كەشە كەشكە فرانسيا استاناسىندا ەل تاريحىندا بۇرىن-سوڭدى بولماعان لاڭكەستىك ارەكەت ورىن الدى. قازا تاپقاندار سانى 150-دەن اسىپ جىعىلادى. تاعى سونشا ادام جاراقات العان. لاڭكەستەر كوشەدەگى تۇرعىندارعا وق اتىپ، كونسەرت زالىن باسىپ العان، 100-دەن استام ادامدى تۇتقىنداعان. ەڭ باستىسى ەل پرەزيدەنتىنىڭ تاماشالاۋىمەن فرانسيا مەن گەرمانيا قۇرامالارىنىڭ ويىنى ءوتىپ جاتقان ستاديون ماڭىندا جارىلىستار بولعان.

ءقازىر فرانسيا بيلىگى قازا بولعاندار سانىن ناقتىلاۋ، قاۋىپسىزدىكتى كۇشەيتۋ سىندى شارۋالارمەن الەك بولۋدا. قاندى وقيعانى دايش ۇيىمى ءوز موينىنا الدى دەگەن حابار تاراعانمەن، رەسمي پاريج ۇيىمداستىرۋشىلارعا قاتىستى قانداي دا ءبىر ناقتى مالىمدەمە جاساماي وتىر. مۇندايدا اسىعىس مالىمدەمە جاساۋدان  ماسەلەنىڭ ءمان-جايىن تولىق زەردەلەۋ ماڭىزدى ەكەنىن تۇسىنگەندىكتەن بولار.

الايدا، ءبىرقاتار اقپارات قۇرالدارى وقيعانى ۇيىمداستىرۋشىلارعا قاتىستى ءبىرقاتار بولجامدار جاساپ تا ۇلگەردى. سول بولجامداردىڭ ءبىرى، قاندى قىرعىننىڭ ارتىندا ماسكەۋ تۇر دەگەنگە مەڭزەيدى. وسى ماسەلەگە وراي بىرنەشە بلوگەرلەردىڭ پىكىرلەرى جاريالاندى. وندا تەراكتىنىڭ ارتىندا شىنىمەن ماسكەۋ تۇرسا، رەسەي پرەزيدەنتىن مۇنداي قادامعا نە يتەرمەلەۋى مۇمكىن دەگەن سۇراققا بىرنەشە جاۋاپتار ۇسىنىلادى. سولارعا كەزەك بەرسەك.

ءبىرىنشى سەبەپ – ءوش الۋ. فرانسيا – رەسەي مەن ۋكراينا اراسىنداعى قاقتىعىستارعا بايلانىستى باتىل پىكىر ايتىپ، رەسەيشىل سەپاراتيستەردى اشىق ايىپتاعان مەملەكەت. ەكىنشى سەبەپ – تاعى دا ءوش الۋ. پۋتين مەن پوروشەنكو كەزدەسۋى «تورتتىك» فورماتتا فرانسۋا وللاندتىڭ استاماشىلدىعىمەن ءوتتى. وندا ءپۋتيننىڭ ۇستانىمدارى تۇسىنىستىكپەن قابىلدانۋ بىلاي تۇرسىن، كۇلكىگە اينالدى. ودان كەيىن، فرانسيا باسىلىمدارى ەگيپەتتە اپاتقا ۇشىراعان  اۋە كەمەسىنە قاتىستى ءپۋتيننىڭ بىرنەشە كاريكاتۋرالارىن جاريالادى. بۇل دا رەسەي بيلىگىنىڭ قيتىعىنا تيەتىندەي-اق سەبەپ. 

ونىڭ ۇستىنە، شۋلى تەراكت تۇركيادا ۇلكەن جيىرمالىق باسشىلارىنىڭ كەزدەسۋى قارساڭىندا ۇيىمداستىرىلىپ وتىر. وعان قاتىسۋشىلار تۇگەلگە جۋىق پۋتينمەن كەزدەسۋدەن باس تارتتى. باسقوسۋ حاتتاماسىندا جيىندى ۇيىمداستىرۋشى ر. ەردوعاننىڭ عانا رەسەي باسشىسىمەن كەزدەسۋى جوسپارلانعان. سيرياعا شابۋىل جاساۋ ارقىلى الەمدىك قاۋىمداستىق الدىندا ۇپاي جيناۋ ماقساتى ءتيىستى دەڭگەيدە جۇزەگە اسپاي قالعان ۆ. پۋتين اتالعان جيىنداعى سالماعىن وسىلاي ارتتىرۋدى كوزدەگەن بولۋى دا مۇمكىن.

ءبىراق، بۇل بولجامدار ازىرگە ەشبىر رەسمي سيپاتقا يە ەمەس. ازىرگە. بىرەر كۇندە ساراپشىلار مەن ءىرى اقپارات قۇرالدارى قولدارىندا بار «بومبا» مالىمەتتەرمەن ءبولىسۋدى باستايدى. سول كەزدە وسى بولجامداردىڭ راستالىپ ءوالۋى دا مۇمكىن.

ايتسا دا، پاريجدەگى قانتوگىستەن رەسەي ارنايى قىزمەتىنىڭ قولتاڭباسىن ىزدەۋگە تاعى ءبىر سەبەپ – ۇقساستىق. «باتاكلان» كونسەرت زالىنداعى لاڭكەستەردىڭ كورەرمەندەردى تۇتقىنعا الىپ، وق جاۋدىراۋى مەن 2002 جىلدىڭ قازانىنداعى «نورد-وست» وقيعاسىنىڭ ۇقساستىعى.

دارحان مۇقان

«قامشى» سىلتەيدى