ءوز سوزىندە بەرىك ءۋالي اشىلىپ وتىرعان پارتيا باسپا ءسوز ورتالىعىنىڭ باستى ماقساتى ەلباسى، «نۇر وتان» پارتياسىنىڭ ءتوراعاسى ن.ءا.نازاربايەۆ بەكىتكەن بەس ينستيتۋسيونالدى رەفورمانىڭ «اشىق جانە حالىققا ەسەپ بەرۋشى مەملەكەت» باعىتى اياسىندا پارتيانىڭ قالىڭ جۇرتشىلىق الدىنداعى جاريالىلىعىن قامتاماسىز ەتۋ بولىپ تابىلاتىنىن جەتكىزدى.

«پارتيا اشىقتىق پەن ايقىندىق قاعيداسىن جۇزەگە اسىرۋعا، كەز-كەلگەن اقپاراتتى اشىق ۇسىنۋعا دايىن. بۇگىنگى اشىلىپ وتىرعان باسپا ءسوز ورتالىعى وسىنى جۇزەگە اسىرۋدىڭ ءبىر تەتىگى»، - دەدى ب.ءۋالي.

پارتيانىڭ باسپا ءسوز ورتالىعى «نۇر وتاننىڭ» جاڭا مەديالىق ساياساتى شەڭبەرىندە جۇزەگە اسىپ، پارتيا مەن بۇقارالىق اقپارات قۇرالدارى اراسىنداعى ءوزارا بايلانىستى نىعايتۋعا، بيلىك پارتياسىنىڭ حالىقتىڭ ءال‑اۋقاتىن ارتتىرۋعا باعىتتالعان ءىس-شارالارىنىڭ ورىندالۋ بارىسى مەن سايلاۋالدى تۇعىرناماسىندا بەرىلگەن ۋادەلەردىڭ ىسكە اسۋى جونىندە اقپار تاراتاتىن الاڭ بولىپ قالىپتاسپاق.

بەكىتىلگەن كەستەگە سايكەس مۇندا اپتا سايىن بريفينگتەر وتكىزىلىپ، ورتالىق اپپاراتتىڭ دەپارتامەنت باسشىلارى، فراكسيا دەپۋتاتتارى، فيليال ءتوراعالارىنىڭ ءبىرىنشى ورىنباسارلارى، ءماسليحات حاتشىلارى، باستاۋىش پارتيا ۇيىمدارىنىڭ وكىلدەرى اتقارىلىپ جاتقان جۇمىستار جونىندە ەسەپ بەرەتىن بولادى. قاجەت بولعان جاعدايدا پارتيانىڭ بريفينگ الاڭىنا وزەكتى ماسەلەلەر بويىنشا مەملەكەتتىك ورگان جەتەكشىلەرى دە شاقىرىلىپ، پىكىرلەرى تىڭدالماق.

پارتيا ءتوراعاسى ءبىرىنشى ورىنباسارىنىڭ كەڭەسشىسى اتاپ وتكەندەي، ەلباسى، پارتيا ءتوراعاسى جۇكتەگەن مىندەتتەردى ىسكە اسىرۋدا، وڭىرلەردەگى جۇمىستى كۇشەيتۋگە باسىمدىق بەرىلىپ وتىر. سونىمەن قاتار، قوعامداعى وزەكتى ماسەلەلەرگە ساراپتاما جۇرگىزىلىپ، 13 پارتيالىق جوبا 8 جوباعا بىرىكتىرىلدى. وعان قوسا، ەكى جوبا قولعا الىنىپ وتىر. ەلباسىنىڭ «ۇلى دالا ەلى» يدەياسى اياسىندا رۋحاني قۇندىلىقتاردى دارىپتەۋ، ۇرپاقتار تاربيەسى ماسەلەلەرىن ناسيحاتتاۋعا كوڭىل ءبولىنىپ وتىر. وسى جوبا شەڭبەرىندە پارتيالىق باق-تا «ۇلى دالا وسيەتى» ايدارىمەن ەلىمىزدىڭ ەجەلگى زاماننان بەرگى تاريحىنداعى ورنى ەرەكشە ۇلى ويشىلداردىڭ ناقىل سوزدەرىن، تالىم-تاربيەلىك ماڭىزى بار وسيەتتەرىن وسكەلەڭ ۇرپاق ساناسىنا ءسىڭىرۋ ماقساتىنداعى بەينەروليكتەر كورسەتىلىپ، ارنايى ايدارلار اشىلۋدا. باسىلىمداردا قوعامدىق قابىلداۋ بولىمدەرىنە كەلگەن ازاماتتاردىڭ وتىنىشتەرىنىڭ ورىندالۋ بارىسىنا ارنالعان، «ەركىن مىنبە» («سۆوبودنايا تريبۋنا»)، «بيلىك نازارىنا» ايدارلارى اشىلعان.

ال پارتيا قابىلداپ وتىرعان ەكىنشى جاڭا جوبا اۋىلداعى جۇمىسسىزدىق ماسەلەسىن شەشۋگە باعىتتالىپ، وتباسىلىق شارۋالارعا قولداۋ كورسەتۋ جۇيەسىن قۇرۋدى كوزدەيدى. وسى ارقىلى اۋىلشارۋاشىلىعىن ىلگەرىلەتۋ جوسپارلانۋدا.  

«نۇر وتان» پارتياسى ورتالىق اپپاراتىنىڭ باسشىسى ج.قوجاحمەتوۆ ەلباسى، پارتيا ءتوراعاسى ن.ءا.نازاربايەۆتىڭ قويعان مىندەتتەرى اياسىندا پارتيادا حالىقپەن جۇمىستى نىعايتۋ، پارتيالىق باقىلاۋ مەن وڭىرلىك جۇمىس تيىمدىلىگىن ارتتىرۋ جونىندە اتقارىلعان جۇمىستار جايلى حابارلادى. اتاپ ايتقاندا، ۇلت جوسپارىن زاڭنامالىق تۇرعىدان قامتاماسىز ەتۋ بويىنشا ماجىلىستەگى پارتيا فراكسياسىنا كەلىپ تۇسكەن 62 زاڭ جوباسىنىڭ 59-ى ماقۇلدانىپ، 1 قاراشاداعى مالىمەتكە سايكەس پارلامەنتتە 36 زاڭ جوباسى قابىلدانعان. وعان قوسا، وزەكتى ماسەلەلەر بويىنشا وڭىرلەردەن ورتالىق اپپاراتقا كەلگەن ۇسىنىستار سارالانىپ، پارلامەنت ءماجىلىسىنىڭ جۇمىس توپتارىنا جەتكىزىلەتىنىن ايتتى.

سونداي-اق، «نۇرلى جول» باعدارلاماسىنىڭ جۇزەگە اسىرىلۋىن باقىلاۋ جونىندە ءماجىلىس پەن ءماسليحاتتارداعى پارتيا فراكسيالارى جانىندا 4 كوميسسيا قۇرىلعانىن ايتتى. الداعى ۋاقىتتا اگروونەركاسىپتىك كەشەنىنە قاتىستى تاعى ءبىر كوميسسيا قۇرىلاتىنىن دا حابارلادى.

وعان قوسا قوعامدىق قابىلداۋ بولمەلەرى مەن «ەلەكتروندى پارتيا» حالىقپەن كەرى بايلانىستىڭ نىعايا تۇسۋىنە ىقپال ەتكەن. ەكى جىلدا مەملەكەتتىك ورگانداردىڭ جەتەكشىلەرى مەن دەپۋتاتتاردىڭ ازاماتتاردى جەكە قابىلداۋلارىنىڭ سانى 8 ەسە وسكەن. شاعىمداردىڭ ءاربىر التىنشىسى ەلەكتروندى تۇردە قابىلدانادى. پارلامەنت ماجىلىسىندەگى پارتيا فراكسياسىنىڭ مۇشەلەرىنە تىكەلەي ءوتىنىش جىبەرۋگە مۇمكىندىك بەرەتىن «دەپۋتات بلوگى» قىزمەت ەتىپ تۇرعانى دا ايتىلدى.

پارتيانىڭ ورتالىق اپپاراتىندا ورىن العان وڭتايلاندىرۋدىڭ ناتيجەلەرى جايلى ايتىپ ءوتتى. بۇدان بۇرىن پارتيا ءتوراعاسىنىڭ ءبىرىنشى ورىنباسارى ا.مىرزاحمەتوۆ حابارلاعانداي، 1 قاراشادان باستاپ، پارتيانىڭ ورتالىق اپپاراتى مەن وڭىرلىك فيليالدار جاڭا شتات كەستەسى بويىنشا جۇمىس اتقارا باستادى. وسىلايشا، ورتالىقتا قىزمەتكەرلەر سانى 132-دەن 116-عا دەيىن قىسقارىپ، وڭىرلىك فيليال قىزمەتكەرلەرىنىڭ سانى 43%-عا، ياعني 358 بىرلىككە كوبەيگەن. فيليالداردىڭ جۇمىس ساپاسى مەن تيىمدىلىگىن باعالاۋدىڭ نىسانالى ينديكاتورلارى ازىرلەنىپ، كەلەسى جىلدان باستاپ قولدانۋعا جوسپارلانىپ وتىرعانىن دا ايتتى ورتالىق اپپارات باسشىسى.