رەسەي قاۋىپسىزدىك كەڭەسىندە ەگەمەن ەلدەردىڭ ىشكى ىستەرىنە قول سۇقپاۋ تۋرالى قاعيدانى قۇپتايتىن دەكلاراسيا قابىلداۋعا نيەتتى ەكەنىن ءبىلدىردى. مۇنى رف سىرتقى ىستەر ءمينيسترى سەرگەي لاۆروۆ ۆەنەسۋەلالىق VTVCanal8 تەلەارناسىنا بەرگەن سۇحباتىندا مالىمدەدى. بۇل تۋرالى «قامشى» پورتالى gordonua.com-عا سىلتەمە بەرە وتىرىپ حابارلايدى.
رف سىرتقى ىستەر ءمينيسترى سەرگەي لاۆروۆ اقش-تىڭ سيرياداعى قيمىل-ارەكەتىن ورتاق كەلىسىمنىڭ قالىپتاسۋىنا پايداسى جوق «ءبىرجاقتى امال» عانا دەپ سانايدى.
«ءدال قازىرگى كەزەڭدە امەريكاندىقتار جەكە وزىندىك كواليسيانى قالىپتاستىرىپ وتىر، ولار ەشبىر قاۋىپسىزدىك كەڭەسىنە جۇگىنبەگەن. يراكتاعى تەرروريستەردى باعداد ۇكىمەتىنىڭ كەلىسىمىمەن بومبالايتىنىن جاريالادى. ءبىراق، سيريا ايماعىنداعى تەرروريستەرگە شابۋىل جاساۋ ءۇشىن ولارعا داماسك رۇقساتىنىڭ قاجەتى شامالى ەكەن. مەنىڭشە، بۇل ءبىرجاقتى امال-قارەكەت!» - دەپ مالىمدەدى لاۆروۆ مىرزا.
سونىمەن قاتار، مينيستر رەسەيدىڭ قاۋىپسىزدىك كەڭەسىندە مەملەكەتتەردىڭ ىشكى ىستەرىنە ارالاسپاۋ ماسەلەسىن كوتەرگىسى كەلەتىنىن ايتتى: «ايتقانداي، قازىرگى تاڭدا ۆەنەسۋەلالىق جانە قىتايلىق ارىپتەستەرىمىزبەن، جانە وزگە دە مەملەكەتتەر توبىمەن بىرگە ەگەمەن ەلدەردىڭ ىشكى ماسەلەلەرىنە قول سۇقپاۋ تاقىرىبىن تالقىلاعالى جاتىرمىز. بۇل، ءوز كەزەگىندە، بۇۇ-نىڭ نەگىزگى جارعىلارىنىڭ ءبىرى».
نيۋ-يوركتا وتكەن بۇۇ-نىڭ جالپى اسسامبلەياسىندا كوپتەگەن مەملەكەتتەر قاۋىپسىزدىك كەڭەسىنە رەفورما ەنگىزۋ كەرەكتىگى تۋرالى ۇسىنىسقا قولداۋ بىلدىرگەن بولاتىن. بۇۇ-داعى ۋكراينانىڭ تۇراقتى وكىلى يۋريي سەرگەيەۆتىڭ ءسوزىن ارقاۋ ەتسەك، قاۋىپسىزدىك كەڭەسىندە ۆەتو قۇقىعىن شەكتەۋ تۋرالى باستامانى 73 مەملەكەت قولداعان ەكەن.
5-قىركۇيەكتە پەتر پوروشەنكو رەسەي مەملەكەتىنىڭ قاۋىپسىزدىك كەڭەسى قۇرامىندا قالا بەرۋىنە بولادى، ءبىراق ءوزى قاتىسىپ وتىرعان قاقتىعىستار مەن داۋ-دامايلاردا ۆەتو قۇقىعىنان ايىرىلۋعا ءتيىس دەپ، مالىمدەمە جاساعان ەدى.
بۇگىندە ۆەتو قۇقىعىنا رەسەي، جۇڭگو، اقش، فرانسيا جانە ۇلىبريتانيا سىندى بۇۇ قاۋىپسىزدىك كەڭەسىنىڭ بەس تۇراقتى مۇشەسى يە بولىپ وتىر.
نازگۇل نازار
پىكىر قالدىرۋ