بۇل كۇندە كەندە ەمەسپىز مەرەكەدەن،
تويلاعان كەيبىرەۋىن ەل ەرتەدەن.
كەيبىرى تەلىمەلى، كەيى جاڭا،
كەلسىنشى ءبارى ايتەۋ بەرەكەمەن.
مەرەكە دەگەنمەنەن ءمانى بولەك،
كەيىنىڭ كوڭىلدەگى ءسانى ەرەك.
بوستاندىق تاڭى اتقان - تاۋەلسىزدىك،
كەلەسىڭ جۇرەگىمدى انگە بولەپ.
سارقىلماس ماڭگىلىكتىڭ سىرىن العان،
ەلىمنىڭ مەرەكەسى ۇلى ماعان.
بۇل تويدى تويلاماعان بولماس قازاق،
(قاسقىردا، قاسقىر ەمەس ۇلىماعان).
ءداريعاي جەتپەي انتەك باعاسىنا،
قالمايىق تاۋەلسىزدىك نالاسىنا،
مەرەكەم جات اڭشىدان سەكەم العان،
اققۋداي قونا الماي ءجۇر دالاسىنا.
تۇسە الماي ازات ەلدىڭ القاسىنا،
كەلەسىڭ شىرشالاردىڭ قالقاسىندا.
قازاققا باستى بايلىق سەن ەدىڭ عوي،
كەتپەگىن جات پيعىلدىڭ قالتاسىندا.
اعىزىپ جانارىمنان ءقان-ىرىڭدى،
وزبىرلار ورماق بولعان تامىرىمدى،
سول شاقتا ازاتتىعىم قورعاپ قالدىڭ،
ال بۇگىن بىلمەي كەلەم ءقادىرىڭدى.
تاريحىن تاسقا جازعان قازاق اكەم،
وشپەستەي تامىرىم بار، از-اق اتتەڭ.
شىن تويلاۋ مەرەكەنى عاجاپ ءسىرا،
داقپىرت پەن جالعان تويلاۋ مازاق ەكەن.
تۇرعانداي سەزىنەمىن ميزامكوكتە،
كۇن كوزى جىبىگەندەي سوناۋ كوكتە.
بوزداقتىڭ قانى مەنەن جاسى سىڭگەن،
ۇمىتتەر بۇعىپ جاتار جاسىل شوپتە .
قاستەر ساpقىتقان
