امەريكانىڭ حيرۋرگتارى ادامنىڭ بەتىن تولىق اۋىستىرۋ بويىنشا رەكوردتىق كۇردەلى وتا جاسادى.
26 ساعاتقا سوزىلعان وتا بارىسىندا 41 جاستاعى ءورت ءسوندىرۋشى پاتريك حاردينسونعا بەت تىندەرىنىڭ رەكوردتىق سانىن اۋىستىرىپ، ونىڭ ءورت سالدارىنان سيقى بۇزىلعان بەتىن دونوردىڭ بەتىنە اۋىستىردى، دەپ حابارلايدى بي-بي-سي.
2001 جىلى ءورت كەزىندە ءبىر ايەلدى قۇتقارماق بولعان حاردينسوندى كۇردەلى كۇيىكتەر شالعان. بۇل وقيعادان كەيىن ءورت ءسوندىرۋشى كورۋ قابىلەتىنەن دەرلىك تولىق ايىرىلىپ، بەتىنىڭ سيقى بۇزىلعان. سوڭعى 14 جىلدا وعان 71 رەت وتا جاسالعانىمەن، بەتىن بۇرىنعى قالپىنا كەلتىرۋ ارەكەتتەرى ءساتسىز اياقتالدى.
حاردينسوننىڭ بەتىنىڭ دونورى نيۋ-يوركتىڭ 26 جاستاعى سۋرەتشىسى ديەۆيد رودەباۋ بولدى. وتانىڭ الدىندا ءبىر جىل بۇرىن ول اۋرۋحانادا موتوسيكلمەن جارىس كەزىندە العان جاراقاتى سالدارىنان كوز جۇمعان. رودەباۋدىڭ بەتىن وتا ءۇشىن پايدالانىلۋىنا ونىڭ اناسى رۇقسات بەردى.
وتا كەزىندە حيرۋرگتار پاسيەنتتىڭ باس سۇيەگىنىڭ فورماسىن وزگەرتۋگە تۋرا كەلدى. الداعى ۋاقىتتا حاردينسونعا كورۋ قابىلەتى قايتىپ ورالادى.
بۇل - مەديسينادا ادامعا بەت تىندەرىنىڭ وسىنشاما ۇلكەن سانى اۋىستىرىلىپ قوندىرىلعان ءبىرىنشى وقيعا. بەت تىندەرى اۋىستىرىلىپ قوندىرىلعان ءبىرىنشى پاسيەنت - 2005 جىلى فرانسيالىق ازاماتشا يزابەل دينۋار بولدى.
پىكىر قالدىرۋ