رەسەيدەگى ءىرى تۋريستىك وپەراتورلاردىڭ ءبىرى – “ناتالي تۋرس” كومپانياسى تۇركيا رەسەيلىك سۋ-24 ۇشاعىن اتىپ تۇسىرگەننەن كەيىن 24 قاراشادان باستاپ تۇركياعا تۋريستىك جولداما ساتۋدى توقتاتاتىنىن حابارلادى. بۇل تۋرالى "قامشى" پورتالى "ازاتتىققا" سىلتەمە جاساي وتىرىپ حابارلايدى.

كومپانيا رەسەي مەن بۇرىنعى سوۆەتتىك رەسپۋبليكالارداعى فيليالدارىندا “تۇراقسىز ساياسي جاعدايعا” بايلانىستى تۇركياعا تۋريستەر جىبەرۋدى توقتاتاتىنىن مالىمدەدى. “ناتالي ءتۋرستىڭ” سايتىندا قازاقستان، ۋكراينا جانە بەلارۋستە دە تۇركياعا تۋريستىك قىزمەت كورسەتۋ توقتاعانى ايتىلعان.

وتكەن جىلى تۇركياعا رەسەيدەن 4،5 ميلليون تۋريست بارعان. بۇل – تۇركياعا جىل سايىن باراتىن جالپى تۋريستەر سانىنىڭ 12 پايىزىن قۇرايدى.

تۇركيا 24 قاراشادا سيريامەن شەكارادا ەلدىڭ اۋە كەڭىستىگىن بۇزدى دەپ رەسەيلىك سۋ-24 اسكەري ۇشاعىن اتىپ تۇسىرگەن. ءبىراق ماسكەۋ ۇشاق تۇركيا شەكاراسىن بۇزعانىن جوققا شىعارىپ، ونىڭ سيريا اۋماعىندا قۇلاعانىن ايتادى.

رەسەي پرەزيدەنتى ۆلاديمير پۋتين ۇشاقتى اتىپ ءتۇسىرۋدىڭ رەسەي-تۇركيا قارىم-قاتىناسىنا كەرى اسەر ەتەتىنىن مالىمدەگەن. سىرتقى ىستەر ءمينيسترى سەرگەي لاۆروۆ 25 قاراشاعا جوسپارلاعان تۇركياعا ساپارىنان باس تارتتى.