قازاقستاندا تۇڭعىش رەت پەدوفيلدەردى ءومىر بويىنا باس بوستاندىعىنان ايىرۋ جازاسى تۋرالى زاڭ قابىلداندى. ەندىگى جەردە كامەلەت جاسقا تولماعان جانە مەكتەپ جاسىنداعى بۇلدىرشىندەرگە سەكسۋالدىق كۇش كورسەتەتىندەر ءومىر بويى تەمىر تورعا توعىتىلاتىن بولادى. بۇل تۋرالى «قامشى» پورتالى nur.kz سايتىنا سىلتەمە جاساي وتىرىپ حابارلايدى.

«بيىلعى جىلدىڭ 1-قاڭتارىنان باستاپ قولدانىسقا ەنگەن قازاقستان رەسپۋبليكاسىنىڭ قىلمىستىق كودەكسىنە پەدوفيلدەرگە ءومىر بويى باس بوستاندىعىنان ايىرۋ جازاسىن ەنگىزگەن. سونداي-اق، سوت ايىپتالۋشىعا 15 جىلدان 20 جىلعا دەيىن تۇرمەگە قاماۋ جازاسىن دا تاڭداي الادى»،-دەيدى  قازاقستاندىق ادۆوكات دج. وتەبەكوۆ.

ەستەرىڭىزدە بولسا، جاقىندا الەۋمەتتىك جەلىدە قىزۋ پىكىر-تالاس تۋدىرعان پەدوفيلدىڭ ۆيدەوسى تۋرالى قازاقستاندىق ب ا ق جازعان بولاتىن. الماتىداعى پودەزدەردىڭ بىرىندە كىشكەنتاي قىزعا ازعىندىق ارەكەتتەر جاساماق بولعان پەدوفيلگە سوت 15 جىلعا باس بوستاندىعىنان ايىرۋ جازاسىن كەسكەن بولاتىن.  وتەبەكوۆتىڭ ايتۋىنشا، قىلمىس اياعىنا دەيىن جەتكىزىلمەگەندىكتەن، ودان ارتىق جازا تاعايىندالۋعا مۇمكىندىك جوق ەكەندىگىن ايتادى. سونداي-اق، كىشكەنە قىزدى جىنىستىق قاتىناسقا ماجبۇرلەمەك بولعان ازعىن ءوزىنىڭ جازاسىنىڭ اياعىنا دەيىن تەمىر توردا وتىراتىنىن ايتقان.

سەبەبى پەدوفيلدەرگە شارتتى تۇردە مەرزىمىنەن بۇرىن بوساتۋ سياقتى جازانى الماستىرۋ شارالارى قاراستىرىلماعان.

«جاڭا كودەكس پەدوفيلدەر ءۇشىن بارلىق جەڭىلدىكتەرگە جولدى جاۋىپ تاستادى! ولار ءۇشىن كەلەسى جاعدايلار الىنىپ تاستالدى: شارتتى سوتتاۋ؛ شارتتى تۇردە مەرزىمىنەن بۇرىن بوساتۋ؛ كەز كەلگەن ەسكىرۋ مەرزىمى؛ زارداپ شەگۋشى تاراپپەن كەلىسىمگە كەلۋ؛ اۋىر جاعدايلارعا دۋشار بولعاندىقتان نەمەسە ءوز ىسىنە وكىنەتىنىن دالەلدەي العاندىقتان بوساتۋ؛ وتەلمەگەن جازا مەرزىمىن ايىپپۇلعا نەمەسە بوستاندىعىن شەكتەۋ جازاسىنا الماستىرۋ؛ جازاسىن بالالارى بارىن ەسكەرە وتىرىپ، كەيىنگە شەگەرۋ؛ امنيستيا (كەشىرىم بەرۋ)»– دەيدى ادۆوكات.

ايتپاقشى، وسىنىڭ الدىندا ق ر پارلامەنتىندە «پەدوفيلدەردى ءپىشتىرۋ كەرەك» دەگەن ۇسىنىس تا ايتىلعان بولاتىن. دەپۋتاتتاردىڭ بۇل ۇسىنىسىن ق ر باس پروكۋراتۋراسى دا قولداعان. پروكۋراتۋرا ۇسىنعان پەدوفيلدەردى ءپىشتىرۋدى ىسكە اسىرۋدى وزگە ەلدەردە بار ەكەنىن ەسكەرە وتىرىپ، ولاردى قوعامنان وقشاۋلانعاندار مەن پسيحيكالىق اۋىتقۋعا ۇشىراعاندار جاتقىزىلاتىن  ەمحاناعا قاماۋ كەرەك دەگەن ۇسىناستار دا ايتىلعان بولاتىن.

پارلامەنت قابىرعاسىندا تالقىلانعان «پەدوفيلدەردى اتەكتەۋ» زاڭى ەندىگى جەردە ءومىر بويىنا باس بوستاندىعىنان شەكتەۋمەن توقتالعان.

ادام دەگەن اتىن بىلعاپ، جاراتىلىسىن جانۋارمەن تەڭەستىرىپ جۇرگەن «پەدوفيلدەردىڭ» ازعىندىعىن تىيۋ ءۇشىن – بۇل دا بولسا ازدىق ەتەتىنى تۇسىنىكتى. قالاي بولعاندا دا بالا زورلاۋشىلاردى پىشتىرۋمەن شەكتەلۋ، نەمەسە ولاردىڭ موينىنا پالەن جىل جۇكتەپ، تەمىر تورعا توعىتۋ ارقىلى قاتارىن ازايتۋ، بالكىم، دۇرىس شىعار. ءبىراق، اقىل-ەسىنىڭ كەمدىگى بار ادام تەكتەس «ايۋاندارعا» جازانىڭ قاي ءتۇرى دە لايىق.

نۇرگەلدى ءابدىعاني ۇلى