استانادا كوكتايعاققا بايلانىستى دابىلدى ەسكەرتۋ جاريالاندى. قالالىق كوممۋنالدىق قىزمەتتەر جولداردى قاتىپ قالعان مۇزدان تازارتۋدا. وسى كۇنگە دەيىن قالا بويىنشا 305 م3 قۇم-تۇز قوسپاسى توسەلگەن. بۇل تۋرالى "قامشى" پورتالى astana.gov.kz-كە سىلتەمە جاساي وتىرىپ حابارلايدى.

قازىرگى كەزدە قالا بويىنشا قار جيناۋ جۇمىستارىنا 2260 جۇمىسشى، ونىڭ ىشىندە «الماتى» اۋدانىندا - 1171، «ەسىل» اۋدانىندا - 491 جانە «سارىارقا» اۋدانىندا - 598 جۇمىسشى تارتىلدى. قالا بويىنشا 37 قۇم سەبەتىن، 87 تروتۋار جيناۋعا ارنالعان ماشينا، جالپى كوشەلەردى جيناۋعا 700 كوممۋنالدىق تەحنيكا بىرلىگى جۇمىلدىرىلدى. 

استانا قالاسى دەنساۋلىق ساقتاۋ باسقارماسىنىڭ مالىمەتتەرى بويىنشا، تاۋلىك ىشىندە 252 ادام دارىگەرلەردىڭ كومەگىنە جۇگىنگەن، سونىڭ ىشىندە 126-سى كوشەدە قۇلاپ، جاراقات العان. تۇرمىستىق جاراقات العاندار سانى - 44، اياق-قولى سىنىپ، شىعىپ، بۋىن تايىپ كەتكەندەردىڭ جانە ت.ب. سانى - 65.

ەلوردالىق مەديسينالىق مەكەمەلەر زارداپ شەككەندەردى قابىلداۋدى جالعاستىرۋدا. دارىگەرلەر قالا تۇرعىندارىن اباي بولۋعا جانە جول ءجۇرۋ ەرەجەسىن ساقتاۋعا شاقىرادى.

- جاراقات الۋ جاعدايلار سانى ايتارلىقتاي وسكەن جوق. بارلىعى قالىپتى نورما شەگىندە. ەڭ الدىمەن، ادامدار جايلى اياق كيىم كيۋى ءتيىس، بويجەتكەندەردىڭ بيىك وكشەلى اياق كيىمدەردەن باس تارتقانى ابزال. جاياۋ جۇرگىنشىلەر جولدان وتكەندە جول ءجۇرۋ ەرەجەسىن بۇزباۋى كەرەك، ويتكەنى كوكتايعاقتا ماشينالاردىڭ تەجەگىشتەرى بىردەن ىسكە قوسىلا بەرمەيدى. جاراقاتتىڭ، اياق-قولدىڭ سىنۋى، شىعىپ كەتۋى بايقالعان ساتتە بىردەن تراۆموتولوگيالىق پۋنكتتەرگە بارۋ قاجەت،- دەيدى دەنساۋلىق ساقتاۋ باسقارماسى باسشىسىنىڭ ەمدەۋ-پروفيلاكتيكالىق جۇمىستارى جونىندەگى ورىنباسارى يۆان لي.