فرانسيا سەناتى ادام دەنساۋلىعىنا زيانى دالەلدەنگەندىكتەن 2017 جىلدان باستاپ جاساندى كۇنگە كۇيۋ كابينالارىنا تىيىم سالۋ تۋرالى شەشىم قابىلدادى. بۇل تۋرالى «قامشى» پورتالى BNews.kz  سايتىنا سىلتەمە جاساي وتىرىپ حابارلايدى.

 اتاپ ءوتۋ كەرەك، سەنات مۇنداي شەشىمدى ۇكىمەتتىڭ پىكىرىنە قاراماستان قابىلداپ وتىر. سەناتورلار مۇنداي قورىتىندىعا دەنساۋلىق ساقتاۋ جۇيەسىنە رەفورما ەنگىزەتىن جاڭا زاڭ جوباسى اياسىندا كەلدى.  «سوليارييلەردىڭ ءقاۋپى سول، ونى ءجيى پايدالانۋدان تەرىنىڭ قاتەرلى ىسىگى تۋىندايدى. مۇنى قاتەرلى ىسىكتى زەرتتەۋ حالىقارالىق اگەنتتىگى دالەلدەپ وتىر»، - دەپ ءمالىم ەتتى سەناتور جان-فرانسۋا لونجو. ونىڭ ايتۋىنشا، سوڭعى ون جىلدا تەرىنىڭ قاتەرلى ىسىگىنە شالدىققاندار سانى ەكى ەسەگە ارتقان. 
مامانداردىڭ ەسكەرتۋى مەن سەناتورلاردىڭ تىيىمىنا قاراماستان، زاڭ جوباسىنداعى جاڭا تىيىمعا پارلامەنتتىڭ تومەنگى پالاتاسى  ۇلتتىق ءماجىلىستىڭ كەلىسىم بەرەرى ەكىتالاي. 
«ۋلتراكۇلگىن ساۋلەلەردىڭ زيانى دالەلدەندى، سونداي-اق مەلانوما دەرتىنە شالدىققاندار سانىنىڭ جىل سايىن ارتىپ وتىرعانى ءبىزدى قاندايدا ءبىر ارەكەتتەرگە يتەرمەلەۋى ءتيىس. ءبىراق بۇل تىيىم سالۋ كەرەك دەگەندى بىلدىرمەيدى»، - دەدى فرانسيا دەنساۋلىق ساقتاۋ ءمينيسترى ماريسول تۋرەن.
ازىرگە دەپۋتاتتار جاسوسپىرىمدەردىڭ سولياريي پايدالانۋىنا جانە ونىڭ جارناماسىنا تىيىم سالۋ شەشىمىن قولداپ داۋىس بەردى. Bulletin épidémiologique hebdomadaire مامانداندىرىلعان باسىلىمى 2012 جىلى جاريالاعان مالىمەتتەرگە قۇلاق تۇرسەك، فرانسيادا ءسوليارييدى پايدالانۋدىڭ كەسىرىنەن تۋىنداعان مەلانوما كەسەلىنەن جىلىنا 76 ادام كوز جۇمادى ەكەن. 

«قامشى» پورتالى