2015 جىلعى رەسپۋبليكالىق بيۋدجەت شىعىستارى 66،5 ملرد تەڭگەگە قىسقاراتىن بولادى. بۇل تۋرالى بۇگىن ماجىلىستە «2015-2017 جىلدارعا ارنالعان رەسپۋبليكالىق بيۋدجەت تۋرالى» زاڭىنا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىنىڭ تانىستىرىلىمى بارىسىندا ق ر ۇلتتىق ەكونوميكا ءمينيسترى ەربولات دوسايەۆ مالىمدەدى، - دەپ حابارلايدى «قامشى» پورتالى قازاقپاراتقا سىلتەمە جاساپ.

«ماكروەكونوميكالىق كورسەتكىشتەردىڭ ناقتىلانعان بولجامى نەگىزىندە 2015 جىلعا ارنالعان رەسپۋبليكالىق بيۋدجەت پارامەترلەرىنىڭ بولجامى ناقتىلاندى. بۇل رەتتە رەسپۋبليكالىق بيۋدجەت كىرىستەرى (ترانسفەرتتەردى ەسەپكە الماعاندا) 2015 جىلى 3 174،2 ملرد. تەڭگە مولشەرىندە باعالانىپ وتىر، بۇل بەكىتىلگەن جوسپاردان 45،8 ملرد. تەڭگەگە تومەن. كىرىستەردىڭ نەگىزگى ازايۋى كورپوراتيۆتىك تابىس سالىعى بويىنشا 183،5 ملرد. تەڭگەگە جانە ەۋرازيالىق ەكونوميكالىق وداققا مۇشە  ەلدەردەن تۇسەتىن ءارى بولىنەتىن كەدەندىك باجدار بويىنشا 50،3 ملرد. تەڭگەگە كۇتىلۋدە»، - دەيدى ەربولات دوسايەۆ.

ونىڭ ايتۋىنشا،  اقش دوللارىنىڭ ورتاشا جىلدىق ەسەپتىك باعامىنىڭ ۇلعايۋىنا بايلانىستى، مۇنايعا ەكسپورتتىق كەدەندىك باجدار تۇسىمدەرىنىڭ 70،7 ملرد. تەڭگەگە جانە اسكەري پوليگوندار مەن «بايقوڭىر» كەشەنىن پايدالانعانى ءۇشىن جالداۋ اقىسىنىڭ 5،8 ملرد. تەڭگەگە ۇلعايۋى بولجانادى.

«رەسپۋبليكالىق بيۋدجەت تاپشىلىعى 1 257،7 ملرد. تەڭگە مولشەرىندە (2014 جىلعى بيۋدجەت قاراجاتىنىڭ 1،2 ملرد. تەڭگە سوماسىنداعى تارتىلعان قالدىقتارىن ەسكەرە وتىرىپ) نەمەسە جىو-گە قاتىستى 3،0 % دەڭگەيىندە ساقتالدى. 2015 جىلعا ارنالعان رەسپۋبليكالىق بيۋدجەت شىعىستارى بەكىتىلگەن مولشەرگە قاتىستى 66،5 ملرد. تەڭگەگە ازايتىلا وتىرىپ، 7 179،2 ملرد. تەڭگە كولەمىندە بولجانىپ وتىر»، - دەدى مينيستر.