تانىمال ءارتىس بەكجان تۇرىس كورەرمەندەرگە «ۇلىم، ساعان ايتىم...» اتتى مونوسپەكتاكل ۇسىنباق. بۇل تۋرالى «قامشى» پورتالى م. اۋەزوۆ اتىنداعى اكادەميالىق دراما تەاترىنىڭ باسپا ءسوز قىزمەتىنە سىلتەمە جاساپ حابارلايدى.
«اكە – بالاعا سىنشىل»، باۋىر ەتى بالاسىنىڭ قۋراي باسىن سىندىرماس قۋىس كەۋدە بولىپ وسپەي، ەكران ىشىندە ەسىرگەندەرگە ەلىكتەمەي، ۇيادا سىڭىرگەن ۇياتىن ساقتاپ، اۋلەت ابىرويىن اسقاقتاتىپ، الەۋمەتتىڭ جايىن ويلار ازامات بولىپ وسكەنىن قالايدى. ال، بالا قاشان دا جاڭاعا ۇمتىلادى.
اكە مەن بالا اراسىنداعى تارتىستىڭ تامىرلانۋىنان تەك قانا تۇسىنىستىك پەن مەيىرىم عانا ساقتاپ قالادى. ساناعا سىيمايتىن ساۋالدارىنىڭ جاۋابىن جەتەلى بالا ەڭ الدىمەن ارداق تۇتقان اكەسىنىڭ بولمىسىنان تابادى. ادامگەرشىلىك، قايىرىمدىلىق، ەلجاندىلىق، ۇلتىنا قىزمەت قىلۋ دەگەن اردا ۇعىمدار بالاعا تەوريامەن تۇسىندىرىلمەيدى، ءۇي ىشىندە ۇلكەندەردىڭ ۇلگىسىمەن سىڭەتىن ابزال قاسيەتتەر. بۇگىندە ۇلكەن مىنبەرلەردەن بايىبىنا جەتىپ، تەرەڭىنە بويلاماي ايتىلا سالاتىن «ۇلت، ۇلتتىق وي، ۇلتتىق قۇندىلىق» دەگەن كولگىرسۋلەردەن گورى، وسى ءبىر ۇركەك ۇعىمداردى ۇياداعى بالاسىنا ەرتە باستان ۇعىندىرىپ، جوعاتقاندى تۇگەندەپ، باردى باعالاۋعا ۇيرەتەتىن، ءوز ارمانى مەن ماقساتىن ەلدىك مۇراتپەن ۇشتاستىرۋعا ۇندەيتىن اكە تىلەگى مەن كەلەشەگىن كوڭىل تۇكپىرىندە وزگەشە كەيىپتەگەن بالا كوزقاراسى ءارقاشان ساباقتاس بولسا يگى. كەشەگىگە قارايلاۋدان گورى جاڭانىڭ جەتەگىمەن ءجۇرۋدى ءجون كورەتىن، ءبىلىم مەن بىلىككە كوبىرەك سۇيەنگەن بۇگىنگىنىڭ كوشباستار بۋىنىنا يبا مەن يمان قاتار سىڭسە، بىرلىكتى بەرەكەم دەپ تانىسا، قاتاردان قالماسىمىز انىق.
ەردىڭ جاسى 50-گە كەلىپ جاتقان تەاتردىڭ تالانتتى ءارتيسى، ساحنا سايىپقىرانى بەكجان تۇرىس ۇلت دەگەندە ۇلاعاتتى ءسوز ايتۋعا ۇمتىلاتىن سەرگەك ويلى ازاماتتاردىڭ ءبىرى رەتىندە، «ۇلىم، ساعان ايتام» اتتى مەرەيتويلىق مونوسپەكتاكل وتكىزىپ، بالاسى ماعجان ەكەۋى مارتەبەلى كورەرمەنىنە ماعىنالى كەش سىيلايدى. ونەر قونعان جۇرەگىنىڭ شىرىلى ازاماتتىق كوزقاراسى بولىپ ايقىندالعان بەكجان بۇل كەشىن انمەن ادىپتەپ، جىرمەن كومكەرىپ، قادىرىنە بويلاعان قازاعىن ماعجان ەكەۋى قايىرا ءبىر سەرپىلتپەك. كەش م.اۋەزوۆ اتىنداعى اكادەميالىق دراما تەاترىندا 6 جەلتوقسان كۇنى وتپەك.
