بولگاريانىڭ كونستيتۋسيالىق سوتى بۇگىن رۋمەن راديەۆتىڭ مەملەكەت باسشىسى قىزمەتىنەن ءوز ەركىمەن كەتۋ تۋرالى ءوتىنىشىن قاراپ، ونى رەسمي تۇردە بەكىتتى. وسى شەشىم ارقىلى ونىڭ پرەزيدەنت رەتىندەگى وكىلەتتىگى مەرزىمىنەن بۇرىن توقتاتىلدى.
سوت قاۋلىسىندا رۋمەن راديەۆتىڭ وتستاۆكاسى كونستيتۋسيالىق سوت تاراپىنان راستالعانى جانە شەشىمنىڭ 2026 جىلعى 23 قاڭتاردان باستاپ كۇشىنە ەنەتىنى كورسەتىلگەن. كونستيتۋسيا تالاپتارىنا سايكەس، ۆيسە-پرەزيدەنت يليانا يوتوۆا پرەزيدەنت وكىلەتىن ءوز موينىنا الدى. وسىلايشا، ول بولگاريا تاريحىنداعى العاشقى ايەل پرەزيدەنت اتاندى جانە ەلدىڭ التىنشى مەملەكەت باسشىسى بولدى.
ەسكە سالايىق، 19 قاڭتاردا، العاشقى پرەزيدەنتتىك انت بەرگەنىنە توعىز جىل تولعان كۇنى رۋمەن راديەۆ حالىققا ۇندەۋ جاساپ، قىزمەتتەن كەتەتىنىن مالىمدەگەن ەدى. ول بۇل شەشىمىن ەلدە جاڭا ۇكىمەت قۇرۋ مۇمكىن بولماعان جاعدايمەن جانە كەزەكتەن تىس پارلامەنتتىك سايلاۋدىڭ قاجەتتىلىگىمەن بايلانىستىردى.
61 جاستاعى يليانا يوتوۆا بولگار ۇلتتىق تەليەۆيدەنيەسىندە ەڭبەك ەتكەن، بولگار سوسياليستىك پارتياسىنىڭ مۇشەسى بولعان. بۇعان دەيىن ۇلتتىق پارلامەنت پەن ەۋروپارلامەنت دەپۋتاتى قىزمەتتەرىن اتقارعان. 2017 جىلدان بەرى بولگاريانىڭ ۆيسە-پرەزيدەنتى بولدى.
