بۇگىن ماجىلىستە پالاتا دەپۋتاتتارى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە سالىق سالۋ جانە كەدەندىك اكىمشىلەندىرۋ ماسەلەلەرى  بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىنا سەنات تاراپىنان ەنگىزىلگەن تۇزەتۋلەردى قارادى. بۇل زاڭ جوباسى ءبىرقاتار زاڭنامالارعا قوسىمشا قۇن سالىعى مەن الكوگولدى ونىمدەرگە بەرىلەتىن اكسيز ستاۆكالارىنا وزگەرىستەر ەنگىزۋدى كوزدەيدى، - دەپ حابارلايدى «قامشى» پورتالى قازاقپاراتقا سىلتەمە جاساپ. 

تالقىلاۋدان سوڭ تومەنگى پالاتا دەپۋتاتتارى سەنات ەنگىزگەن ۇسىنىستارعا كەلىسىمىن بەردى. ەندى قۇجات مەملەكەت باسشىسىنىڭ قول قويۋىنا جولدانادى.

ايتا كەتەرلىگى، پارلامەنت قابىلداعان وسى زاڭ «100 ناقتى قادام» ۇلت جوسپارىنىڭ 39-، 65- جانە 67-قادامدارىن ىسكە اسىرۋ، سونداي-اق سالىقتىق جانە كەدەندىك اكىمشىلەندىرۋ تەتىكتەرىن جەتىلدىرۋ جولىمەن قولايلى كاسىپكەرلىك ورتانى قالىپتاستىرۋ ماقساتىندا ازىرلەنگەن بولاتىن.

زاڭدا سالىق ساياساتى بويىنشا ءبىرقاتار شارالار قامتىلىپ وتىر. ماسەلەن، قوسىلعان قۇن سالىعى بويىنشا تىركەۋ ەسەبىنە تۇرۋدىڭ شەكتى مولشەرىن 59،4 ملن. تەڭگەدەن 6،4 ملن. تەڭگەگە تومەندەتۋ، تاۋارلاردى يمپورتتاۋ كەزىندە قوسىلعان قۇن سالىعى ەسەپكە الۋ ادىسىمەن تولەنەتىن نورمالاردىڭ قولدانىلۋ مەرزىمىن 2022 جىلعا دەيىن ۇزارتۋ، جەكە كاسىپكەر رەتىندە تىركەۋ الىمىن تولەۋدى الىپ تاستاۋ قاراستىرىلادى. بۇدان بولەك، گەولوگيالىق بارلاۋ جۇمىسى كەزەڭى ىشىندە جينالعان قوسىلعان قۇن سالىعىن بەس جىلدىڭ ىشىندە قايتارۋ كوزدەلىپ وتىر.

ءماجىلىس دەپۋتاتى سەرىك وسپانوۆتىڭ ايتۋىنشا، سەنات تاراپىنان قۇجاتقا 5 تۇزەتۋ ەنگىزگەن. ولاردىڭ ىشىندە ءبىر تۇزەتۋ الكوگول ونىمىنە كونياك، برەندي، شاراپ، شاراپ ماتەريالى، سىرا جانە سىرا سۋسىنىنان باسقا اكسيزدەر ستاۆكاسىن قايتا قاراۋ ۇسىنىلادى.

«ايتا كەتەرلىگى، زاڭ جوباسىن ماجىلىستە قارالعاندا كەدەن وداعىنداعى ارىپتەس ەلدەردە قابىلدانعانداي، الكوگول ونىمىنە سالىقتىڭ قولدانىستاعى اكسيز ستاۆكاسىن كەلەسى ءۇش جىلعا وزگەرىسسىز قالدىرۋ جونىندەگى تۇزەتۋ دەپۋتاتتار تاراپىنان ەنگىزىلگەن. ءبىراق، ول ۋاقىتتا ۇكىمەت ونداي شاراعا دايىن بولماعاندىقتان، ءوزىنىڭ قورىتىندىسىمەن ءماجىلىس دەپۋتاتتارىنىڭ باستاماسىن قولدامادى. زاڭ جوباسىن سەناتتا قاراۋ بارىسىندا ۇكىمەت ءوز شەشىمىن قايتا قاراپ، الكوگول ونىمىنە اكسيز ستاۆكاسىن كۇتىلىپ وتىرعان 30 پايىزدىق وسىمنەن سەناتپەن ۇسىنىلعان قولدانىستاعى ستاۆكانى 10-عا ەمەس، 15 پايىزعا ۇلعايتۋ جونىندە شەشىم قابىلدادى. وسىعان وراي، سەنات ەنگىزگەن تۇزەتۋلەرمەن كەلىسۋگە بولادى دەپ ەسەپتەيمىز»، - دەدى دەپۋتات سەرىك وسپانوۆ.

تۇتاستاي العاندا، قۇجاتتى قابىلداۋ، ەڭ الدىمەن، قولايلى بيزنەس-ورتانى قۇرۋعا، مەملەكەتتىڭ ستراتەگيالىق ماقساتتارىن ىسكە اسىرۋعا جانە ودان ءارى تۇراقتى الەۋمەتتىك-ەكونوميكالىق دامۋى ءۇشىن ىقپال ەتەتىن بولادى.