ەرتەڭ ءولىپ كەتەرمىن كىم بىلەدى؟
ەرتەڭ ءولىپ كەتەرمىن كىم بىلەدى،
كوڭىل سەزسە ءىشىمدى مىڭ بۇرەدى.
ءبىزدىڭ تاعدىر تەز سونەر ايتەۋ ءبىر كۇن،
جانىپ تۇرعان تەگىندە سۇمبىلە ەدى.
ءومىرزايا بولارمىن كىم بىلەدى،
تاڭ اتادى، كۇن شىعىپ ءتۇن كىرەدى.
ءوزىمنىڭ دە سول جاققا كەتكىم كەپ ءجۇر،
تاعدىر قۇرعىر ءتانىمدى تىلگىلەدى.
كىم بىلەدى ولگەن سوڭ كەلگەن بار ما؟!
كەتكەندى دە، كەلگەندى كورگەن دە اللا!
جەمتىك بولىپ قۇزعىنعا ارام قاتقان،
بالا كۇننەن ەسىمدە ولگەن قارعا.
سول قارعاداي ءبىر كۇنى قالام مەن دە،
قۇزعىنداردى ءتۇسىرىپ ارام تەرگە.
ولمەي جاتىپ «ولەم» دەپ ولەڭ جازسام،
تابالايدى بىرەۋلەر ساراڭ دەر مە.
بىرەۋلەر دە ولەدى كىم بىلەدى،
ولاردىڭ دا ەرتەڭى كۇڭگىر ەدى.
ءتاتتى ءومىردى اڭساۋعا زاۋقىم دا جوق،
كوكتەگىلەر ءبىر كۇنى بۇلدىرەدى.
تاماعىما ءتۇيىلىپ ءتۇيىن مۇڭدار،
وڭەشىمە قان بولىپ قۇيىلدىڭدار.
ءتانىم-توبىر، توپالاڭ جانىم جالعىز،
جالعىزدىقتان جاپاندا قيىن كىم بار؟!
ءتىرى جۇرسەڭ تىرلىكتە كەكشەڭدەگەن،
تۇبىمە كوپ حايۋاندار جەتسەم دەگەن.
جانارلاردى تولتىرىپ جاسقا ماڭگى،
بۇگىن ءولىپ ءوزىم-اق كەتسەم بە ەكەن...؟!
تابا المادىق
ءبىر باقىتتى ىزدەدىك تابا المادىق،
«تاپتىق» دەدىك!
تاعدىردى تاعى الدادىق.
ءبىز ىزدەگەن ءبىر باقىت باقيدا ەكەن،
قايتا المادىق ول جاققا بارا المادىق.
ءبىر قۋانىش ىزدەدىك قۋانساق دەپ،
كەتسەك دەدىك ومىرگە ءبىر ءان ساپ كەپ.
جىلاپ كەلىپ كەتەمىز جىلاپ تاعى،
قۋانامىز جىميىپ تۋالساق تەك.
ءبىر ماحاببات ىزدەدىك تابا المادىق،
«تاپتىق» دەدىك!
جۇرەكتى تاعى الدادىق.
ءبىز ىزدەگەن ماحاببات كوكتە دەيدى،
پەرىشتە بوپ كورۋگە جارالمادىق.
ءبىر اسىلدى ىزدەدىك الىپ كۇشتى،
«تاپتىق» دەدىك!
جۇلدىز ول جارىق قۇشتى.
جۇلدىز ەكەش جۇلدىز دا ماڭگى ەمەستى،
قارا جەرگە قامىعىپ اعىپ ءتۇستى.
ءبىر نارسەنى ىزدەۋگە اسىعامىز،
تاپپاساق تا تاپتىق دەپ اسىرامىز.
شىندىق ىزدەپ تابا الماي اقىرىندا،
وتىرىكتىڭ دارىنا اسىلامىز.
ءبىر ادامدى ىزدەدىك كەزىپ كوپتەن،
قارا جەردەن تابا الماي كەزىپ كوكتەن.
ماڭگى ولمەيتىن ادامدى كوردىك ءبىراق،
ءتاڭىر بەرگەن تاعدىردان بەزىپ كەتكەن.
ءبىر ولەڭدى ىزدەدىك تابا المادىق،
«تاپتىق» دەدىك!
اقىندى تاعى الدادىق.
ولەڭ تاپتىق ولمەيتىن يەسى ونىڭ،
ءتاڭىر ەكەن... ءتاڭىر بوپ جارالمادىق!
قارا ءتۇن
مەن سەندىكپىن قۇشاعىڭدى اش قارا ءتۇن،
قيال قۇسىم ساعان جايىپ قاناتىن.
سامعاي ۇشتى سان ارماندى ارقالاپ،
شوعىرىنا جۇلدىزداردىڭ اعاتىن.
سەنى كۇتەم كۇن باتقان سوڭ قارا ءتۇن،
شىمشىلايدى شىدامسىزداۋ تاعاتىم.
بەس كۇن جالعان جارىعىنان جالىعىپ،
مەنىڭ جانىم سەنەن ءلاززات تاباتىن.
قاپ-قاراڭعى قارا تۇنەك قارا ءتۇن،
مەن ءبىر بەيباق ەسىگىڭدى قاعاتىن.
بالكىم سەندە توقتاپ قالار ۋاقىت ا...
مىنا جاقتا سىرعىپ جاتىر ساعاتىم.
شەكسىز-شەكسىز كورىنبەيتىن قارا ءتۇن،
جانارىمنىڭ نۇرى جەتپەي تالاتىن.
تۇنەگىڭە ءسىڭىپ كەتسەم اداسىپ،
ءباز بىرەۋدىڭ كوزىنەن جاس تاماتىن...
ول دا مەندەي ءبىر بەيباق-اۋ قارا ءتۇن،
مەنى كۇتىپ كەلگەنىمدى باعاتىن.
بەيتانىس ول... ماعان جاقىن ايتەۋىر
بىزگە ورتاق ءبىر شىرپىنى جاعاتىن...
قارا ءتۇن!
تاۋدا ءوستىم. تاۋدا تۋدىم. تاۋعا بارام
ارىسى تاۋ اڭىزى – ءامىرسانا،
تەگىندە جوڭعار جاتقان ءامىر سالا.
بەرىسى ساي-سالالى قارت توبەلەر،
اراسى شاتقال-شاتقال قوڭىر سالا.
تاۋلارى قولتىقتاسىپ جىلاندىمەن،
جازىعىن جايلاپ جاتقان قۇلان كىلەڭ.
قاراعاي قاۋلاپ وسكەن، تاۋدان جەتكەن،
سالايىن جاڭعىرىقتان ءبىر ءاندى مەن.
كوكتوعاي!
كوپ توعايدىڭ ورتاسىندا،
بابامنىڭ تاڭباسى بار جارتاسىندا.
قارا ەرتىس مالتا تاسى مالتىپ جۇرەر،
تومپايىپ ءار تۇينەكتىڭ قالتاسىندا.
مەن دە سول تۇينەكتەرمەن تەل وسكەنمىن،
تۋعاننان جوتالارمەن تەڭ وسكەنمىن.
شىلدەدە قارا ەرتىسكە بوي سۇڭگىتىپ،
قاقاعان اقپانىندا سەڭ ەسكەنمىن.
جانارعا شاعىپ السا جاس تولاتىن،
قالاقاي، بار بالاعا قاس بولاتىن.
اڭعال جۇرت جوتا كەزىپ، تەزەك تەرىپ،
ارشانىڭ يىسىنە ماس بولاتىن.
تاۋلىقپىز. تاۋ كىرەتىن تۇسىمىزگە،
قاينايتىن جەمىس بىتكەن ىشىمىزدە.
شايىرىن قاراعايدىڭ شايناۋشى ەدىك،
ءتىسىمىز سىرەسكەنشە تىسىمىزگە.
تاستارى ەتەگىنەن ساۋمالاعان،
دارەتسىز اڭ-قۇسى دا اۋناماعان.
جانىمنىڭ كيەسى دە يەسى سول،
تاۋدا ءوستىم. تاۋدا تۋدىم. تاۋعا بارام.
الماتىعا تاعى كەلدى ءتۇن اۋىپ...
نە سپيتسيا منە. تاكايا لۋننوست!
ەششە كاك بۋدتو بەرەگۋ
ۆ دۋشە ۋتراچەننۋيۋ يۋنوست.
(ەسەنين)
الماتىعا تاعى كەلدى ءتۇن اۋىپ،
«ۋ» الىپ...
مەن وتىرمىن سىر شەرتىسىپ باياعى،
كوڭىلشەكتەۋ بۇيرا بۇلتپەن جىلاۋىق.
جاسىن توگىپ جانارىنان جاسقانا،
رەنجىتتى مە تاس قالا...
ءتۇن اۋعاندا ءتۇرتىپ مەنى وياتقان،
مازاسىز وي سەن دە مەنى تاستاما.
كوشەدى بۇلت، جۇلدىز ءسونىپ ايسىز ءتۇن...
تۇنەك باستى. جايسىزبىن...
ءبارى ۇيقىدا. تەرەزەنىڭ الدىندا،
مەن وياۋمىن، بۇگىن تاعى وي ءسۇزدىم.
بالكىم ءبارى وزگەرەتىن شىعار ا...؟!
كوكتوبە دە... مۇنارا...
مەن اڭساعان ارمان الدان كۇتەدى،
ارمانشىلمىن شىدا جۇرەك، جىلاما!
بىرەۋ ەسىك قاعىپ كەلەر «باقىت» بوپ،
ەرىپ كەتەم ۋاقىت جوق...
شيماي-شيماي ويلار وسى ميىمدا،
تاعدىر جولىڭ قيىن با؟!
تىنىشتىق بەر! تىلەمەيمىن وزگە مۇڭ،
وزگە باقىت. كەرەك ەمەس سىيىڭ دا.
مەنى ءتۇنىم ۇيىقتاتۋعا كەلمەگەن،
مازاسىز وي تەرگەگەن.
ساعات ءتىلى ارتقا اينالىپ كەتسە عوي،
بەسىگىمە قايتا جاتسام تەربەگەن!
...تىرمالاپ جىر جازۋدامىن وزىمشە،
بىرەۋ ونى سەزىنسە...
قۇداي سەنىڭ كوزىڭشە!
مارعۇلان اقان
پىكىر قالدىرۋ