الماتى سىرتىنداعى قاتتى تۇرمىستىق قالدىقتار توگىلەتىن قوقىس پولوگونىن بىرنەشە ءجۇز ادام تۇراقتى تۇرمىس ورنىنا اينالدىرعان. بۇل تۋرالى "قامشى" پورتالى nur.kz -كە سىلتەمە جاساي وتىرىپ حابارلايدى.

ولار كوبىنەسە الماتى قالاسىنىڭ سىرتىنداعى ەكى ۇلكەن قوقىس پوليگونىن پانالايدى ەكەن.

قالدىق توگەتىن ايماق قاتتى كۇزەتىلەدى، جۋرناليستەردىڭ كىرۋىنە، ءتىپتى تيىم سالىنعان. سوندىقتان دا ءبىز قوقىس تاسيتىن كولىكتەرگە اۋىسىپ وتىرىپ، پوليگوننىڭ باسىنان ءبىراق شىقتىق. پوليگوننىڭ ءىشى كەڭ، توبەسى اشىق بولعانىمەن، تازا اۋا جوق دەسە دە بولادى. ات شاپتىرىم اۋماقتىڭ ءبارى قوقىسقا تولىپ جاتقاندىقتان، ءيىسى قولقاڭدى قاۋىپ، دەمالۋدان قالاسىڭ.

ءاربىر 5 مينۋت سايىن مۇندا قوقىس تولى كاماز كەلەدى. سونى جۇزگە تارتا ادام كۇتىپ الىپ، اقتارۋدا. ءتىپتى، كەيبىر قۇنىققاندارى كولىكتىڭ توبەسىنە شىعىپ، قوقىستىڭ ىشىندە بىرگە ءجۇزىپ ءجۇر. بەت-اۋىزدارىن تۇمشالاپ العانداردىڭ بىر-ەكەۋىن سوزگە تارتقان ەدىك قازاق تىلىنە شورقاق، شەتەلدىك ازامات ەكەندىكتەرىن ايتتى.

گۇلفايرۋز – قىرعىزستان ازاماتى. “مۇندا وتباسىمىزبەن تۇرىپ جۇمىس جاسايمىز. ۋاقىتشا عوي”، – دەپ مويىندايدى ءوزى.

“كۇنىنە قانشا اقشا تاباسىزدار؟”، – دەگەن ساۋالعا: “بولادى سول. جەتەدى ىشىپ-جەگەنگە. باسقا ەشتەڭە سۇراماي-اق قويىڭىز. “قوجايىن” ۇرسادى”، – دەدى گۇلفايرۋز.

پوليگون كۇزەتشىلەرى «قوقىس تەرەتىن ازاماتتار كورشى اۋىلدان كەلگەن جەرگىلىكتى تۇرعىندار» دەپ بوي بەرمەيدى. ال، ولاردىڭ قوجايىنى جوق. ءوز ەرىكتەرىمەن كەلىپ جەكە باسىنىڭ قامى ءۇشىن جۇمىس جاساپ ءجۇر ەكەن.

مۇندا توگىلگەن قوقىستى جۇمىسشىلار ءوز كومانداسىنا قاراي ءبولىپ الادى. ءبىرى – پلاستماسسالىق بۇيىمدار مەن شولمەكتەر، ەكىنشىسى – كارتون قاعازى مەن تەمىر-تەرسەك، ال ءۇشىنشى توپ ومىرگە كەرەكتى زاتتاردى تەرۋمەن اينالىسادى.

ايتۋلارىنشا، الماتىلىق ارنايى كومپانيا قىزمەتكەرلەرى كەلىپ، ءبىر قاپ تولى پلاسماسسانى ءجۇز تەڭگەگە ساتىپ الادى. ال، كارتون قاعاز تەرەتىندەر ءۇشىن كۇندىك اقى بەس ءجۇز تەڭگەدەن جوعارى تولەنەدى. مەتالداردى دا سولاي ارزان باعاعا وتكىزىپ تۇرادى.

«قارعا ادامدار» دەگەن اتتى بۇل ازاماتتارعا قوقىس تاسۋشىلار قويعان. سەبەبى، قارا كيىممەن قوقىسقا ۇيمەلەپ، ءبىر بوتەلكە ءۇشىن ءبىر-بىرىن ولتىرۋگە دەيىن باراتىن ادامداردىڭ ءىسىن باسقاشا ايتۋ مۇمكىن ەمەس دەيدى جۇرگىزۋشى ەرلان.

«قوقىس توگىپ جاتىپ قورقاسىڭ، بىرەۋىن باسىپ كەتەم بە دەپ. ال بۇلار قالدىق ءۇشىن ولۋگە بار. قوي دەپ ايتىپ شارشادىق. اراققا تويىپ الىپ، قولدارىندا پىشاق، كەتپەن سەكىلدى تەمىر قارۋمەن جۇرەدى. ءبىر-بىرىن ايامايدى. ءقازىر كۇن سۋىتىپ، بالالار كورىنبەيدى. جاز كەزىندە ءبىر جاسقا تولعان cابيدەن باستاپ ءبارى جۇرەدى. مىنا پوليگوننىڭ ارتىنا قوقىستان ءۇي تۇرعىزىپ العان. سوندا قىسى-جازى تۇرادى. وسىندا ايەلدەرى تۋىپ جاتادى، كەيبىرى اۋرۋدان ءولىپ جاتادى. ءبىراق سىرتقا شىقپايدى»، – دەدى ول.

راسىندا دا قوقىس تەرۋشىلەردىڭ اراسىنان ەگدە تارتقانداردى كورە المادىق. باسىم كوپشىلى – 20 مەن 45 جاس ارالىعىنداعىلار.

اراعا اپتا سالىپ، الماتى وبلىستىق كوشى-قون پوليسيا قىزمەتكەرلەرىمەن «قارعا ادامدار قالاشىعى» دەپ اتالاتىن قوقىس پوليگونىنان ءسال ارىدا ورنالاسقان مەكەنگە كەلدىك. مۇندا ءجۇز ەلۋدەن استام لاشىق تۇر. بارلىعى – كيىز، پالاتكا سىندى ماتەريالداردىڭ جۇرناقتارىمەن جىلىلانىپ جاسالىنعان.

كەيبىرى قۇددى ءبىر جاتاقحانا سەكىلدى، بىر-بىرىنە جاپسارلاسا سالىنعان. ەشبىرىندە تەرەزە جوق، قوقىستان تۇرعىزىلعاندىقتان، جاپالارعا كىرۋدىڭ ءوزى قورقىنىشتى.

ءتارتىپ ساقشىلارىنىڭ كەلەتىنىن الدىن-الا بىلگەن بولۋ كەرەك، تۇرعىندار تۇندەلەتىپ ۇيلەرىن تاستاپ قاشىپ كەتكەن. كەيبىرى – اسىققاندارى سونشا، كەشكى استارىن ىشپەگەن، ال كەيبىرى – لاشىقتارىن قۇلىپتاماعان دا.

مۇندا دا ادامدارعا ەش جاعداي جاسالماعان. تىم قۇرىماعاندا قول جۋاتىن تازا سۋ جوق. ءبىراق ءتورت جۇزگە تارتا تۇرعىن بۇل تاۋقىمەتكە دە كوندىگىپ، تىرشىلىك ەتەدى.

جالپى سانيتار ماماندار قوقىس پوليگوندارىندا قوقىس تەرۋگە رۇقسات بەرمەيدى. سەبەبى، مۇندا بارلىعى لاس بولعاندىقتان ءتۇرلى اۋرۋ جۇقتىرىپ، ادامدار جازىلماس دەرتكە دۋشار بولۋى مۇمكىن.

سوندىقتان دا زاڭسىز كاسىپپەن اينالىساتىنداردىڭ كوپشىلىگى ەكى قولىنا ءبىر كۇرەك تاپپاعاندار. ولار قاقاعان ايازدا دا، اپتاپ ىستىقتا دا وسى جابىق الاڭنان شىقپاي كاسىپ ەتىپ، جان باعۋعا ءماجبۇر.