- اناشىم، مەن ەرتەڭ مەكتەپكە بارماي-اق قويايىنشى؟!؟

- نەگە؟ تورت اپارىپ بەرەمىن، تۋعان كۇنىندى دوستارىڭمەن اتاپ وتپەيسىڭ بە؟

- ءوي، ەرتەڭ تورت جەيتىن ەمەس، بەتكە «بىلش» ەتكىزەتىن كۇن بولادى عوي.

(وسى اڭگىمەنى ەستىگەن قۇلاق، كورگەن كوزدە جازىق جوق.)

بالەنىڭ ءبىرازى مەكتەپتەگى بالالاردان شىعۋدا. بوتەننىڭ قاڭسىعىن تاڭسىق كورگىش جاستار جەتىلىپ كەلەدى. ءسۇيىنىپ جەيتىن ءبالىشتى بەتكە «بىلش» ەتكىزۋ باستالسا، باياعىداي «نان كوقىمىن شاشپاي، جەردە جاتسا باسپاي، تەرىپ الىپ تورعايلارعا تاستاي» سالاتىن كورگەندى ۇرپاقتىڭ ازايىپ بارا جاتقانى دا.  

جالپى، ۇلدان – ۇلىق، قىزدان – قىلىق كەتۋىنە، باتىس كىنالى. سولاردىڭ  الگى جاستارعا ارناپ تۇسىرگەن «امەريكانسكيي پيروگ» اتتى كەلەڭسىز كينوسى ەكرانعا شىققالى كورگەنسىز كوگەنكوزدەرىمىز كوبەيدى. سول سوراقى فيلمدە ناندى قورلاۋ، مەكتەپ جاسىنان جىنىستىق قاتىناسقا ءتۇسۋ انايى سيپاتتالعان ەدى. ءبىر بولىممەن بىتسە يگى عوي، جوق، جالعاسىن تاۋىپ تا جاتتى. ءبىرىن قالدىرماي قازاق بالالارى ءبارىن كوردى. قىسقاسى، جاس ۇرپاقتىن ساناسىن بۇزىپ تىندى. انا مەن بالا اراسىنداعى اڭگىمە وسىنىڭ ءبىر عانا دالەلى. ناننىڭ وبالىن بىلمەيدى. بۇل تۇستا ۇلكەندەردىڭ دە ۇلگى بوپ جاتقانى شامالى. كىشكەنتايلاردىڭ كوزىنشە قوقىسقا ناندى دا، تاماقتى دا تاستاي سالادى. سوڭعى ون جىلدا اياق استىندا نان تۇرماق، شارانا دا جاتا بەرەتىن بولدى عوي. ون ۇشتە بالا بوسانىپ، انا اتانۋ – نە سۇمدىق؟!

اسقازانعا تيەسىلى اسقاباقتى باسىنا كيەتىن تاعى سول باتىس جۇرتىنىڭ شايتان-ويناعى - «حەللوۋين» جەتپەي تۇر ەدى، ءبىزدىڭ قوعامعا. جات ادەتكە كەتارى ەمەس كەي قازاقتار اتاپ تا ءوتتى، مۇنى. و زاماندا، بۇ زامان ۇلكەن-كىشىسى بار ءبىراز جاستىڭ ولىكتىڭ كەبىن كيىپ، ءتىرى ءارۋاق بوپ كوشە كەزگەنىن دە كوز كوردى. كوشەنى قويشى، بۇل بالەكەتتىڭ مەكتەپتەرگە جەتكەنى قىنجىلتادى. اسىرەسە، باستاۋىش سىنىپتىڭ ءبىراز بالاسى بەت-اۋىزدارىن بوياپ «حەللوۋيندى» «Hello»-لاپ قارسى الدى. 

ال، اس تا توك داستارحان جايىلىپ، نەشە ءتۇرلى سايىستار ۇيىمداستىرىلىپ، بارلىق سان-سالتاناتىمەن تويلاناتىن «التىن كۇز» اتتى مەرەكەدەن بەرەكە كەتكەن. بۇگىندە «اتاپ ءوتتى» دەگەن اتى عانا بار. ەلىكتەگىش شاقتاعى جەتكىنشەكتەردى يگى داستۇرگە قاراي يكەمدەۋدىڭ ورنىنا، مەكتەپ ۇجىمدارى جەڭىل-جەلپى «چاي پيتە» مەن ديسكوتەكا وتكىزگەندى وڭاي كورەدى. جوعارى سىنىپتىڭ وقۋشىلارىن جاپپاي سپورت زالعا جيناپ اپ، بىر-ەكى جۇمباق جاسىرىپ، ءۇش-تورت ساعات قۇر بيلەتىپ قايتاراتىپ ءجۇر. جالپى قاي مەرەكە بولماسىن، وسىلاي ءبىر سارىنعا ءتۇسىپ بارادى.

جىرتىق دجينسى، جۇلىم-جۇلىم كويلەك جۇپىنى سانمەن كيىگەنى سياقتى جاستاردىڭ ءۇستى-باسىن «قاندالا» قىلىپ بوياپ ءتىرى ولىكتىڭ كۇيگە تۇسكەنىنە دە كوز ۇيرەنىپ كەتپەسە ەكەن. 

ۇلتشىلدىعىن ايتىپ ۇرانداپ جۇرگەن ازاماتتار ۇلتتىق يدەولوگيانى توبەدەن ەمەس تومەننەن، تاستاردان ەمەس جاستاردان باستاسا ءجون-اۋ. عالامتوردىڭ زيانىنا ۇشىراعان بالادان ۇلت زيالىلارىن سۇراڭىزشى، سىناۋ ءۇشىن. جارتىمدى جاۋاپ الساڭىز قۋاناسىز. مەكتەپ وقۋلىقتارىنىڭ سيقى سۇرىقسىز.

«جاس وتان» جاستار قاناتى نە ءبىتىرىپ جاتىر ەكەن؟ ستۋدەنتتەرگە سايلاۋلاردا قول بۇلعاتىپ قويعاندارىنان، اندا-ساندا اكسيا وتكىزىپ كوز بوياعاندارىنان كوعام تۇزەلىپ كەتتى دەي مە؟ الدە «جايدارمانعا» بارىپ، ەزۋىن جيا الماي كۇلكىگە قارىق بوپ قايتقاندارىنا ءماز بوپ ءجۇر مە؟ نەمەنەسىنە جەتىسىپ كۇلەدى ەكەن، وسى جۇرت!!!! 

ءمولدىر نۇرمان