«الماتى» تەلەارناسىنداعى «ىسكەرلەر ۋاقىتى» باعدارلاماسىنا شاقىرىلعان ەكونوميست ماقسات سەرالى قازاقستاندا اقش دوللارىنىڭ قۇنى قانشا تەڭگەگە دەيىن كوتەرىلەتىنى تۋرالى بولجامدارىمەن ءبولىستى. بۇل تۋرالى «قامشى» پورتالى «الماتى» تەلەارناسىنا سىلتەمە جاساپ حابارلايدى.

«ۇلتتىق بانكتىڭ ءتوراعاسى اۋىسقاندىعى بارشاعا ءمالىم. وسى ۋاقىتقا دەيىن بۇرىنعى باسشى ق. كەلىمبەتوۆ تەڭگەنى ۇستاپ تۇرۋ ءۇشىن بەلگىلى-ءبىر قاراجاتتى كۇندەلىكتى ساتىپ جانە ساتىپ الىپ وتىرعان. قازىرگى تاڭدا جاڭا باسشى اۋىسقاننان كەيىن بۇل پروسەسس توقتاتىلدى. ەندى تەڭگەنى تولىق ەركىن اينالىمعا جىبەرۋ جوسپارلانىپ وتىر. 1-2 كۇننىڭ ىشىندە ۇلتتىق بانكتىڭ جاڭا ءتوراعاسى باسپا ءسوز ءماجىلىسىن ۇيىمداستىرىپ، ءوزىنىڭ ساياساتىن اشىق تۇردە حالىققا جەتكىزەدى. سول كەزدە ۇلتتىق بانكتىڭ ءتوراعاسىنان بولاشاققا جوسپارلانعان جوسپارىن كورە الامىز»، – دەيدى ماقسات سەرالى.

ەكونوميستىڭ ايتۋىنشا، قازىرگى تاڭدا دوللار باعامىنىڭ ءوسۋى زاڭدى.

«دوللاردىڭ ءوسۋى زاڭدى. ويتكەنى، وسى ۋاقىتقا دەيىن مۇنايدىڭ باعاسى تومەندەپ كەلە جاتىر. ياعني، قازاقستانعا كىرەتىن ىشكى كىرىستىڭ، دوللاردىڭ كولەمى ازايعاندىقتان، ىشكى نارىقتاعى تەڭگەنىڭ قۇنى تومەندەي باستادى. بۇنىڭ ءبىرىنشى سەبەبى، مۇناي باعاسىنىڭ تومەندەۋى. ءقازىر مۇنايدىڭ ءبىر بارەللى 48 دوللارعا باعالانۋدا. ەگەردە مۇنايدىڭ باعاسى ارى قاراي تومەندەي بەرەتىن بولسا، مىندەتتى تۇردە تەڭگە تومەندەيدى. قازىرگى تاڭدا قازاقستان ەكونوميكاسىنا ەڭ ءتيىمدى بولاتىن مۇناي باعاسى 70-80 دوللار توڭىرەگىندە، ءبىراق بۇل كورسەتكىشكە جەتە قويعان جوق. سوندىقتان الداعى ۋاقىتتا دوللارعا شاققانداعى تەڭگەنىڭ السىزدەنۋى مۇمكىن»، – دەدى «ىسكەرلەر ۋاقىتى» باعدارلاماسىنىڭ قوناعى.

ونىڭ توپشالاۋىنشا دوللار باعامى الدا 400-گە جەتۋى مۇمكىن.

«دوللار قانشاعا جەتىپ، توقتايتىندىعىن ناقتى ايتۋعا بولمايتىن شىعار. ويتكەنى، پروسەسس باستالدى جانە ءجۇرىپ جاتىر. دوللار باعامى تۇراقتاۋ ءۇشىن مۇنايدىڭ باعاسى بەلگىلەنگەن دەڭگەيگە كەلىپ توقتاۋى كەرەك. دوللاردىڭ تەڭگەگە شاققان باعامى 350-360 تەڭگەدەن باستالىپ، 400-گە دە جەتۋى مۇمكىن»، – دەدى ول.