قازاقستاندىق بەس قىز بايحرەيندە ءبيشى بولىپ جۇمىس ىستەۋدى ارمانداپ ءجۇرىپ، سەكسۋالدى قۇلدىققا تاپ بولعان. ولار قازاقستاننىڭ ساۋد ارابياسىنداعى ەلشىلىگىنىڭ ارالاسۋىمەن ەلگە ورالدى، - دەپ حابارلايدى «قامشى» پورتالى ەكسپرەسس-ك گازەتىنە سىلتەمە جاساپ.

ءبيشى ءاليماعا (كەيىپكەرلەردىڭ اتى وزگەرتىلگەن – رەد.) جانە ونىڭ بي توبىنداعى قۇربىلارىنا عالامتوردا ەڭبەكاقىسى جوعارى جۇمىس ۇسىنىلعان. اراب ەلىندەگى جۇمىستىڭ تالاپتارى مەن تۇرمىس احۋالىن تاپتىشتەپ تۇسىندىرگەن «ۆيرتۋالدى جۇمىس بەرۋشى» اقىرى قىزداردى كوندىرگەن. قىزدار كوپ ۇزاماي ۆيزا اشتىرىپ، جاڭا جۇمىس بەرۋشى الىپ بەرگەن بيلەتتەرمەن ساپارعا اتتانادى.

باحرەين استاناسى ماناما قالاسىندا ولاردى بارىنشا جىلى قارسى الىپ،  AlFirdous قوناق ۇيىنە جايعاستىرادى. كەلەسى كۇنى قوناق ۇيدەگى قىزدارعا بەيتانىس ەركەك كەلىپ، قۇجاتتارىن سۇرايدى. قۇجات بەرۋدەن باس تارتقان قىزدارعا ول، بىزگە سەندەردىڭ مىڭ بۇرالعان بيلەرىڭ ەمەس، كليەنتتەرىمىزدىڭ كوڭىلىنەن شىعىپ، «قىزمەت» كورسەتكەندەرىڭ كەرەك دەپ ماسەلەنى اشىق ايتادى. قىزدارعا كۇش كورسەتىلىپ، قوناق ۇيدەن شىعۋلارىنا تىيىم سالىنادى.

وقيعا قىزداردىڭ قۇلدىقتا ءجۇرىپ ساۋد ارابياسىنداعى قازاقستان ەلشىلىگىنە حابارلاسۋىمەن اياقتالادى. ەلشىلىك قىزمەتكەرلەىنىڭ ارالاسۋىمەن، پوليسيا قوناق ءتۇيدى ءتىنتىپ، بوتەن قىزداردى تۇتقىننان بوساتادى.

«ءقازىر اراب ەلدەرىندە قالىپتاسقان احۋال كۇردەلى. قازاقستاندىق ازاماتتاردى لاڭكەستىك ۇيىم قاتارىنا تارتۋمەن بىرگە، سەكسۋالدى قىزمەت كورسەتۋ ءۇشىن دە الداپ اكەتۋ وقيعالارىن بولدىرماۋ ءۇشىن سىرتقى ىستەر مينيسترلىگى الدىن الۋ جۇمىستارىن جۇرگىزۋدە» دەلىنگەن ۆەدومستۆو وكىلدەرى تاراتقان حابارلامادا.