ەكى جاقتى كەلىسسوزدەر جۇرگىزگەن. كەلىسسوزدەر بارىسىندا ەكى ەل اراسىنداعى ساۋدا-ەكونوميكالىق قاتىناستار جايى ءسوز بولعان. داريعا نۇرسۇلتان قىزى  قارقىندى دامىپ كەلە جاتقان تاتارستان رەسپۋبليكاسىنىڭ قازىرگى الەۋەتىن ايتا كەلە، قازاقستان وسىنداي مەملەكەتپەن قارىم-قاتىناستى جاقسارتۋدى كوزدەيتىنىن جەتكىزگەن.

رۋستام ميننيحانوۆ ءوز كەزەگىندە تاتارستان رەسپۋبليكاسى رف قۇرامىنداعى ەڭ ءىرى ەكونوميكالىق ورتالىقتاردىڭ ءبىرى ەكەنىن اتاپ وتكەن. «بۇگىندە قازاقستان مەن تاتارستان اراسىنداعى ساۋدا اينالىمى 1 ميلليارد دوللاردى قۇراپ وتىر. وسى قارقىنىمىزدان تايمايتىن بولساق، بۇدان دا جاقسى ناتيجەلەرگە قول جەتكىزەمىز دەپ سەنەمىن»،-دەدى تاتارستان پرەزيدەنتى. ءسوز سوڭىندا رۋستام ميننيحانوۆ قازاقستان پرەزيدەنتى نۇرسۇلتان نازاربايەۆتى ءوز ەلىنە قوناق بولىپ قايتۋعا شاقىرعان.

نۇرزات توعجان