2022 جىلعى 20 ماۋسىم مەن 19 شىلدە (قوسا العاندا) ارالىعىندا اكىمدىكتە ءۇي كەزەگىندە تۇرعاندار اراسىندا "باقىتتى وتباسى" باعدارلاماسىنا قاتىسۋعا وتىنىشتەر قابىلدانادى. بۇل تۋرالى وتباسى بانكىنىڭ باسپا ءسوز قىزمەتى حابارلادى.

وتىنىشتەر otbasybank.kz پلاتفورماسىندا قابىلدانادى. باعدارلاماعا تومەندەگىدەي ساناتتار بويىنشا اكىمدىك كەزەگىندە تۇرعان ازاماتتار قاتىسا الادى:
- كوپ بالالى وتباسى؛
- مۇمكىندىگى شەكتەۋلى بالا تاربيەلەپ وتىرعان وتباسى؛
- تولىق ەمەس وتباسى (نەكە بۇزىلعان ساتتەن باستاپ كەمىندە 3 جىل ءوتۋى ءتيىس).

باعدارلاما شارتتارىنا سايكەس، نەسيە مولشەرلەمەسى – جىلىنا 2 پايىزدى، العاشقى جارنا – نەسيە كولەمىنىڭ 10 پايىزىن، نەسيە مەرزىمى – 20 جىلعا دەيىنگى مەرزىمدى قۇرايدى

قاتىسۋشىعا جەرگىلىكتى اكىمدىكتەر ارقىلى سالىنعان نەسيەلىك تۇرعىن ءۇيدى نەمەسە العاشقى، ەكىنشى نارىقتاعى كەز كەلگەن باسقا تۇرعىن ءۇي ساتىپ الۋعا بولادى. نەسيەنىڭ ەڭ جوعارى سوماسى نۇر-سۇلتان، الماتى قالالارىندا جانە قالا جانىنداعى اۋدانداردا، شىمكەنت، اقتاۋ، اتىراۋدا 15 ميلليون تەڭگەگە، باسقا وڭىرلەردە 10 ميلليون تەڭگەگە دەيىن. جىلجىمايتىن مۇلىك قارىز الۋشى تۇرعىن ءۇي كەزەگىندە تۇرعان ايماقتان ساتىپ الىنۋى ءتيىس.