دايش ەكسترەميستىك ۇيىمىنىڭ سودىرلارى قوقان-لوقى كورسەتىپ، كەزەكتى ۆيدەونى تاراتتى. بۇل تۋرالى «قامشى» پورتالى tengrinews.kz-كە سىلتەما جاساپ حابارلايدى.

سودىرلاردىڭ ۇندەۋى جازىلعان ۆيدەونى Fox News تەلەارناسى تاراتتى.

ول ۆيدەودا لاڭكەستەر اقش-تىڭ اق ءۇيىن جارىپ جىبەرۋگە نيەتتى ەكەندەرىن ايتادى.

تەلەارنانىڭ مالىمەتىنشە، ۆيدەودا ەكى ەر ادام اقش-قا قوقان-لوقى تانىتىپ، "فرانسيا ءبىرىنشى بولدى، ۆاشينگتون كەلەسى بولادى"، دەدى. تەلەارنا سول ۆيدەو فراگمەنتتەرىنىڭ ءبىرىن كورسەتتى. بۇل كادردان ساقالدى ەر ادامدى كورۋگە بولادى، قولىندا اۆتوماتى بار. ول اقش-قا ۇندەۋ سالىپ، اق ءۇيدى جاراتىندارىن ايتتى. تەلەارنانىڭ مالىمەتىنشە، ءماتىندى تاياۋ شىعىس بويىنشا امەريكالىق ماماندار اعىلشىن تىلىنە اۋدارعان.

سونىمەن قاتار، تەلەارنا بۇل ۆيدەونىڭ ءتۇپنۇسقالىلىعىنىڭ تەكسەرىلىپ جاتقانىن حابارلادى. 

ەسكە سالا كەتەيىك، 14 قاراشاعا قاراعان ءتۇنى پاريجدە بەلگىسىز بىرەۋلەر ەڭ الدىمەن قالاداعى مەيرامحانالاردىڭ بىرىنە شابۋىل جاسادى. سونىمەن قاتار، فرانسيا-گەرمانيا ماچى ءوتىپ جاتقان "ستاد دە فرانس" ستاديونىنىڭ ماڭىنان دا جارىلىستىڭ دىبىسى ەستىلدى. لاڭكەستەر "باتاكلان" تەاترىندا ادامداردى كەپىلگە الدى. سوڭعى دەرەك بويىنشا، 129 ادام قازا تاۋىپ، 300 ادام جاراقاتتاندى. جەتى لاڭكەستىڭ كوزى جويىلدى. پوليسيا قىلمىسقا قاتىسى بارلار مەن ۇيىمداستىرۋشىلاردى ىزدەستىرىپ جاتىر.