قازاقستاندىق ءانشى ايقىن تولەپبەرگەن مەن رەسەيلىك مۋزىكانت سوسو پاۆلياشۆيلي بىرىگىپ ءان جازدى، - دەپ حابارلايدى «قامشى» پورتالى massaget.kz-كە سىلتەمە جاساپ.

ايقىننىڭ ايتۋىنشا دۋەت جازۋ تۋرالى وي جاقىندا عانا كەلگەن. «مەن  قاراشا ايىنىڭ باسىندا كونسەرتتەردىڭ بىرىندە قازاقستانعا رەسەيلىك جانە شەتەلدىك ارتىستەردى اكەلىپ جۇرگەن اسلان تىلەۋبايمەن كەزدەسىپ قالدىم. ءسوز اراسىندا رەسەيلىك انشىمەن دۋەت ايتۋ تۋرالى اڭگىمە بولدى. مەن اسلاننان ءوتىنىپ ەدىم، قانداي انشىمەن ءان ايتقىم كەلەتىنىن سۇرادى. مەن  سوسو پاۆلياشۆيليمەن ءان ايتۋدى قالايتىنىمدى جەتكىزدىم. ونىڭ اندەرى، شىعارماشىلىعى، ساحنادا ءوزىن ۇستاۋى ماعان بۇرىننان ۇنايتىن. كاراوكەگە بارعاندا دا، سونىڭ اندەرىن تاڭدايتىنمىن. ەكى كۇننەن سوڭ ماعان سوسو ءپاۆلياشۆيليدىڭ كەلىسكەنىن جەتكىزدى» − دەيدى ايقىن.

جاقىندى ايقىن ماسكەۋگە بارىپ، بىرگە ءان جازىپ قايتتى. «مەن ەكى ءاندى ۇسىندىم، ول دا ەكى ءانىن كورسەتتى. سوڭىندا سوسونىڭ ءوزى جازعان ءبىر انگە توقتادىق» − دەيدى ايقىن. ءان جازۋ كەزىندە سوسو ايقىنعا: «ايقايلاما، ءان ايتقاندا ءوزىننىڭ سۇيىكتىڭنىڭ قۇلاعىنا سىبىرلاعانداي ايت» − دەگەن. بۇل ءسوز ايقىننىڭ كوڭىلىنەن شىعىپتى.

ەكى ءانشىنىڭ بىرىگىپ جازعان ءانىن تىڭدارماندار وسى جىلدىڭ سوڭىنا دەيىن ەستي الادى.  ال بەينەبايان جەلتوقساننىڭ ورتاسىندا تۇسىرىلەدى دەپ جوسپارلانىپ وتىر.

سونداي-اق، ايقىن دايىندىق كەزىندەگى سۋرەتتەرى مەن ۆيدەونى Instagram پاراقشاسىنا جۇكتەپ قويعان.

ايقىن پاۆلياشۆيليمەن بىرگە جۇمىس ىستەگەن ساتىنەن كەرەمەت اسەر العانىن العا تارتادى. «جاقسى ادامنىڭ قاسىندا وتكىزگەن ءبىر ساعاتىڭ ءبىر كىتاپتى وقىپ شىققانمەن تەڭ. ناعىز مۋزىكانت. ءوز ءىسىنىڭ كاسىبي شەبەرى»، — دەيدى وتاندىق ءانشى ميكروبلوگىندا.