باتىس قازاقستان وبلىسىنىڭ بەرەزوۆكا اۋىلىندا بۇگىن تاعى ءبىر وقۋشى - ليۋبوۆ ۆوسكوبوي ساباق كەزىندە ەسىنەن تانىپ قالدى. بۇل تۋرالى «قامشى» پورتالى ازاتتىققا سىلتەمە جاساي وتىرىپ حابارلايدى.

ازاتتىق سايتىنىڭ اقپاراتتارىنا سۇيەنسەك، مەكتەپ ديرەكتورى وقۋشىنىڭ تالعانىن ۆيدەوعا تۇسىرۋگە كەدەرگى كەلتىرگەن. اتا-انالار مەن جەرگىلىكتى دارىگەرلەردىڭ سوزىنشە، سوڭعى ەكى اپتادا وقۋشىلار اراسىندا ءوزىن ناشار سەزىنىپ، شاعىمدانعاندار سانى دا ارتقان.

سوڭعى كەزدەرى قازاقستاننىڭ اۋا كەڭىستىگىندە مەديسينا مەن ەكولوگتاردىڭ دارمەنسىزدىك تانىتقان «سەبەپسىز» سىرقاتتار جيىلەپ كەتكەنى جاسىرىن ەمەس. ءبىز بۇل تاقىرىپتى بىرىنشە مارتە قاۋزاپ وتىرعان جوقپىز دەسەك تە،  سالدارى تابىلماعان ءتۇرلى كەساپاتتار تىيىلار ەمەس. بۇعان اسا ءمان بەرىپ جۇرگەنمىز دە شامالى. ب ا ق ءبىراز ۋاقىت باجايلاعانىمەن ماسەلەنى تۇبىنە جەتكىزگەن ەشكىم جوق ەكەنى دە جاسىرىن ەمەس. بۇرىن-سوڭدى كوز-كورىپ، قۇلاق ەستىمەگەن ىندەتتەردى زەرتتەۋ ءۇشىن ارنايى شەتەلدەن ماماندار شاقىرعانىمىزبەن، تۇجىرىمداما كورسەتكەن سەبەپتەرگە سەنگىمىز جوق. باسقاسىن ايتپاعاندا، ءبىر عانا بەرەزوۆكا اۋىلىنىڭ بالالارى «تالمادان» كوز اشپاۋدا.

وتكەن جىلدىڭ قاراشاسىندا 30-دان استام بالا بىرىنەن سوڭ ءبىرى تالىپ قالعاندىعى تۋرالى جازعان بولاتىنبىز. ول كەزدە دارىگەرلەر «شارشاعاننىڭ اسەرى» دەگەن كۇلكىڭىزدى كەلتىرەتىن دياگنوز قويعان. سودان جالعاسقان ىندەت  ءساۋىردىڭ ورتا شەنىندە دە شىرعالاڭ سالعان-دى. ول كەزدە بالالارى ۋلانعان اتا-انالار «ۇيقى دەرتىنىڭ» بەلگىلەرى بايقالا باستاعانىن ايتىپ بازىنالاعان ەدى. بۇعان دا پىسقىرىپ قاراعان بىرەۋ تابىلمادى.

قاراشىعاناق كەن ورنىنان بەس شاقىرىم جەردە ورنالاسقان بەرەزوۆكا اۋىلىندا 2014 جىلدىڭ قاراشاسىندا بالالار جاپپاي ۋلانا باستاعان. اۋىل تۇرعىندارىنىڭ كوبى مۇنىڭ سەبەبىن قاراشىعاناق مۇناي-گاز كوندەنساتى كەنىشىنەن شىعاتىن زياندى قالدىقتاردان كورەدى ەكەن.  ويتكەنى، كەنىش اۋىلدان بەس شاقىرىم قاشىقتىقتا عانا ورنالاسقان. ال كونسورسيۋم باسشىلىعى "بارلىق قالدىقتار مەن گازدار ەكولوگيالىق تالاپتاردى ساقتاي وتىرىپ شىعارىلاتىنىن" ايتىپ اقتالعان.

ءساۋىر ايىنىڭ باسىندا قازاقستانعا كەلگەن بۇۇ-نىڭ ۋلى قالدىق زاتتار جونىندەگى ارنايى وكىلى باشكۋت تۋنچاك اقمولا وبلىسىنداعى كالاچي جانە باتىس قازاقستان وبلىسىنداعى بەرەزوۆكا اۋىلى تۇرعىندارىن كوشىرۋ قاجەت دەگەن. الايدا، بۇل شەشىم ايتىلعان كۇيىندە قالعانى وتىرىك ەمەس.

كۇنى كەشە عانا مەملەكەت باسشىسىمەن كەزدەسكەندە وبلىس اكىمى نۇرلان نوعايەۆ مىرزا ەلباسىنىڭ الدىندا ەكى العان بالاداي كەكەشتەنىپ تۇرعانى تۋرالى قازاقستاندىق ب ا ق جازعان بولاتىن. ءيا، اكىم باسىن كوتەرىپ تۇرۋعا قاۋقارى جەتپەدى. ويتكەنى، ەلباسىنىڭ ءوزى بەرەزوۆكا اۋىلىنىڭ تۇرعاندارىنىڭ جاعدايىن ءسوز ەتكەن-دى. وسىعان دەيىن بەرەزوۆكاعا قاتىستى وزىنە شاڭ جۋىتپاعان اكىم اقىرى بار شىنىن ايتتى. ايتپاسقا شاراسى قالمادى.

باتىس وڭىرلەرى اكىمدەرىن جيناعان ەلباسى نۇرلان نوعايەۆتىڭ باسىنان سيپاي قويماعانى راس.

مەملەكەت باسشىسى بەرەزوۆكا اۋىلىنىڭ تۇرعىندارىنىڭ نە سەبەپتى تۇتىننەن تالىپ قالعاندارىن سۇرادى.

«بەستاۋ دەگەن اۋداندارىڭنىڭ حالقى زارداپ شەككەنىن بارلىعى ەستىپ قالدى. نە ىستەپ جاتىرسىڭدار؟»،-دەدى پرەزيدەنت پارمەندىلەۋ ۇنمەن.

“كوميسسيانىڭ شەشىمى بويىنشا بۇل جەردە كوپتەگەن فاكتورلاردىڭ ءتۇيىسۋى بار. ءبىر شەشىمى مەكتەپتىڭ سىرتىندا كوتەلنىي بار. سودان شىققان ءتۇتىن ءانى جەردەگى ءوزىنىڭ «پ» وبرازنىي مەكتەپ مىنا ورتاسىندا ەسىك بار ەكەن. ءبىر ۆەرسياسى سول كوتەلنىيدان شىققان”، – دەدى بقو اكىمى نۇرلان نوعايەۆ.

وسى جولى سوزدەن جاڭىلعان نوعايەۆ مىرزا  جىل اياعىنا دەيىن تۇرعىنداردىڭ بارلىعى تولىقتاي كوشىرىلەدى دەپ ءتۇيىن جاسادى. ەندى كۇتۋ عانا قالدى. ەلباسى مەن اكىمنىڭ اراسىنداعى سۇحباتتىڭ ەرتەسى كۇنى-اق، بەرەزوۆكادا تاعى دا وقۋشىلار تالىپ قالدى. ەندى اكىم نە ىستەيدى؟ جىل اياعىن كۇتە مە، الدە جىلدام شارا قولدانا ما؟

نۇرگەلدى ءابدىعاني ۇلى