«الاتاۋدا» – «اقساق قۇلان» كۇيى

/image/2024/06/13/crop-38_173_857x1523_whatsapp-image-2024-06-13-at-15.25.43-2.jpeg

«اقساق قۇلان» اڭىزىنا قاراعاندا، جوشىنىڭ ءولىمى اقساق قۇلاننان بولعان ەكەن. قارالى حاباردى دا حان شىڭعىسقا كەتبۇعا جىراۋ ەستىرتكەن. وسى اڭىز بەن كۇي سارىنىن بالا كەزدەن ەستىپ وسپەگەن قازاق جوق شىعار.

12 ماۋسىمدا سول اڭىز «الاتاۋ» ءداستۇرلى ونەر تەاترى ساحناسىندا جاڭاشا باياندالدى. 

اۆتورى – ارداق بەركىمبايەۆ، قويۋشى سۋرەتشى – قۋات تۇستىكبايەۆ، پلاستيكا رەجيسسەرى – ادىلەت تامەنوۆ.

فوتو: ماقسات قۇسايىن

اڭىزعا نەگىزدەلگەن فەەريا جانرىنداعى جاڭاشا قويىلىمنىڭ رەجيسسەرى – ارۋحان تەمىربەك قىزى. پرەمەرا الدىندا وتكەن باسپا ءسوز ءماسليحاتىندا ب ا ق وكىلدەرىنە بەرگەن سۇحباتىندا جاس رەجيسسەر بۇل تۋىندىنى ءوزىنىڭ العاشقى جۇمىسى ەكەنىن ايتتى. حالىق اڭىزىن تاماشا پلاستيكا، سازدى اۋەن، ۆيزۋالدى اسەردىڭ كومەگىمەن كورەرمەنگە جەتكىزۋدى كوزدەگەن رەجيسسەر الدىنا قويعان ماقساتىنا جەتە الدى دەپ ويلايمىز. مۇندا اسىرەسە پلاسيتكالىق رەجيسسەر ادىلەت تامەنوۆتىڭ ەڭبەگى زور. حان بالاسىنىڭ اڭعا شىققانىن، دۇسىرلەتىپ قۇلان قۋعانىن، ساداقپەن اتىپ قۇلان بالاسىن ولتىرگەنىن، انا قۇلاننىڭ بالاسىنىڭ ولىمىنە قان جۇتا قايعىرعانىن، حان ۇلىنىڭ مەرت بولۋىن ءۇنسىز بايانداپ، ءسوزسىز اڭگىمەلەپ بەرگەن تەاتر ارتىستەرىنىڭ، بيشىلەرىنىڭ قابىلەتى تاڭ قالدىردى.

فوتو: ماقسات قۇسايىن

قويىلىمنىڭ شارىقتاۋ شەگى – حانعا ۇلىنىڭ ءولىمى جايلى حاباردى ەسىتتىرۋى. «بالام ءولى مە، ءتىرى مە؟» – دەپ نوكەرلەرىنە كەزەك-كەزەك قاراعان حاننىڭ الدىندا جاس كەتبۇعا تىزەرلەپ وتىرا قالادى دا، قارا دومبىرانى بەزىلدەتە جونەلەدى. «اقساق قۇلان» كۇيى. حان ۇلى ءولىمىنىڭ ريەۆكيەمى. قايعىلى كۇي كۇڭىرەنە ەستىلەدى. دومبىرا بەينەبىر ءتىرى جانداي: «ۇلىڭ ءولدى، مەرت بولدى» دەپ تۇرعانداي.

فوتو: ماقسات قۇسايىن

كۇمبىرلەگەن ءتۇرلى اسپاپ ءۇنى، قويىلىمعا ءار بەرگەن جاندى دىبىس – مۇندا «الاتاۋ» ەتنو-فولكلورلىق ءانسامبلىنىڭ شەبەرلىگىن دە اتاپ وتكەن ءجون.

فوتو: ماقسات قۇسايىن

سپەكتاكل 13 ماۋسىم كۇنى تاعى قويىلادى.

پىكىر قالدىرۋ

قاتىستى ماقالالار