ساياساتتانۋشىلار مەن بىلىكتى ساراپشىلار بيلىك پەن قاراشا حالىقتىڭ اراسى الشاقتاپ كەتكەنىن ءجيى ايتادى. شىنىندا دا قاراپايىم حالىقتىڭ بيلىكتە، ال بيلىكتىڭ حالىقتا شارۋاسى جوق. مۇنى، كۇنى كەشە، ۇكىمەت مۇشەلەرىمەن كەزدەسكەن مەملەكەت باسشىسى نۇرسۇلتان نازاربايەۆتا ايتتى. پرەزيدەنتتىڭ ويىنشا اتقامىنەرلەر داعدارىس پەن قىمباتشىلىق تۋرالى ەلگە قاراپايىم تىلمەن، دۇرىستاپ ءتۇسىندىرۋ جۇمىستارىن جۇرگىزۋ كەرەك. الايدا، باقىتتى باسشىلار باقىتسىز حالقىنىڭ تاعدىرىنا باس قاتىرىپ وتىرعان جوق.
مەملەكەت باسشىسى نۇرسۇلتان نازاربايەۆ كارىم ءماسىموۆ باسقاراتىن مينيسترلەر كابينەتىنىڭ مۇشەلەرىن اقوردادا قابىلداپ، ەلىمىزدىڭ ەكونوميكالىق جاعدايىن تالقىلادى. پرەزيدەنتتىڭ القالى جيىن وتكىزىپ، اتقامىنەرلەرگە اۋىر مىندەت ارتقانىنا قاراپ الەۋمەتتىك جاعدايمىزدىڭ ءماز ەمەس ەكەندىگىن انىق اڭعارۋعا بولادى. الايدا، ءبىزدىڭ كەيبىر باسشىلار وزدەرىنىڭ جاعدايى جاقسى بولعانعا قاراپ «ءبارى كەرەمەت» دەپ ويلايتىن بولسا كەرەك. ماسەلەن پرەزيدەنت مادەنيەت جانە سپورت ءمينيسترى ارىستانبەك مۇحامەديۇلىنا:
– كۇنى كەشە قازاق حاندىعىنىڭ 550 جىلدىعىن اتاپ وتتىك قوي. ارىستانبەك، ايتىڭدارشى، 550 جىلدىڭ ىشىندە، قازاق ءدال وسىلاي ءبىر كۇن ءومىر ءسۇردى مە؟
– ەندى، نۇرسۇلتان ءابىش ۇلى، شىنىن ايتقاندا باقىتتى كەزدە ءومىر ءسۇرىپ جاتىرمىز عوي.
– سەن سۇراعىما جاۋاپ بەرسەڭشى؟
– تاۋەلسىزدىكتىڭ ارقاسىندا، ءسىزدىڭ ارقاڭىزدا...
پرەزيدەنتتىڭ توسىننان قويعان سۇراعىنا ارىستانبەك مۇحامەدي ۇلى ماندىرتىپ جاۋاپ بەرە المادى. ويتكەنى، ونىڭ باسى باقىتتان اينالىپ وتىرعان بولاتىن. الايدا، ءمينيستردىڭ باقىتتان باسى اينالاتىنداي جاعدايمىز جەتىسىپ تۇرما؟ ماسەلەن، تەڭگە قۇنسىزدانىپ، دوللار شارىقتاعاننان كەيىن ازىق-تۇلىك باعاسى كۇرت قىمباتتاپ كەتتى. ءتىپتى، حالىق كۇندەلىكتى تۇتىناتىن نان باعاسى كوتەرىلدى. سونداي-اق، جاڭا جىلدان كەيىن اس اتاسى تاعى دا اسپاندايىن دەپ وتىر. بۇل از بولعانداي، جۇمىستان قىسقارتۋ ناۋقانى جۇرگىزىلىپ جاتىر. بۇل - بيىل بولىپ جاتقان جايلار. ساراپشىلار كەلەر جىلى جاعدايىمىز بۇدان دا قيىن بولاتىنىن ايتادى. الايدا، وسىنداي قيىندىقتارعا قاراماستان ارىستانبەك مۇحامەدي ۇلىنىڭ باسى باقىتتان اينالىپ ءجۇر.
ارينە، حالىقتىڭ الەۋمەتتىك جاعدايىنا مادەنيەت جانە سپورت ءمينيسترى جاۋاپ بەرمەيدى. سوندىقتان، ارىستانبەك مۇحامەدي ۇلىنىڭ ءوز سالاسىنا قاتىستى ماسەلەنى ايتايىق. مىسالى، جىل باسىندا مينيسترلىك قازاق حاندىعىنىڭ 550 جىلدىعىنا ارنالعان 20 سەريالى فيلم تۇسىرەتىنىن مالىمدەدى. الايدا، قارجى تاپشىلىعىنا بايلانىستى 20 سەريالى فيلم 10 سەرياعا قىسقاردى. اتالعان تەلەسەريالدى مينيسترلىك جىلدىڭ سوڭىنا دەيىن كورەمەننىڭ نازارىنا ۇسىناتىنىن مالىمدەگەن بولاتىن. الايدا قارجى ماسەلەسى تەز شەشىلمەگەننەن كەيىن قازاق حاندىعىنا ارنالعان فيلم كەلەر جىلى كورسەتىلەتىن بولدى. راس، اتالعان ءفيلمدى تۇسىرۋدە قارجى تاپشىلىعىنان بولەك ۋاقىت تاپشىلىعى ايتارلىقتاي ءرول اتقاردى. ويتكەنى، مۇنداي اۋقىمدى شارۋانى جاساۋ ءۇشىن 2-3 جىل ۋاقىت كەرەك ەدى. دەگەنمەن، ەڭ باستى سەبەپ جوباعا بولىنگەن 1 ميلليارد تەڭگە جەتپەي وتىرعاندىعى بولىپ وتىر. سوندىقتان، ءفيلمدى قارجىلاندىرۋعا ارنالعان قور قۇرىلىپ، ەل ازاماتتارىنا ساۋىن ايتىپ وتىر. ال ارىستانبەك مۇحامەدي ۇلىنىڭ باسى باقىتتان اينالىپ ءجۇر.
جالپى، باقىتتان باسى اينالىپ جۇرگەن جالعىز ارىستانبەك مۇحامەدي ۇلى عانا ەمەس. ماسەلەن، جۋىردا ۇكىمەت باسشىسى كارىم ءماسىموۆ «ءبىز ەڭ جاقسى كەزەڭدە ءومىر ءسۇرىپ جاتىرمىز» دەگەن بولاتىن. ونىڭ ايتۋىنشا، جاقسى باستامالار، ۇلكەن جۇمىستار داعدارىس كەزىندە ىسكە اسىرىلادى. ورىندى ءسوز. الايدا بۇل تاماشا مۇمكىندىكتى قاراشا حالىق ەمەس باي-باعلاندار پايدالانادى ەمەس پە؟ مىنە، وسىدان-اق قاراپايىم حالىق پەن بيلىكتىڭ اراسى اشىلىپ كەتكەنىن انىق بىلۋگە بولادى.
سەرىك جولداسباي
استانا
پىكىر قالدىرۋ