كەلەر جىلى الماتى قالاسىندا 6 جاڭا ساۋدا-ويىن ساۋىق ورتالىعى اشىلادى. ولاردىڭ جالپى كولەمى جارتى ميلليون شارشى مەتردى قۇرايتىن بولادى. بۇل تۋرالى جىلجىمايتىن مۇلىك جونىندەگى ساراپشى، Colliers Kazakhstan بايان قۋاتوۆا ايتىپ وتىر.

«بۇكىل قازاقستان بويىنشا 250 حالىقارالىق برەندتىك كومپانيالار جۇمىس ىستەيدى. ولاردىڭ ىشىندە رەسەيلىكتەر دە بار. سولاردىڭ تەك 50 شاقتىسى عانا ءىرى ساۋدا جەلىلەرىنە يە» دەگەن ساراپشى وسى جىلدىڭ اياعى نەمەسە كەلەر جىلدىڭ باسىندا الماتىداعى التىنسارين داڭعىلى مەن قابدولوۆ كوشەسىنىڭ قيىلىسىندا Grand Park Almaty ساۋدا ورتالىعى اشىلاتىنىن ايتتى. ورتالىقتىڭ جالپى كولەمى 250 شارشى مەتردى قۇرايدى.

سونداي-اق، باعاناشىل ىقشاماۋدانىندا 31 مىڭ شارشى مەترلىك Villa Bountiques & Restaurants  ورتالىعى 2016 جىلدىڭ ءبىرىنشى توقسانىندا ىسكە قوسىلادى. ءال-فارابي مەن جەلتوقسان داڭعىلدارىنىڭ قيىلىسىندا سالىنىپ جاتقان AFD Plaza ساۋدا گالەرەياسى كەلەسى جىلدىڭ ەكىنشى توقسانىندا اشىلادى دەپ كۇتىلۋدە. ونىڭ اۋماعى 10 مىڭ شارشى مەتردەن اسىپ جىعىلادى.

2016 جىلدىڭ ءۇشىنشى توقسانىندا «فورۋم» (سەيفۋللين-تيميريازيەۆ قيىلىسى)، «ماسكەۋ» (اباي-التىنسارين قيىلىسى)، Passage de Paris (فۋرمانوۆ-گاندي قيىلىسى) اتتى تاعى ءۇش ساۋدا-ويىن ساۋىق ورتالىعى اشىلادى. ولاردىڭ اۋماعى 30-دان 155 مىڭ شارشى مەتر ارالىعىن قۇرايدى.

ساراپشىنىڭ ايتۋىنشا، بۇگىندە الماتىدا بارلىعى 27 ءىرى ساۋدا-ويىن ساۋىق ورتالىعى جۇمىس ىستەيدى.