62-قادام. ەكونوميكانىڭ شيكىزاتتىق ەمەس سالالارىنداعى ورتا بيزنەستىڭ ناقتى كوشباسشى كومپانيالارىن قولداۋعا باعىتتالعان «ۇلتتىق چەمپيوندار» بەلسەندىلىگىن جۇزەگە اسىرۋ.
بيزنەس-كوشباسشىلاردى ايقىنداۋ نوۋ-حاۋ ترانسفەرى ءۇشىن بىلىكتىلىك ورتالىقتارىن قۇرۋ مۇمكىندىگىن بەرەدى.
ۇلت جوسپارى – «100 ناقتى قادام»
وڭىرلىك كاسىپكەرلەر پالاتاسىنىڭ باستاماسىمەن رەسەي فەدەراسياسى تومسك وبلىسىنىڭ كاسىپكەرلەرى وبلىسقا كەلىپ، جەرگىلىكتى ارىپتەستەرىمەن جۇزدەستى. بيزنەسمەندەردىڭ تۇبەككە كەلۋ ساپارىنىڭ باستى ماقساتى – قازاقستاندىق ارىپتەستەرمەن تىعىز بايلانىس ورناتىپ، كاسىپكەرلىك سالاسىن وركەندەتۋ. وسىعان وراي وبلىستىق كاسىپكەرلىك پالاتاسىنىڭ عيماراتىندا ارنايى كەزدەسۋ ۇيىمداستىرىلىپ، وبلىستىڭ ىسكەر ازاماتتارى تومسك وبلىسىنىڭ ءىرى كاسىپورىندارىنىڭ باسشىلارىمەن كەزدەسىپ، جاقىن تانىسىپ، ەركىن سۇحباتتاستى.
باسقوسۋ بارىسىندا ماڭعىستاۋلىق كاسىپكەرلەر ساراپتامالىق قۇرالدار، ادىستەمەلىك جانە باعدارلامالىق جاساقتاما، دايارلاۋ سىنامالارى قۇرىلعىلارىن، سۋ، توپىراق، اۋا، تاعام ونىمدەرىندەگى ۋلى قوسپالاردى باقىلاۋعا جانە حيميالىق تالداۋ جۇرگىزۋگە ارنالعان قوسالقى جابدىقتار وندىرۋمەن اينالىساتىن «توماناليت» عىلىمي-وندىرىستىك كاءسىپورنى قىزمەتىمەن تانىستى. سونداي-اق تابيعي اعاشتان جيھاز جاسايتىن «سپ «تەحنولەس» ج ش س، مۇناي جانە گاز، مۇناي حيمياسى، كوممۋنالدىق شارۋاشىلىق جانە باسقا دا سالالارعا ارنالعان جابدىقتاردى دايىنداۋمەن اينالىساتىن «نپو «سيبيرسكيي ماشينوسترويتەل» جانە يندۋكسيالىق قىزدىرۋ جۇيەلەرى مەن كەشەندەرىن دايىنداۋمەن جانە وندىرۋمەن اينالىساتىن «ماگنيت م» كومپانيالارىنىڭ جۇمىسىمەن جاقىنىراق تانىستى. كەزدەسۋدە بايانداما جاساعان تومسك وبلىسى بويىنشا، كاسىپكەرلىكتى دامىتۋ پالاتاسىنىڭ باسشىسى دميتريي نەمىتكوۆ قازاقستان مەن رەسەي اراسىنداعى ىنتىماقتاستىق پەن ءوزارا ساۋدا-ەكونوميكالىق قارىم-قاتىناستىڭ تامىرى تەرەڭدە جاتقانىنا توقتالدى. 2008 جىلدان باستاپ تومسك كاسىپكەرلەرى ەلىمىزدىڭ استانا، الماتى، پاۆلودار، وسكەمەن، قاراعاندى، شىمكەنت قالالارىندا 8 بيزنەس-ميسسيا ۇيىمداستىرعانىن اتاپ ءوتتى. ناتيجەسىندە، ەكى ەل اراسىندا تاۋار اينالىم 229،4 ملن اقش دوللارىن قۇراعان.
– تومسك باتىس سىبىردە يندۋسترياسى دامىعان ورتالىق سانالادى. بىزدە شاعىن جانە ورتا كاسىپكەرلىك سالاسى جاقسى جولعا قويىلعان. ايماقتىق ەكونوميكانىڭ 26،03%-ى – ماشينا قۇراستىرۋ، 19،65 %-ى – ازىق تۇلىك ءوندىرۋ، 4،16%-ى – فارماسەستيكالىق ونىمدەر شىعارۋ، 6،59 %-ى – اعاش ونىمدەرىن وڭدەۋ، 11،94%-ى – حيميالىق جانە 8،32%-ى – مۇناي ونىمدەرى مەن 2،29%-ى – پلاستيك جانە رەزينا بۇيىمدارىن شىعارۋ. جىل ساناپ ايماق ەكونوميكاسى دامىپ كەلەدى. بيزنەستىڭ باعى بەلسەندىلىكتە، سوندىقتان دا ءبىز وزگە ەلدەرمەن بايلانىستى نىعايتىپ، وبلىسىمىزدا كاسىپكەرلىك سالاسىن ءالى دە وركەندەتۋ جوسپاردا. سونىمەن قاتار بۇگىنگى تاڭدا تومسكتە قازاقستاندىق بەس مىڭعا جۋىق ستۋدەنت ءبىلىم الۋدا. جالپى، تومسكتە 7 مەملەكەتتىك جوو مەن 20-عا جۋىق زەرتتەۋ ينستيتۋتى بار. بۇل جوو-عا دا ستۋدەنتتەردى تارتۋ، كاسىبي تۇرعىدان دايارلاۋ جۇمىستارىن دا جانداندىرعىمىز كەلەدى، – دەيدى تومسك وبلىسى بويىنشا كاسىپكەرلىكتى دامىتۋ پالاتاسىنىڭ باسشىسى دميتريي نەمىتكوۆ.
كەزدەسۋدە ەكى وبلىستىڭ كاسىپكەرلەرى ءوزارا ەركىن پىكىر الماسىپ، تىعىز ارىپتەستىك پەن ۇزاق مەرزىمدى سەرىكتەستىك ورناتۋ جولدارىن جان-جاقتى تالقىلادى. تاۋار ءوندىرۋ مەن ونى وتكىزۋ ماسەلەسىن دە ءسوز ەتىپ، ەكى وبلىس اراسىنداعى بايلانىستى نىعايتا ءتۇسۋ جولدارىنا توقتالدى. كەزدەسۋ اياقتالعان سوڭ تومسكىلىك بيزنەسمەندەر وبلىستاعى ءبىرقاتار كاسىپورىنداردى ارالاپ، جۇمىسىمەن تانىستى.
دەرەككوز: ايقىن-اقپارات
