قازاقستاندا «حالىق ماركاسى-2016» جوباسى باستالدى. بۇل تۋرالى بۇگىن ق ر پرەزيدەنتى جانىنداعى ورتالىق كوممۋنيكاسيالار قىزمەتىندەگى بريفينگتە «حالىق ماركاسى» جوباسىنىڭ جەتەكشىسى ريمما تاجىبايەۆا ءمالىم ەتتى، - دەپ حابارلايدى «قامشى» پورتالى قازاقپاراتقا سىلتەمە جاساپ.

«ءبىزدىڭ ماقساتىمىز الەمدىك ارەنادا قازاقستاندا جاسالعان  ونىمدەردى كورسەتۋ بولاتىن. سوندىقتان «حالىق ماركاسى-2016» بايقاۋىن  برازيليادا وتەتىن جازعى وليمپيادا ويىندارىنا ورايلاستىرماقپىز.  بۇل كونكۋرسقا سول وليمپيادادا ونەر كورسەتەتىن بارلىق سپورتشىلارىمىز بەلسەنە قاتىسىپ، بارلىعى دا ءوز وڭىرلەرىندە شىعارىلاتىن  تاۋارلاردى جارنامالايتىن بولادى. ال «حالىق ماركاسى» كونكۋرسىنىڭ جەڭىمپازدارىن ريو-2016 وليمپياداسى كەزىندە اشىلاتىن قازاقستاننىڭ قوناقجاي ۇيىندە ماراپاتتايمىز»، - دەدى ول.

ونىڭ اتاپ وتۋىنشە، بايقاۋعا قاتىسۋشىلاردىڭ ءوتىنىشى بويىنشا كونكۋرس مەرزىمىنەن ەرتە باستالىپ وتىر.

«بۇگىننەن باستاپ «حالىق ماركاسى-2016» جوباسى باستالادى. ول اقپان ايىنىڭ سوڭىنا دەيىن جالعاسادى.  ءبىرىنشى كەزەڭدە بارلىق وڭىردەن ازىق-تۇلىك وندىرۋشىلەرىن، فەرمەرلەرىن وسى بايقاۋعا قاتىسۋعا شاقىرامىز. ال ناۋرىز ايىنان مامىر ايىنىڭ ورتاسىنا دەيىن حالىقتىق داۋىس بەرۋ شاراسى جۇرگىزىلەدى.  وسىلايشا بايقاۋعا قاتىساتىن 300 كومپانيانىڭ ىشىنەن ۇزدىك 50-60 كاسىپورىن ىرىكتەپ الىنىپ، ولاردىڭ اتتارى مامىر ايىندا بەلگىلى بولدى. ودان كەيىن تامىز ايىنا دەيىن جەڭىمپاز كومپانيالارعا ريو وليمپياداسىندا وتەتىن ۇلكەن كورمەگە دايىندالۋعا ۋاقىت بەرىلەدى»، - دەدى ر.تاجىبايەۆا.