بيىل شىمكەنت قالاسى بويىنشا «باقىتتى وتباسى» باعدارلاماسىنا باستاپقى بولىنگەن ليميت كورسەتكىشى 373 بولعان ەدى. ازاماتتاردى تۇرعىن ۇيمەن قامتۋ ماسەلەسىن وڭتايلى شەشۋ ماقساتىندا اتالعان ليميت كولەمى قازىرگى تاڭدا 589-عا ۇلعايعان.

ونىڭ ىشىندە كوپبالالى وتباسىلار سانى – 255، مۇگەدەك بالا اسىراۋشى وتباسىلار – 285، تولىق ەمەس وتباسىلار – 49.

شىمكەنت قالاسىندا «نۇرلى جەر» مەملەكەتتىك باعدارلاماسى اياسىندا «باقىتتى وتباسى» باعىتى ارقىلى نەسيەلىك نەگىزدە جوعارىدا بولىنگەن 589 ليميتكە سايكەس، بۇگىندە 127 ازامات باسپانالى بولدى. «باقىتتى وتباسى» باعىتىنىڭ شارتتارى مەن تالاپتارىنا سايكەس ازاماتتار پاتەردى جاڭا جانە ەكىنشى نارىقتان وزدەرى ىزدەپ تاپقان. بۇدان بولەك، بۇگىندە اتالعان باعىت بويىنشا كونكۋرستان وتكەن 400-دەن اسا قاتىسۋشى وزدەرىنىڭ تولەم قابىلەتتىلىكتەرىنە سايكەس تۇرعىن ءۇي ىزدەۋ ۇستىندە.

«باقىتتى وتباسى» باعىتىنىڭ نەگىزگى قاتىسۋشىلارى – تۇرعىن ءۇي كەزەگىندەگى «التىن القا»، «كۇمىس القا» القالارىمەن ماراپاتتالعان نەمەسە بۇرىن «باتىر انا» اتاعىن العان، سونداي-اق ءى جانە ءىى دارەجەلى «انا داڭقى» وردەندەرىمەن ماراپاتتالعان كوپ بالالى انالار، تولىق ەمەس وتباسىلار، مۇگەدەك بالا تاربيەلەپ وتىرعان وتباسىلار.

ايتا كەتۋ كەرەك، باعدارلاما ەلىمىزدەگى از قامتىلعان وتباسىلاردىڭ جىلدىق 2 %-دىق مولشەرلەمەمەن تۇرعىن ءۇي الۋعا مۇمكىندىك بەرۋدە.

شىمكەنت قالاسى بويىنشا 2021 جىلعا بولىنگەن ءليميتتىڭ اياقتالۋىنا بايلانىستى ازاماتتار «باقىتتى وتباسى» باعدارلاماسىنا كەلەر جىلى «وتباسى بانك» ارقىلى قاتىسا الادى.