وسى اپتانىڭ ىشىندە قازاقستاننىڭ ۇلتتىق ۆاليۋتاسى اقش دوللارىنا دەگەن سۇرانىستىڭ اسەرىنەن بىرتىندەپ قۇلدىراي ءتۇسۋى مۇمكىن. بۇل تۋرالى «قامشى» پورتالى Tengrinews.kz-كە سىلتەمە جاساپ حابارلايدى.

"ينفلياسيا بويىنشا وسى اپتادا جاريالانعان امەريكالىق مالىمەتتەرگە بايلانىستى اسا جوعارى قۇبىلمالىلىقتىڭ بولۋى دا مۇمكىن. ەگەر كورسەتكىش باعا قىسىمىنىڭ ودان ارعى ءوسىمىن راستايتىن بولسا، ول ينۆەستورلاردىڭ جەلتوقساندا مولشەرلەمەنى كوتەرۋگە جانە USD پوزيسياسىن نىعايتۋعا جاقسى مۇمكىندىك ەكەنىنە كوزىن جەتكىزەدى، اسىرەسە قاتەرلى ۆاليۋتالارعا قارسى"، - دەدى Forex Club ساراپشىسى الەنا افاناسيەۆا.

ول سونىمەن قاتار، تەڭگە باعامىنىڭ وتكەن اپتادا قانداي بولعانىن ايتتى. "تەڭگە وتكەن اپتا بويى اقش دوللارىنا قارسى پوزيسيانى ۇستاندى، باعام 307،73 تەڭگەمەن جابىلدى. الايدا بۇگىن قايتا كوتەرىلىپ 308،36 تەڭگەگە جەتتى"، - دەدى ول.

تاعى ءبىر ساراپشى اناتوليي احمەتوۆتىڭ ءتۇسىندىرۋى بويىنشا، وتكەن اپتا جەرگىلىكتى نارىق ءۇشىن تىنىش بولدى، شيكىزات نارىعىندا باعا تومەندەپ جاتسا دا، تەڭگە باعامىنىڭ قۇبىلۋى تومەن دەڭگەيدە ساقتالدى. "بۇل جاعداي قازاقستان ۇلتتىق بانكىنىڭ رەپو-مەن كەلىسىم جاساسۋىمەن بايلانىستى بولۋى مۇمكىن، باعامدى رەتتەۋدىڭ مۇنداي شاراسىن ءبىز رەسەي فەدەراسياسىنىڭ ءرۋبلى تاريحىنان كورگەن بولاتىنبىز"، - دەيدى احمەتوۆ.

"الپاري" ساراپشىسى اننا بودروۆانىڭ ايتۋىنشا، امەريكالىق دوللارعا قاتىستى قازاقستاندىق ۆاليۋتانىڭ نىعايا ءتۇسۋى بىرنەشە اپتادا ءبىرىنشى رەت بايقالدى. "KASE بيرجاسىنداعى ەموسيونالدىق شيەلەنىس گرادۋسى تومەندەپ كەلە جاتقانعا ۇقسايدى"، - دەدى مامان.

بودروۆانىڭ مالىمدەۋىنشە، باعام بويىنشا جاڭا اپتاعا ارنالعان بولجامعا اسا ساق بولۋ قاجەت. "دوللار/تەڭگە جۇبى الداعى بەس ساۋدا كۇنىندە 307،20-310،0 تەڭگە ارالىعىندا بولادى. بۇل جەردە اسا قاتتى قۇبىلۋشىلىقتىڭ بولۋ ءقاۋپى بار، "امەريكالىققا" جاھاندىق نارىقتا سۇرانىس كوبەيدى. ەۆرو/تەڭگە 328،60-332،00 شەڭبەرىندە ساتىلادى. بۇل جۇپ 2015 جىلدىڭ 6 قاراشاسىنان باستاپ ەۆروۆاليۋتانىڭ فورەكستەگى السىزدىگى ەسەبىنەن قىسقا مەرزىمدى باسەڭدەيتىن ارناعا ءتۇستى. رۋبل/تەڭگە جۇبى 4،10-4،65 شەڭبەرىندە ساقتالادى"، - دەيدى اننا بودروۆا.

ەسكە سالا كەتەيىك، ۇلتتىق بانكتىڭ جانە ۇلتتىق قوردىڭ التىنۆاليۋتا اكتيۆتەرىن ساقتاۋ ماقساتىندا ۇلتتىق بانك 2015 جىلعى 5 قاراشادان باستاپ ءوزىنىڭ ۆاليۋتا نارىعىنا قاتىسۋىن بارىنشا ازايتۋ تۋرالىشەشىم قابىلدادى. تەڭگەنىڭ ايىرباستاۋ باعامىنىڭ بۇدان بىلايعى سەرپىنى نەگىزىنەن الەمدىك قارجى جانە تاۋار نارىقتارىنداعى باعا احۋالىنىڭ سەرپىنىمەن ايقىندالاتىن فاكتورلاردىڭ اسەرىنەن قالىپتاساتىن بولادى.