بۇگىن استانادا وتكەن قازاق-جاپون بيزنەس-فورۋمى بارىسىندا «بايتەرەك» حولدينگىنىڭ ەنشىلەس كومپانياسى – قازاقستاننىڭ دامۋ بانكى (قدب) جاپونيانىڭ Sumitomo Mitsui Banking Corporation بانكىنەن 37290000 اقش دوللارى كولەمىندە قارىز الۋ تۋرالى كەلىسىمگە قول قويىلدى، - دەپ حابارلايدى «قامشى» پورتالى قازاقستاننىڭ دامۋ بانكى قوعاممەن بايلانىس قىزمەتىنە سىلتەمە جاساپ.

«بۇگىنگى كەلىسىم ءبىز ءۇشىن وتە ءتيىمدى شارتتارمەن جاسالىپ وتىر. ءبىز بۇل كەلىسىم بويىنشا وسى ءقاراجاتتى يگەرمەگەن جاعدايدا قانداي دا ءبىر جاۋاپكەرشىلىك المايمىز. جاپونيا تارابى بۇعان دا كەلىسىپ وتىر. بانك جوسپارىندا جەكەلەگەن كليەنتتەر بويىنشا قورلاندىرۋدىڭ قىمبات كوزدەرىن بارىنشا ارزانىنا اۋىستىرۋ بار. بۇل كەلىسىم كليەنتتەرمەن ءتيىمدى جۇمىسقا ىقپال ەتىپ، بانكتىڭ قارىز پورتفەلىن جاقسارتادى، جوبالارعا قاتىستى تاۋەكەلدەردى ازايتادى»، - دەدى قدب-ى باسشىسى بولات جامىشيەۆ.

جاپون  بانكىنەن 7 جىل مەرزىمگە الىنعان بۇل قاراجات دامۋ بانكىنىڭ جالپى كورپوراتيۆتىك ماقساتتارىنا نەمەسە ينۆەستيسيالىق جوبالاردى قارجىلاندىرۋ كوزدەرىن الماستىرۋعا جۇمسالاتىن بولادى. ەكى بانك اراسىنداعى ارىپتەستىك تۋرالى كەلىسىم العاش رەت 2008 جىلى جاسالعان بولاتىن.