قازاق حاندىعىنىڭ 550 جىلدىعىنا وراي اقتاۋ قالالىق مادەنيەت جانە تىلدەردى دامىتۋ ءبولىمىنىڭ ۇيىمداستىرۋىمەن جازبا اقىندار ءمۇشايراسى ءوتتى. «ەگەۋلى نايزا قولعا الماي» دەگەن اتپەن ۇيىمداستىرىلعان جىر دوداسىنا قالاداعى وقۋ ورنىنىڭ 15 ستۋدەنتى قاتىستى.
شارا ماقساتى – قازاق حاندىعىنىڭ 550 جىلدىعىن مەرەكەلەۋدىڭ ءمانى مەن بۇگىنگى تاڭداعى تاريحي ماڭىزىن اشۋ، «ماڭگىلىك ەل» مۇراتىن جاس ۇرپاققا كەڭىنەن ناسيحاتتاۋ.
– سونىمەن قاتار شارا باتىر بابالارىمىزدىڭ ەرلىك ىستەرىن جانە ەلدىڭ بىرلىگىن دانالىعىمەن ۇيىتقان بي-شەشەندەرىمىزدىڭ وتانسۇيگىش ونەگەسىن جاستارعا ۇلگى ەتۋ ماقساتىندا ۇيىمداستىرىلىپ وتىر. قاتىسۋشىلارعا قويىلاتىن باستى تالاپ – قازاق ەلىنىڭ مادەنيەتى مەن ءسالت-داستۇرىن ناسيحاتتاۋ، دەربەس حاندىق قۇرىپ، بىلەكتىڭ كۇشى، نايزانىڭ ۇشىمەن ەلدىگىن قورعاپ قالعان بابالار ەرلىگىن، بۇگىنگى تاۋەلسىزدىگىمىزدى جىرعا قوسۋ، مەملەكەتتىك ءتىلدىڭ قولدانۋ اياسىن كەڭەيتۋ جانە ولەڭ قۇدىرەتى ارقىلى مەملەكەتتىك ءتىلدىڭ مارتەبەسىن كوتەرۋ. كەڭ كولەمدە وتكىزىلەتىن مۇنداي شارالارعا قالا جاستارى بەلسەندى تۇردە قاتىساتىنىن اتاپ وتكىم كەلەدى، – دەيدى اقتاۋ قالالىق مادەنيەت جانە تىلدەردى دامىتۋ ءبولىمىنىڭ باس مامانى ءاليا توعىزبايەۆا.
بايقاۋدىڭ بارلىق تالاپتارىنان سۇرىنبەي ءوتىپ، قاتىسۋشىلاردىڭ اراسىنان دارالانىپ كوزگە تۇسكەن ش.ەسەنوۆ اتىنداعى كمتجيۋ-دىڭ ءىى كۋرس ستۋدەنتى گۇلدەن ءومىرزاقوۆا باس جۇلدەنى يەلەندى. كوپبالالى وتباسىندا تاربيەلەنگەن گۇلدەن قولىنا قالام ۇستاپ، ولەڭ جازۋدى مەكتەپ كەزىنەن باستاپتى. العاشقى جىر شۋماعىن اناسىنا ارناپ جازىپ، كەيىن قالالىق، وبلىستىق، رەسپۋبليكالىق جازبا اقىندار بايقاۋىنا قاتىسۋدى داستۇرگە اينالدىرعان. اقتوبە قالاسىندا وتكەن رەسپۋبليكالىق عىلىمي جوبادا «ماڭعىستاۋدىڭ ايتىسكەر اقىندارى» اتتى جوباسىن ءساتتى قورعاپ، ەكىنشى ورىندى يەلەنگەن.
– وبلىس، رەسپۋبليكا كولەمىندە وتكىزىلەتىن بايقاۋلارعا ۇنەمى بەلسەندى تۇردە قاتىسىپ، قابىلەتىمدى شىڭداپ وتىرامىن. ءارتۇرلى كونفەرەنسيالاردا ءجيى بايانداما وقيمىن. بۇل جولى بايقاۋ ەلىمىزدە اتالىپ جاتقان مەرەيلى داتاعا ارنالعاندىقتان «ەر تولەپ» باتىر جايىندا ولەڭىمدى ۇسىندىم. بايقاۋ جەڭىمپازى اتانعانىما وتە قۋانىشتىمىن. ەندى باتىر بابامىز جايىندا ۇلكەن ماقالا جازۋدى قولعا الدىم، ءساتىن سالسا، باسىلىم بەتتەرىندە جارىق كورەدى، – دەيدى گۇلدەن ءومىرزاقوۆا.
بايقاۋدىڭ قورىتىندىسى بويىنشا جۇلدەلى ورىن العان وزگە دە جەڭىمپازدارعا ۇيىمداستىرۋشىلار تاراپىنان باعالى سىيلىقتار مەن العىسحاتتار تابىستالدى.
دەرەككوز: ايقىن-اقپارات
