تەڭگە باعامىنىڭ تومەندەۋىنە بايلانىستى ق ر پارلامەنت ءماجىلىسىنىڭ دەپۋتاتى تۇرسىنبەك ءومىرزاقوۆ حالىققا اقشانى دوللارمەن ساقتاۋ تۋرالى كەڭەس بەردى. بۇل تۋرالى «قامشى» پورتالى total.kz–كە سىلتەمە جاساپ حابارلايدى.

ول تۇرعىندارعا تەڭگە تۇراقسىز بولعاندىقتان قاراجاتتى ەۋرومەن جانە دوللارمەن ساقتاعان ابزال دەگەن پىكىردە.

«اقشاسىن ۇزاق مەرزىمگە ساقتاعىسى كەلەتىندەرگە قاراجاتىن شەتەلدىك ۆاليۋتامەن ساقتاعان تيىمدىرەك. سەبەبى، ءبىز تەڭگەنىڭ تۇراقسىزدىعىنا كۋا بولۋدامىز. ءبىزدىڭ ەكونوميكا شاعىن عانا بولعاندىقتان، تەڭگە ءبىزدىڭ قاراجاتتارعا كەپىل بولا المايدى. سول سەبەپتى، مەن مۇمكىندىك بولسا، قاراجاتتى شەتەلدىك ۆاليۋتادا ساقتاعان جاقسىراق دەپ سانايمىن. ال قىسقا مەرزىمدى قاراجاتتى تەڭگەمەن ساقتاي بەرۋگە بولادى»، – دەيدى دەپۋتات.

سونداي-اق، دەپۋتات تۇرسىنبەك ءومىرزاقوۆ قازاقستاندىقتارعا بارىنشا بيزنەسپەن اينالىسۋعا كەڭەس بەردى.

ەسكە سالساق، وزگە وتاندىق ساياساتكەرلەر بۇعان دەيىن مۇلدەم باسقاشا كەڭەستەر ايتىپ كەلگەن. ماسەلەن، ۇلتتىق بانكتىڭ بۇرىنعى باسشىسى قايرات كەلىمبەتوۆ بىرنەشە رەت تۇرعىنداردى تەك وتاندىق ۆاليۋتادا اقشا ساقتاۋعا شاقىرعان بولاتىن. ءتىپتى ءوزى دە تەك ۇلتتىق ۆاليۋتادا اقشا ساقتايتىنىن العا تارتقان ەدى.

ۇلتتىق بانك ءتوراعاسىنىڭ ورىنباسارى قۋات قوجاحمەتوۆ تە اقشانى تەڭگەمەن ساقتاۋ كەرەك دەگەن پىكىر بىلدىرگەن.