تۇڭعىش پرەزيدەنت نۇرسۇلتان نازاربايەۆ قورعانىس ءمينيسترى نۇرلان ەرمەكبايەۆپەن تەلەفون ارقىلى سويلەستى. 

مينيستر نازاربايەۆقا ءوڭىر حالقىنىڭ قاۋىپسىزدىگىن قامتاماسىز ەتۋ جانە جامبىل وبلىسى بايزاق اۋدانىنداعى توتەنشە جاعدايدىڭ سالدارىن جويۋ بويىنشا قابىلدانىپ جاتقان شارالار تۋرالى اقپارات بەردى.

تۇڭعىش پرەزيدەنت وقيعا سالدارىنان قازا بولعانداردىڭ تۋىستارى مەن جاقىندارىنا كوڭىل ايتىپ، زارداپ شەككەندەردىڭ تەزىرەك ساۋىعىپ كەتۋىنە تىلەكتەستىك ءبىلدىردى.

كەشە جامبىل وبلىسى بايزاق اۋدانىنداعى اسكەري بولىمدە ساعات 19:00 شاماسىندا قويمالاردىڭ بىرىنەن ءورت شىعىپ، ونىڭ سوڭى جارىلىسقا ۇلاسقان. اپات بولعان جەرگە جاقىن قاينار، بازارباي، ءۇش-بۇلاق، جاڭاتۇرمىس اۋىلدارىنىڭ تۇرعىندارى ەۆاكۋاسيالانعان. تەمىر جول بايلانىسى ۋاقىتشا توقتاپ، تاراز قالاسىنا كىرۋ، شىعۋ شەكتەلگەن.

وسىدان 2 جىل بۇرىن ارىس قالاسىندا اسكەري قويمادا ءىرى جارىلىس بولىپ، 5 ادام قازا تاپقان. ول كەزدە 50 مىڭنان استام ادام تۇراتىن قالا تولىق ەۆاكۋاسيالانعان.

قورعانىس ءمينيسترى نۇرلان ەرمەكبايەۆ كەزىندە ارىستاعى جارىلىستى "تابيعي اپات" دەپ، مينيستر ورىنتاعىن تاستاپ كەتپەيتىنىن اشىق ايتقان. ال بۇل جولى وتستاۆكاعا ارىز جازاتىنىن، كەتۋگە دايىن ەكەنىن مالىمدەدى.