8 قازان، جۇما كۇنى وبلىس اكىمى وڭداسىن ورازالين اقتوبە قالاسىنىڭ ينفراقۇرىلىمدىق دامۋى مەن اباتتاندىرىلۋى بويىنشا ءبىرقاتار جوبالاردىڭ جۇزەگە اسىرىلۋىمەن تانىستى. جۇمىس ساپارى «كىشى ساڭكىباي» اتالاتىن ءاليا مولداعۇلوۆا داڭعىلىنان پوجارسكيي كوشەسىنە دەيىنگى جولداردىڭ جوندەۋ جۇمىستارىن قاراۋدان باستالدى.

“كازسترويماگنۋم” ج ش س مەردىگەر ۇيىمىنىڭ باسشىسى رۋسلان نىسانبايەۆ: «جوندەلىپ جاتقان اۋماقتىڭ ۇزىندىعى - 2450 مەتر. بۇگىن كەشكە ءبارىن اياقتاۋدى جوسپارلاپ وتىرمىز»،- دەپ باياندادى.

بۇل جوبانىڭ جۇزەگە اسىرىلۋى ساڭكىباي باتىر داڭعىلىنداعى جول قوزعالىسىن جەڭىلدەتەدى دەپ كۇتىلىپ وتىر.

بيىل اقتوبەدە سونداي-اق، اۋلالار مەن قوعامدىق كەڭىستىكتەردى اباتتاندىرۋ بويىنشا اۋقىمدى جۇمىستار جۇرگىزىلۋدە. جىل قورىتىندىسى بويىنشا وبلىس ورتالىعىندا بارلىعى 220 اۋلا جوندەلىپ، 67 بالالار وينايتىن الاڭ سالىنباق، سونىمەن قاتار، 9 ساياباق پەن گۇل باعى قالپىنا كەلتىرىلەدى.

جۇما كۇنى «الاقاي» وبلىستىق قۋىرشاق تەاترىنىڭ ماڭىندا ورنالاسقان «تۇرعىندار قالاشىعى» اۋدانىندا قالپىنا كەلتىرىلگەن گۇل باعىنىڭ اشىلۋى ءوتتى. مۇندا كوگالداندىرۋ جانە جارىقتاندىرۋ جۇمىستارى جۇرگىزىلىپ، جاياۋجولدار توسەلدى، بالالار وينايتىن الاڭ مەن ەرەسەكتەرگە ارنالعان جاتتىعۋ الاڭى ورناتىلدى.

«قالامىز كۇننەن كۇنگە جاقسارىپ كەلەدى، ەندىگى كەزەك ءبىزدىڭ «تۇرعىندار قالاشىعىنا» كەلدى. مەن وسى جەردە تۋدىم، بۇرىن ونى «اقتوبەنىڭ شۆەيسارياسى» دەيتىن. ۋاقىت وتە كەلە اۋدان قاراۋسىز قالدى، ءبىراق وبلىس پەن قالا باسشىلىعىنىڭ بەي-جاي قاراماي، نازارعا الۋىنىڭ ارقاسىندا ۇيلەرىمىز بەن وسى گۇل باعى وسىنداي تاماشا كۇيگە ەندى. اۋدان تۇرعىندارىنىڭ اتىنان العىسىمدى بىلدىرەمىن. وسى جەردە ەڭبەك ەتكەندەردىڭ بارىنە راحمەت ايتامىن. بالالارىمىز ادەپتى بولىپ ءوسسىن دەسەك وسىنىڭ ءبارىن ۇقىپتى ۇستايىق»، دەدى لاريسا سلادكوۆا.

«وسى جىلى ەلىمىزدىڭ تاۋەلسىزدىگىنە 30 جىل تولادى. تاۋەلسىزدىكتىڭ العاشقى جىلدارى وڭاي بولعان جوق، قيىندىقتار كوپ بولدى. شەكارالار ايقىندالىپ، ەكونوميكالىق بايلانىستار نارىق ەكونوميكاسىنىڭ قىسپاعىنا شىداماي، ءۇزىلىپ جاتتى، وندىرىستەر جابىلىپ جاتتى، كولحوزدار مەن سوۆحوزدار جابىلدى، جۇمىسسىزدىق پايدا بولدى، بيۋدجەت كىرىسى ازايدى. 90-شى جىلدارى زەينەتاقىنى، دارىگەرلەر مەن مۇعالىمدەرگە ەڭبەكاقىنى بەرە الماي قالعان كەزدەر بولدى. وسىنىڭ بارلىعى ەستەرىڭىزدە. ەلباسىنىڭ دانا ءارى كورەگەن ساياساتىنىڭ، حالقىمىزدىڭ شىداملىعىنىڭ، بىرلىگى مەن ەڭبەكقورلىعىنىڭ ارقاسىندا ءبىز بۇل سىناقتان دا وتە الدىق. بۇگىن، نىعايعان ەكونوميكانىڭ ارقاسىندا بىزدە كوپتەگەن سۇراقتاردى شەشۋگە مۇمكىندىك بار. سونىڭ ىشىندە، حالىقتى مەكتەپتەرمەن جانە مەديسينالىق مەكەمەلەرمەن قامتۋ، قاراۋسىز قالعان كوپتەگەن عيماراتتاردى، سونىمەن قاتار، ساياباقتار مەن گۇل باقتارىن جوندەۋ بويىنشا ۇلكەن جۇمىستار جۇرگىزىلۋدە»،- دەدى اۋدان تۇرعىندارىمەن تىلدەسكەن وڭداسىن ورازالين.

وزىڭىزگە بەلگىلى، «تۇرعىندار قالاشىعىندا» بيىل اۋداندى قايتا جاڭارتۋ بويىنشا ۇلكەن جۇمىستار جۇرگىزىلگەن بولاتىن. وبلىس اكىمى «تۇرعىندار قالاشىعىنىڭ» كەيپىن وزگەرتۋ جۇمىستارى جالعاساتىنىنا سەندىردى. بۇدان وزگە، جارىن اۋلالاردى، قوعامدىق كەڭىستىكتەردى اباتتاندىرۋ، قالانىڭ «گمز»، «مالىشكا»، «اۋە قالاشىعى» سەكىلدى ەسكى بولىگىندەگى ۇيلەردىڭ قاسبەتىن جاڭارتۋ جوبالارى جۇزەگە اسىرىلادى.

جۇمىس ساپارى كەزىندە ءوڭىر باسشىسى كىرپىشتى اۋىلىنداعى كوشەلەردىڭ كولىك جۇرەتىن جولدارىنىڭ جوندەۋ جۇمىستارىمەن تانىستى. قازىرگى تاڭدا مۇندا جالپى ۇزىندىعى 2650 مەتر بولاتىن ءتورت كوشەنىڭ جولدارى جوندەلىپ جاتىر. بۇدان باسقا، كىرپىشتى اۋىلىنداعى 15-تەن استام كوشەنى جولدارىن جوندەۋگە جوبالىق-سمەتالىق قۇجاتتاما ازىرلەنىپ جاتىر.

سونىمەن قاتار، قىزىلجار-2 كەنتىندە جالپى ۇزىندىعى 1950 مەتر اۆتوجولداردى ورتاشا جوندەۋ جۇمىستارى، ال قىزىلجار - 3 كەنتىندە ۇزىندىعى 1314 مەتر جول قۇرىلىسى جالعاسۋدا.

جۇمىس بارىسىمەن تانىسىپ، مەردىگەر ۇيىمداردىڭ ەسەپتەرىن تىڭداعان وبلىس اكىمى قالا ورتالىعىنان شالعايداعى تۇرعىن ءۇي الاپتارى مەن قالا ماڭىنداعى اۋىلداردا قولايلى ورتا مەن ينجەنەرلىك ينفراقۇرىلىمدى دامىتۋ بويىنشا جۇمىستى جانداندىرۋدى تاپسىردى.

"جولداردى بارىنشا قامتاماسىز ەتۋ كەرەك. قوعامدىق كولىك جۇرەتىن نەگىزگى كوشەلەردەن، مەكتەپتەرگە، اۋرۋحانالارعا، باسقا دا الەۋمەتتىك نىساندارعا باراتىن جولداردان باستاپ، بىرتىندەپ باسقا كوشەلەرگە كوشىڭىزدەر"، - دەدى وڭداسىن ورازالين جاۋاپتى مەملەكەتتىك ورگانداردىڭ باسشىلارىنا.

بۇدان كەيىن ايماق باسشىسى ىلە سۋ قابىلداعىشىن كەڭەيتۋ جۇمىستارىنىڭ بارىسىمەن تانىستى. مۇندا وڭ جانە سول جاعالاۋلاردا قوسىمشا 14 ۇڭعىما بۇرعىلانادى.

جوبانى ىسكە اسىرۋ تامدى سۋ قابىلداعىشىنىڭ ەكىنشى كوتەرىلۋىنىڭ سورعى ستانسياسىنا سۋ بەرۋدى تاۋلىگىنە 50 مىڭ تەكشە مەترگە دەيىن ارتتىرۋعا مۇمكىندىك بەرەدى. ناتيجەسىندە پاراسات جانە دۋمان تۇرعىن ءۇي الاپتارى سۋمەن قامتاماسىز ەتىلەدى، سونداي-اق باتىس-1 جانە باتىس-2 شاعىن اۋداندارىنا سۋ بەرۋ جاقسارتىلادى. سۋ الۋدى كەڭەيتۋ جۇمىستارى 2021 جىلدىڭ جەلتوقسانىندا اياقتالادى.

"نۇر–اقتوبە" ىقشام اۋدانىنداعى قازاندىقتىڭ كەڭەيتۋ بارىسىمەن تانىسقان وبلىس اكىمى جىلۋ بەرۋ ماۋسىمىندا قالانى ۇزدىكسىز جىلۋمەن قامتاماسىز ەتۋگە قاتىستى ءبىرقاتار تاپسىرمالار بەردى.

"Aqtobe su-energy group" اق باس ديرەكتورى اسقار قىستاۋبايەۆ بۇگىنگى تاڭدا الەۋمەتتىك نىساندار 100% جانە اقتوبە قالاسىنداعى كوپپاتەرلى ۇيلەردىڭ 98% جىلۋ جۇيەسىنە قوسىلعانىن حابارلادى.

"جىلۋ ءالى قوسىلماعان ۇيلەر بار، ءبىراق بۇل پيك، كوندومينيۋمداردىڭ كىناسى. ءبىز ولارعا ماۋسىم ايىنان باستاپ سۋ سىناقتارىن جۇرگىزۋ، ەليەۆاتورلاردى تەكسەرۋ، قۇبىرلاردى جوندەۋ قاجەتتىلىگى تۋرالى ايتتىق. كوبىسى وتپەدى، ءبىراق ءبىز قايدا بارساق تا، جىلۋ بەردىك. ءبىز پوزيسياعا كىرەمىز. قالعان نىساندار بويىنشا جۇمىس جۇرگىزىپ جاتىرمىز"، - دەدى ا.قىستاۋبايەۆ.