مامىردىڭ 31ء-ى قازتاگ اقپارات اگەنتتىگى الماتى وبلىسىنداعى «گورنىي» شەكارا زاستاۆاسىندا 15 اسكەري قىزمەتكەردىڭ مايىتتەرى تابىلعانىن حابارلادى. اگەنتتىك شەكارا كۇزەتىندەگى قىزمەتكەرلەردى بىرەۋلەردىڭ ءولتىرىپ كەتكەنىن ايتادى.

ءوز دەرەككوزدەرىنە سىلتەمە جاساعان قازتاگ "ولتىرىلگەندەردىڭ اراسىندا 1 وفيسەر، كەلىسىمشارت بويىنشا 3 جاۋىنگەر جانە 11 سارباز بار" دەپ حابارلايدى. مامىردىڭ 31ء-ى تاراعان اقپاراتتار بويىنشا، ءموبيلدى پوست ەمدىك شوپتەردى زاڭسىز جيناۋدىڭ الدىن الۋ ءۇشىن جازعى ۋاقىتتا قويىلادى. مۇنىڭ الدىندا جۇڭگو ازاماتتارى شەكارانىڭ وسى تۇسىنان بىرنەشە رەت ۇستالعان ەكەن. 15 شەكاراشىنىڭ مايىتىنەن بولەك، زاستاۆاعا جاقىن ماڭداعى قورىقشىنىڭ ۇيىنەن ونىڭ جانسىز دەنەسى تابىلعان. "ەر ادام وسىدان 2 كۇن بۇرىن ولتىرىلگەن" دەپ حابارلايدى قازاقستان اقپارات قۇرالدارى.

قازتاگ اگەنتتىگى قاۋىپسىزدىك قىزمەتتەرى "شەكارا بەكەتىنە شابۋىل جاسالدى نەمەسە جارعىدان تىس قارىم-قاتىناستار بولدى دەپ بولجام جاساپ وتىر" دەپ حابارلايدى. اقپاراتتار بويىنشا، شەكاراداعى "گورنىي" ءموبيلدى بەكەتىمەن مامىردىڭ 30-ى بايلانىس ءۇزىلىپ قالعان. پوستتى تەكسەرۋگە كەلگەندەر جاۋىنگەرلەردىڭ مايىتتەرىن بىرەۋلەردىڭ ءبىر جەرگە جيناپ كەتكەنىن كورگەن. ال، ينتەرفاكس-كازاقستان اگەنتتىگىنىڭ مالىمەتى بويىنشا، زاستاۆادا ءورت بولعان، سەگىز اسكەري قىزمەتكەردىڭ ءمايىتى تابىلعان. راستالماعان دەرەكتەر بويىنشا، ولاردىڭ قولىنداعى قارۋلارى جوعالىپ كەتكەن.

«ازاتتىق» راديوسىنىڭ سايتىنان الىندى. تاقىرىپ وزگەرتىلدى.