تاۋلىكتىك قۋاتتىلىق ءۇش ءجۇز تونناعا دەيىن جەتكىزىلىپ، 200 ادامدى جۇمىسپەن قامتىپ وتىر

«مولپرودۋكت» ج ش س وندىرىستىك قۋاتتىلىعى جاعىنان ورتالىق ازيا اۋماعىندا بالاماسى جوق بىرەگەي كاسىپورىن سانالادى. سەحتاردى جاڭا تەحنولوگيالارمەن جابدىقتاۋدىڭ ناتيجەسىندە ءسۇت ونىمدەرى قازاقستاننان تىسقارى جەرلەرگە دە جىبەرىلەدى. سەرىكتەستىك ديرەكتورى روزا سۇلەيمەنوۆانىڭ ايتۋىنشا، بۇعان دەيىن كۇنىنە 20 توننا ءسۇت وڭدەلىپ كەلسە، قازىرگى كورسەتكىش 300 توننانى قۇرايدى. جۇمىسشى-قىزمەتكەردىڭ سانى ءتورت ەسەگە دەيىن كوبەيىپ، 200-گە جەتكەن. تابىس سىرى نەدە دەگەن ساۋالىمىزعا ول بىلاي جاۋاپ بەردى.

–مەملەكەت تاراپىنان شاعىن جانە ورتا بيزنەس سۋبەكتىلەرىنە جاسالىپ جاتقان قولداۋلارعا سۇيەنە وتىرىپ، باعدارلامالارعا قاتىسۋ مۇمكىندىگىنە يە بولدىق. اتاپ ايتقاندا، «بيزنەستىڭ جول كارتاسى-2020» بويىنشا 3،5 ميلليارد تەڭگە جەڭىلدەتىلگەن نەسيە الىنىپ، كاسىپورىن عيماراتىن قالپىنا كەلتىرۋگە، زاماناۋي قۇرال-جابدىقتار مەن قوندىرعىلار ساتىپ الۋعا، اۆتوپاركتى جاڭارتۋعا جۇمسالدى.

–اينالاسى ءۇش جىل بەدەرىندە قول جەتكەن جەتىستىكتەرىڭىز شىنىندا دا اتاپ وتۋگە تۇرارلىق ەكەن. ءىستى ۋاقىت تالابىنا ساي جاڭاشا ۇيىمداستىرۋ ساپالىق كورسەتكىشتەرگە، ءونىم تۇرلەرىنىڭ كوبەيۋىنە قانشالىقتى ىقپال ەتتى؟

–ەلباسى جولداۋلارىندا ەلىمىزدە ازىق-تۇلىك قاۋىپسىزدىگىن قامتاماسىز ەتۋ مىندەتى قويىلعانى ءمالىم. ءبىزدىڭ تۇپكى ماقساتىمىز باسەكەلەستىك قارىمىن كۇشەيتە وتىرىپ، سىرتقى نارىققا شىعۋ بولعاندىقتان، بۇل جاعىنا ايرىقشا ءمان بەرىلەدى. باسقا سالالارمەن سالىستىرعاندا، تاماق ونەركاسىبىندە اتقارىلاتىن جۇمىستار وتە كۇردەلى. ونىڭ ىشىندە ءسۇت وڭدەۋمەن اينالىسۋ وڭاي شارۋا ەمەس. ءۇزىلىسسىز ەڭبەك ىرعاعىن تۇراقتى قامتاماسىز ەتۋ ءۇشىن، بىرىنشىدەن، شيكىزات قورى جەتكىلىكتى بولۋى كەرەك. ءسۇت اۋدانداردان، ەلدى مەكەندەردەن جينالاتىندىقتان، باسى ارتىق شىعىندارعا بارۋعا تۋرا كەلەدى. اكەلىنگەن ءونىمنىڭ قۇنارلىلىعى تالاپقا سايكەس كەلىپ جاتسا ءبىر ءسارى. ستاندارت بويىنشا اقۋىز مولشەرى كەمىندە 3،0-3،1 بولۋى ءتيىس. ونىڭ دەڭگەيى 2،5-2،6 بولا تۇرا قابىلداۋعا ءماجبۇرمىز. ەكىنشىدەن، تابيعي ءسۇت تەز بۇلىنەتىندىكتەن، جەرگىلىكتى جەرلەردە قابىلداۋ قوسىندارىن اشۋ، الىس اۋىلداردان جەتكىزۋ ءۇشىن ارنايى توڭازىتقىش اگرەگاتتارى بار اۆتوكولىكتەر جەتكىلىكتى بولۋى شارت. ماشاقاتىنىڭ كوپتىگىنە قاراماستان، وزىق تەحنولوگيالاردى كەڭىنەن ەنگىزۋدىڭ ارقاسىندا بۇگىندە ءسۇت ونىمدەرىنىڭ 30-عا جۋىق ءتۇرى شىعارىلادى.

ءبىز كاسىپورىندى ارالاۋ بارىسىندا فرانسيا، گوللانديا، شۆەسيا ەلدەرىنەن اكەلىنگەن قۇرال-جابدىقتاردىڭ تۇگەلدەي اۆتوماتتاندىرىلعان جۇيەمەن جۇمىس ىستەيتىنىنە كوز جەتكىزدىك. وندىرىستىك سەحتار وسەپتيكالىق تاسىلگە كوشىرىلگەلى ونىمدەردىڭ ساپاسىمەن قوسا ساقتالۋ ۋاقىتى دا ۇزارتىلعان. جابىق ىدىستار مەن قۇتىلارعا قۇيىلعان شيكىزاتتى وڭدەۋ كەزىندە باكتەريالار مەن وتتەگى سورىپ الىنىپ، كەرىسىنشە، ادام اعزاسىنا قاجەتتى ميكروەلەنمەنتتەرمەن بايىتىلادى. تابيعي قۇنارىنان اجىراماعان ءسۇت وڭدەلگەننەن كەيىن 40 كۇننەن ءبىر جىلعا دەيىن بۇلىنبەيدى.

بۇگىنگى تاڭدا كاسىپورىن ەلىمىزدىڭ ءار قيىرىنان 18 ساۋدا نۇكتەسىن قۇرىپ، ءوز ونىمدەرىن ساتۋمەن اينالىسادى. ساپا كورسەتكىشى مەن ساقتاۋ مەرزىمىن ۇلعايتۋدىڭ ناتيجەسىندە ەكسپورتتاۋ باعىتىندا دا تىڭ قادامدار كەڭ ءورىس العان. بۇل جونىندە باستى ارىپتەس– رەسەي. ومبى، ءنوۆوسىبىر، كراسنودار، ەكاتەرينبۋرگ، يركۋتسك، دونداعى روستوۆ قالالارىنان تۇسكەن سۇرانىستىڭ كوپتىگى ەسكەرىلىپ، تاعى ءبىر وزىق جوبا ەنگىزىلمەك. ياعني، دايىن ونىمدەردى بۋىپ-تۇيۋگە ارنالعان قوندىرعىنى ورناتۋ ارقىلى تەحنولوگيالىق ۇدەرىستەر ودان ءارى جەدەلدەتىلمەك. سوندا تاۋلىكتىك قۋاتتىلىق 500 تونناعا دەيىن ءوسىپ، 300 ادام جۇمىسپەن قامتىلاتىن بولادى.

سەحتاعى وپەراتور ماماندار ەلباسىنىڭ 2012 جىلى وسىندا ارنايى كەلىپ، جاڭا عيماراتتىڭ تۇساۋىن كەسكەنىن ماقتانىشپەن جەتكىزدى. سودان بەرى يندۋستريالىق-يننوۆاسيالىق دامۋ جولىنا تۇسكەن كاسىپورىن وتاندىق ونىمدەردى سەريالاپ شىعارۋدىڭ تاجىريبەسىنە ابدەن ماشىقتانىپ العان.

– بولاشاقتا بەلارۋس، موڭعوليا ەلدەرىمەن ساۋدا-ساتتىقتى دامىتۋدى ويلاستىرىپ وتىرمىز. عيماراتتا بوس ورىندار بار. ولارعا يوگۋرت، قايماق، بالمۇزداق قوسپاسىن شىعاراتىن جاڭا جەلىلەر ورناتىلاتىن بولادى. ەڭ باستىسى، ءبىلىمدى دە بىلىكتى، كاسىبي شىڭدالعان جاستارعا ۇلكەن سەنىم ارتامىز. جىل وتكەن سايىن ولاردىڭ قاتارى تولىعىپ كەلەدى، – دەيدى «مولپرودۋكت» ءجشس-نىڭ ديرەكتورى ر. سۇلەيمەنوۆا.

دەرەككوز: ەگەمەن قازاقستان