الماتىدا وتەتىن 2017 جىلعى قىسقى ۋنيۆەرسيادا بيۋدجەتى ەكى ەسەگە قىسقارتىلدى. بۇل تۋرالى «قامشى» پورتالى Tengrinews.kz –كە سىلتەمە جاساپ حابارلايدى.
ۋنيۆەرسيادا بيۋدجەتىندەگى وزگەرىستەر تۋرالى شاراعا دايىندىق بارىسى اياسىنداعى وتاندىق ءونىم وندىرۋشىلەردىڭ ىنتىماقتاستىق فورۋمى كەزىندە ۇيىمداستىرۋ كوميتەتىنىڭ ديرەكتورى اسەت ابدۋالييەۆ ايتتى.
ونىڭ ايتۋىنشا، بيۋدجەتتىڭ قىسقارۋىنا بايلانىستى ۇيىمداستىرۋ كوميتەتى 32 ميلليارد تەڭگەدەن قىسقارتۋ جاسادى. "سوڭعى ايدا ۋنيۆەرسيادا بيۋدجەتى ەكى ەسەگە، 17 ميللارد تەڭگەگە دەيىن قىسقاردى. ءبىز سپورتقا قاتىسى جوق بىرنەشە شىعىندى قىسقارتتىق. ەڭ الدىمەن، ۋنيۆەرسيادانىڭ اشىلۋ جانە جابىلۋ سالتاناتىنا بولىنگەن قاراجات 1،2 ميللارد تەڭگەگە قىسقارتىلدى. اشىلۋ، جابىلۋ سالتاناتى بولادى، دەگەنمەن قىسقارعان فورماتتا وتەدى"، - دەدى ابدۋالييەۆ.
ۇيىمداستىرۋ كوميتەتىنىڭ مالىمەتىنشە، "ۋنيۆەرسيادا مادەنيەتى" جوباسى، حالىقارالىق PR جانە ماركەتينگكە 1،5 ميللارد تەڭگەگە قىسقارتۋ جاسالدى. ءبىر ميلليارد تەڭگە كولىك شىعىندارىنان قىسقارتىلدى. "كولىكتەردى ساتىپ المايمىز، جالعا الاتىن بولدىق. شارانىڭ دايىندىعىن كورۋگە بولىنگەن قاراجاتتى 500 ميلليون تەڭگەگە قىسقارتتىق"، - دەدى ديرەكتور.
ايتا كەتەيىك، ەندى شارا 53 ميلليون ەۆروعا وتكىزىلگەلى وتىر. سالىستىرا كەتسەك، ۋنيۆەرسيادا-2011 وتكىزۋ ءۇشىن تۇركيا 83 ميلليون ەۆرو جۇمسادى، قىتايدا 2009 جىلى 105 ميلليون ەۆرو جۇمسالدى، ال 2013 جىلى 500 ميلليون ەۆرو جۇمسالدى.
"اكىمدىك بىزگە ءۇش ناقتى تاپسىرما بەردى. ءبىرىنشىسى - ۋنيۆەرسيادانى جوعارعى دەڭگەييدە وتكىزۋ. ەكىنشىسى - قاراجاتتى بارىنشا ۇنەمدەۋ. ياعني، وسى بولىنگەن بيۋدجەتتى ءبىز ۇنەمدەۋگە تىرىسامىز. ءۇشىنشى تاپسىرما - ءىرى كورپوراتيۆتى دەمەۋشىلەردى تارتۋ ارقىلى بيلەت جانە ليسەنزيالانعان ونىمدەردى ساتۋ"، - دەپ ءسوزىن اياقتادى اسەت ابدۋالييەۆ.
الماتى اكىمى باۋىرجان بايبەكتىڭ ايتۋىنشا، ۋنيۆەرسيادا حالىقارالىق ستاندارتتارعا سايكەس وتكىزىلەدى. "مىندەتتى تۇردە ورىندالۋى ءتيىس تالاپتار بار. بۇل - FISU (ستۋدەنتتىك سپورتتىڭ حالىقارالىق فەدەراسياسى). ءبىز قۇنى جاعىنان ەڭ تومەنگى ستاندارتتاردى الدىق. ساتىپ العانشا، كەيدە جالعا العان دۇرىس. ەكسپو-عا الىنعان زاتتاردى پايدالانامىز. دەگەنمەن ول حالىقارالىق ستاندارتقا سايكەس بولادى"، - دەدى ب. بايبەك.
پىكىر قالدىرۋ