فونوگرامماعا جانى قاس ءداستۇرلى ءانشى ەركىن شۇكىمان بۇگىندە شوۋ-بيزنەستە “ءانشى سىماقتاردىڭ” كوبەيىپ كەتكەنىنە كۇيىنەدى. بۇل تۋرالى "قامشى" پورتالى 31 ارنا-عا سىلتەمە جاساي وتىرىپ حابارلايدى.

بۇگىندە كومپيۋتەردىڭ “قۇدىرەتىمەن” بۇلبۇلعا اينالىپ، حالىقتىڭ “ىستىق ىقىلاسىنا” يە بولىپ جۇرگەن انشىلەر قازاق ەستراداسىندا جەتەرلىك. ءتىپتى، فونوگراممانى ولار تىعىرىقتان شىعۋدىڭ ەڭ وڭاي جولى دەپ سانايدى.

«ءان ايتساڭ، جانىڭدى جەپ ايت». وسى قاعيدانى ءداستۇرلى ءانشى ەركىن شۇكىمان بەرىك ۇستانعان. سوندىقتان بولار، ساحنادا ورىندايتىن اندەرىن وسى كۇنگە دەيىن كومپيۋتەردىڭ كومەگىمەن ايتىپ كورمەپتى.

فونوگرامماعا جانى قاس ونەر يەسى بۇگىندە شوۋ- بيزنەستە “ءانشى سىماقتاردىڭ” كوبەيىپ كەتكەنىنە كۇيىنەدى. ەگەردە ولاردى ناعىز دوداعا سالىپ سىناپ كورەتىن بولسا، ءبىرازى ونەردەن سىرىلىپ قالاتىنا دا سەنىمدى.

ءداستۇرلى ءانشى ارنايى زاڭنىڭ بولۋىن تالاپ ەتسە، ال تانىمال ونەرتانۋشى ەرلان تولەۋتاي بۇگىنگى قازاق ەستراداسىنىڭ دەڭگەيىنە كوڭىلى تولمايتىنىن باسپا ءسوز بەتتەرىندە اشىق بىلدىرگەن. ءتىپتى، فونوگراممەن ءان ايتۋدى – حارام دەپ كەسىپ ايتتى.

“فونوگراممامەن ءان ايتۋ- حارام! ديسكىگە جازىلىپ الىنعان داۋىسقا ىلەسىپ ساحنادا اۋىز جىبىرلاتىپ تۇرعاننىڭ نەسى ونەر؟ تۇپتەپ كەلگەندە، بۇل حالىقتى الداۋ، حارام جولمەن اقشا تابۋ عوي. فونوگراممامەن ءان ايتۋ ونەر ەمەس!”، – دەيدى ەرلان تولەۋتاي.

تمد ەلدەرىنىڭ بارلىعى فونوگرامماعا الدە قاشان تىيىم سالعان. الايدا، بۇل قاتارعا قازاقستان ەنبەي وتىر.

زەرتتەۋشىنىڭ ايتۋىنشا گەرمانيا، جۇڭگو سىندى ەلدەردە ساحنادا وتىرىك اۋزىن جىبىرلاتىپ، حالىقتى الداسا جوعارى كولەمدە ايىپپۇل تولەيتىن كورىنەدى.

ەۋروپادا فونوگرامما دەگەن ۇعىم اتىمەن جوق. ءتىپتى، كورشى قىرعىزداردىڭ ءوزى باس تارتقان. ال، امەريكادا وعان رۇقسات بار، ءبىراق شىعارماشىلىق كونسەرتتەردىڭ افيشاسىندا «فونوگرامما» دەگەن ەسكەرتپە مىندەتتى تۇردە جازىلىپ تۇرادى ەكەن.

ال، ءداستۇرلى جانە ەسترادا اندەرىن قاتار شىرقايتىن ايگۇل قوسانوۆا فونوگراممادان باس تارتۋ ءۇشىن ءالى 20 جىلداي ۋاقىت قاجەت دەگەن پىكىردە. سەبەبى، توي مەن كونسەرتتەردە كوبىنەسە انشىدەن وڭدەلگەن اندەرىن سۇرايتىن كورىنەدى.

“تەليەۆيدەنيەدە فونوگرامما سۇراپ جاتادى. ول نەلىكتەن دەپ ويلايسىز ءبىز مىسالعا دومبىرامەن ءان ايتۋعا بارساق مىندەتتى تۇردە دومبىرامەن ءان ايتاتىن ادامنىڭ ويىندا مەن فونوگرامما الىپ بارامىن دەگەن وي بولمايدى. ەگەر شاقىرسا تىرىدەي ءان ايتامىن دەپ بارامىن”، – دەيدى قوسانوۆا.

كومپيۋتەردىڭ كومەگىمەن وڭدەلگەن ءاندى ورىنداعان ءانشىنىڭ داۋىسىمەن شەبەرلىگىن بىلۋگە بولادى.

الايدا، ءانشى ءمادينا ءسادۋاقاسوۆا جاندى داۋىستا ايتۋدان كەت ارى ەمەس. كەلەسى جىلى جاندى داۋىستا جەكە كونسەرتىن وتكىزۋدى كوزدەپ وتىر.

“فونوگرامماسىز كونسەرتتەردىڭ بارلىعىن وتكىزۋ كەرەك. ويتكەنى سەنىڭ كونسەرتىڭە حالىق كەلدى مە، كورەرمەن مىندەتتى تۇردە جاندى داۋىستى تىڭداۋ كەرەك. ال، كەيدە كوپتەگەن تۇسىرىلىمدەر مەن جوبالار بولادى ولار فونوگراممادا ءوتۋ كەرەك”، – دەيدى ءسادۋاقاسوۆا.