تۇرىكتىڭ اتاقتى ويشىلى، يسلام عالىمى فەتۋللاح گۇلەن، 13 قاراشا كۇنى فرانسيا استاناسى پاريجدە ورىن العان جارىلىستى قاتال سىنعا الىپ، كوڭىل ايتۋ حاتىن جاريالادى. ف.گۇلەن ءوز حاتىندا كەز كەلگەن تەررورلىق ارەكەت قاي جەردە جانە قانداي ماقساتپەن ۇيىمداستىرىلسا دا، ادامزات ءۇشىن اسا ءقاۋىپتى ءارى ۇلكەن كۇنا ەكەندىگىن جازعان. بۇل تۋرالى «قامشى» پورتالى Cihan.com.tr–گە سىلتەمە جاساپ حابارلايدى.

 « ....  13 قاراشا، جۇما كۇنى كەشكىلىك پاريجدە ورىن العان قايعىلى وقيعاعا ءوز كوڭىلىمدى بىلدىرەمىن. قاي جەردە جانە كىمدەر تاراپىنان ۇيىمداستىرىلسا دا  كەز كەلگەن تەررورلىق ارەكەت تىنىشتىقتىڭ ىرگەسىن سوگىپ، بەيبىت تۇرعىنداردىڭ بەرەكەسىن كەتىرەدى. وسىعان سايكەس، فرانسيادا بولعان تەررورلىق ارەكەت، تەك قانا فرانسۋز حالقىنا ەمەس، جالپى ادامزاتقا جاسالعان، ادامي قۇندىلىقتارعا جاسالعان قيانات»، -  دەپ جازعان ءوز حاتىندا ف.گۇلەن.

ماسەلەنىڭ ءمان جايىن اشىپ جازار بولساق، وتكەن اپتادا فرانسيادا تەررورلىق ارەكەت ورىن العان بولاتىن. سوڭىنان بەلگىلى بولعانداي، 130-دان استام جازىقسىز جانداردىڭ ءومىرىن جالماعان پاريجدەگى تەرروريست-سودىرلارلاردىڭ قولىمەن جۇزەگە اسىرىلعان جارىلىستى يشيم ۇيىمى ءوز موينىنا العان بولاتىن.

«قانداي سەبەپپەن جانە قانداي ماقساتتا ۇيىمداستىرىلسا دا، ەشقانداي دا تەررورلىق ارەكەتتەردىڭ اقتالمايتىندىعىنا تاعى دا نازار اۋدارتامىن. جازىقسىز جانداردىڭ اجال قۇشۋلارىنا سەبەپ بولعان بارلىق تەررورلىق ارەكەتتەرگە لاعنەت بولسىن!

قۇربان بولعانداردىڭ وتباسىلارىنا، جاقىندارىنا جانە فرانسيا حالقىنا قايعىلارىنا ورتاقتاسىپ، كوڭىل ايتامىن.

ۇلى جاراتۋشىمىز بارلىق ادامزاتتى بەيبىتشىلىك پەن تىنىشتىقسىن دەپ تىلەيمىن. بارشا جاندى دا وسىعان تىلەكتەس بولۋعا شاقىرامىن»، -  دەپ بىتىرگەن ءسوزىنىڭ سوڭىن يسلام عۇلاماسى. «مۇسىلماننىڭ تەرروريست بولۋى مۇمكىن ەمەس، تەرروريست تە مۇسىلمان بولا المايدى»، -  دەپ الەمدە تەرروريزمگە ورىن جوق ەكەندىگىن ايتۋدان تانباي، تەرروريزمدى تۇبىمەن قۇرتۋعا ۇندەپ كەلگەن عالىمنىڭ بۇل حاتى نازاردان تىس قالمادى.

باۋىرجان كاريپوۆ