الداعى ۋاقىتتا ەلىمىزدەگى ۇلتتىق ءبىرىڭعاي تەستىلەۋدىڭ ءوتۋ مەرىزىمى وزگەرۋى مۇمكىن. بۇل تۋرالى وتكەن اپتادا ق ر ءبىلىم جانە عىلىم ۆيسە-مينيسترى تاكير بالىقبايەۆ مالىمدەدى. ونىڭ ايتۋىنشا، جاڭادان جاسالىپ جاتقان «تىڭ» جوبا كەلەر جىلى سىناق تۇرىندە ەنگىزىلەدى. مينيسترلىكتىڭ مۇنداي قادامعا بارۋىنا ەلىمىزدەن رەسەيگە وقۋعا كەتەتىن جاستاردىڭ كۇرت كوبەيۋى سەبەپ بولعان كورىنەدى.

بۇعان دەيىن ەلىمىزدە ەمتيحان تاپسىرۋ سىناعى تەك جاز مەزگىلىندە وتەتىن. ال الداعى ۋاقىتتا اتالعان سىناق جىلىنا بىرنەشە رەت ۇيىمداستىرىلاتىن بولادى. ءبىر جاعىنان مينيسترلىكتىڭ مۇنداي جوبانى ىسكە اسىرۋى دۇرىس تا شىعار. ويتكەنى، مەكتەپ تۇلەكتەرى اتالعان سىناقتار ارقىلى ءبىلىمىن ارتىرىپ، قانداي ماماندىق تاڭدايتىنىن ايقىنداي تۇسەدى. ايتسە دە، ۆيسە-مينيستردىڭ بۇل باستامانى «رەسەيگە جاستارىمىز كەتىپ جاتىر» دەپ  ءتۇسىندىرۋى تۇسىنىكسىز بولىپ وتىر. تاكير بالىقبايەۆتىڭ ايتۋىنشا سوڭعى جىلدارى كورشىلەس ەلدىڭ جوعارعى وقۋ ورىندارى قازاق ەلىنە كەلىپ، جاستاردى رەسەيدە وقۋعا شاقىرۋىن جيىلەتكەن. سونداي-اق ول ۇگىت-ناسيحاتتىڭ ارقاسىندا قازاقستاندىق جاستاردىڭ كوپشىلىگى رەسەيدە ءبىلىم الۋعا تالپىنىپ وتىرعانىن مالىمدەدى.

– ءبىز وسى جوبا ارقىلى جاستاردىڭ وزگە ەلگە كەتۋىنە توسقاۋىل قويعىمىز كەلەدى. سوندىقتان ۇلتتىق ءبىرىڭعاي تەستىلەۋدىڭ تارتىبىنە وسىنداي وزگەرىستەر ەنگىزۋدەمىز. بۇل رەتتە رەسەيدىڭ، امەريكانىڭ تاجىريبەسىنە سۇيەندىك. اتالعان جوبا جەمىسىن بەرسە، ۇبت ءبىر رەتتىك ناۋقان ەمەس، تۇلەكتەردىڭ تالاپ-تىلەگىنە قاراي وتكىزىلەدى، – دەيدى  تاكير بالىقبايەۆ.

قوش، سونىمەن، ۇبت مەرىزىمىنىڭ وزگەرۋىنە جاستاردىڭ رەسەيگە جاپپاي وقۋعا كەتۋى نەگىزگى سەبەپ بولىپ وتىر ەكەن. ايتسە دە اتالعان مينيسترلىكتىڭ «وقيمىن» دەگەن بالانىڭ «بەتىن قاقپاي، بەلىن بۋۋدىڭ ورنىنا» نەگە توسقاۋىل بولىپ وتىرعانى تۇسىنىكسىز. «ءىلىم ىزدەپ قىتايعا بارساڭدا ارتىق بولماس» دەمەكشى، دۇنيە ءبىلىمىن قاي جەردەن الساڭ دا ارتىقتىق ەتپەيدى. بۇل – ءبىر. ەكىنشىدەن، ەلىمىزدەگى ءبىلىم بەرۋ جۇيەسى جاقسى دامىعان بولسا، جاستار جاپپاي شەت ەلگە وقۋعا اتتانباس ەدى عوي. سوندىقتان دا، مينيسترلىك «توسقاۋىل قويۋعا» اسىقپاي ەڭ اۋەلى ەلىمىزدىڭ ءبىلىم بەرۋ جۇيەسىن دامىتۋى كەرەك. سەبەبى، «ارقا جىلى بولسا، ارقار اۋىپ نەسى بار».

ۇشىنشىدەن، رەسەيگە كەتىپ جاتقان جاستاردىڭ باسىم بولىگى وزدەرىنىڭ تاريحي وتانىنا ورالىپ جاتقان ورىستار. ماسەلەن، ەلىمىزدە تۇرىپ جاتقان دياسپورالاردىڭ باسىم بولىگى ءوز بولاشاعىن قازاق ەلىمەن بايلانىستىرعىسى كەلمەيدى. سوندىقتان دا ولار ءوز وتاندارىنا ورالىپ، رەسەيگە جاپپاي كەتىپ جاتىر، كەتپەگەندەرى كەتسەك دەيدى. سوندا ولاردى بايلاپ ۇستاماقپىز با؟ ولاي بولسا، نەگە اسلان ءسارىنجىپوۆ باسقاراتىن مينيسترلىك تاريحي وتانىنا ورالعىسى كەلەتىن ورىس جاستارىنىڭ اياعىنا تۇساۋ بولىپ وتىر؟ «زورلاپ قوسقان تازى تۇلكى المايدى» دەمەكشى رەسەيگە كەتكىسى كەلگەن ورىستارعا قانشا جەردەن توسقاۋىل قويساق تا ءوز ەلدەرىنە كەتەدى. ال بۇعان كەدەرگى كەلتىرۋ اقىماق ادامنىڭ ءىسى. ۇزىن ءسوزدىڭ قىسقاسى، ۇكىمەت كەتەم دەگەندە، كەلەم دەگەندە ازاماتتارعا توسقاۋىل قويماۋى كەرەك.

كەلەم دەمەكشى، شەت ەلدە «وتانىما ورالسام ەكەن» دەپ جۇرگەن 5 ميلليوننان استام قازاق بار. ولاردىڭ باسىم بولىگى – قىلشىلداعان جاستار. سوندىقتان دا مينيسترلىك ورىس جاستارىنا توسقاۋىل قويماي، «كەلەم» دەگەن قانداستارىن سولتۇستىك وڭىرلەرگە اكەلسىن. بۇل، ارينە، ەڭ بىرىنشىدەن «ماڭگىلىك ەل» بولامىز دەپ وتىرعان ەلدىڭ بولاشاعى ءۇشىن ماڭىزدى. ال، تاكير بالىقبايەۆتىڭ رەسەيگە كەتىپ جاتقان ورىس جاستارىنا قابىرعاسى قارس ايرىلۋى قالاي؟ جالپى ءبىلىم جانە عىلىم مينيسترلىگى قازاق ەلىنىڭ بولاشاعى ورىس جاستارىندا دەپ جۇرگەن سياقتى.

سەرىك جولداسباي

استانا