كەشە استانا قالاسىندا جول-پاترۋلدىك پوليسيا قىزمەتكەرىن ماس جۇرگىزۋشى كولىكپەن سۇيرەتكەن. بۇل تۋرالى «قامشى» پورتالى BNews.kz-كە سىلتەمە جاساپ حابارلايدى.

استانا قالاسى ءىىد جول-پوترۋلدىك پوليسيا پولكىنىڭ قىزمەتكەرى اعا سەرجانت باعلان قارىمبايەۆ قىزمەت بابى كەزىندە ساعات 17.00 شاماسىندا Lada Kalina اۆتوكولىگىن توقتاتادى. توقتاتۋعا اتالمىش كولىكتىڭ جولدىڭ قارسى بەتىنە شىعىپ كەتۋى سەبەپ بولعان.

قۇجاتتارىن كورسەتۋ تالاپ ەتىلگەندە، جۇرگىزۋشى وقيعا ورنىنان قاشىپ كەتپەك بولادى. استانا ءىىد باسپا ءسوز قىزمەتىنەن حابارلاعانداي، پوليسيا قىزمەتكەرىنىڭ زاڭدى تالابىنا باعىنباعان جۇرگىزۋشى كولىگىن وتالدىرىپ، ورنىنان قوزعالىپ كەتكەن.

«پوليسيانىڭ اعا سەرجانتى ب.قارىمبايەۆ ورنىنان قوزعالعان كولىكتىڭ رۋلىنەن ۇستالىپ، ءتارتىپ بۇزۋشىنى توقتاتپاق بولادى. جۇرگىزۋشى جىلدامدىعىن ەش تومەندەتپەستەن پوليسيا قىزمەتكەرىن كەلەسى جول قيىلىسىنا دەيىن سۇيرەپ بارعان. ءومىرىن قاتەرگە تىگىپ، دەنە جاراقاتىن العانىنا قاراماستان، پوليسەي اقىرى ءتارتىپ بۇزۋشىنى توقتاتا الدى»، – دەپ حابارلادى ىىد-دەن.

مەديسينالىق كۋالاندىرۋدان وتكەن سوڭ جۇرگىزۋشىنىڭ ماس ەكەنى انىقتالدى. سونىمەن قاتار، ۇستالعان ازاماتتىڭ قوستاناي وبلىسىنىڭ 38 جاستاعى تۇرعىنى ەكەنى، بۇعان دەيىن بىرنەشە رەت ءىستى بولعانى جانە قىزىلوردا وبلىسىندا قىلمىس جاساعانى ءۇشىن ىزدەۋدە جۇرگەنى بەلگىلى بولدى.

ۇستالعان ازامات سوت سانكسياسىمەن قاماۋعا الىنىپ، ۋاقىتشا ۇستاۋ اباقتىسىنا جابىلدى. ءىىد تەرگەۋ باسقارماسى قىلمىستىق كودەكستىڭ 380-بابىمەن (بيلىك وكىلىنە ومىرىنە نەمەسە دەنساۋلىعىنا ءقاۋىپ توندىرەتىن زورلىق كورسەتۋ) تەرگەۋ جۇمىستارىن جۇرگىزىپ جاتىر.

ءتارتىپ بۇزۋشىنىڭ اسا ءقاۋىپتى جول-كولىك وقيعاسىن جاساۋىنا جول بەرمەگەن جول-پاترۋلدىك پوليسياسى جاساعىنىڭ قىزمەتكەرى اعا سەرجانت باعلان قارىمبايەۆ مەديسينالىق كومەك كورسەتۋ ءۇشىن اۋرۋحاناعا جەتكىزىلدى.