ەلىمىزدە قازاقستاندىق اۋىر اتلەتشىلەردىڭ قاتىسۋىمەن ورىن العان دوپينگ-داۋدى تەكسەرۋ ءۇشىن كوميسسيا قۇرىلدى، - دەپ مالىمدەدى ق ر مادەنيەت جانە سپورت ءمينيسترى ارىستانبەك مۇحامەدي ۇلى.

«ءبىز ءقازىر مينيسترلىكتىڭ جانىنان قازاقستان اۋىر اتلەتكا فەدەراسياسىمەن بىرلەسىپ كوميسسيا قۇردىق. سەبەبى بۇل وقيعا ءبارىمىزدى الاڭداتىپ وتىر. ءبىراق مەن بۇل الدىن الا قويىلعان دياگنوز ەكەنىن، اقتىق دياگنوز ەمەستىگىن ايتقىم كەلەدى. ارينە، ءبىز ءقازىر اپەللياسياعا بەرىپ جاتىرمىز. ءار سپورتشى دارىلەرگە تەستىلەۋدەن وتەدى. ولاردىڭ قورىتىندىسىن ءبىز كۇتەمىز»، – دەدى مۇحامەدي ۇلى جۇما كۇنى جۋرناليستەرگە.

بۇل رەتتە مينيستر اۋىر اتلەتشىلەردىڭ باپكەرلەرىمەن سويلەسەتىنىن جەتكىزدى.

 «ءبىزدىڭ سپورتشىلارىمىزدى ءدارى ىشۋگە يتەرگەن باپكەرلەردى ءبىز جازالايمىز، سەبەبى وعان جول بەرۋگە بولمايدى. ءبىز تازا سپورت ءۇشىن كۇرەسەمىز. ونىڭ ۇستىنە ءبىز سپورتشىلارىمىز ءۇشىن الاڭداۋلى ەمەسپىز. بىزدە زاپاستاعى سپورتشىلارىمىز دا جەتكىلىكتى. ءبىزدىڭ جاستار اراسىندا ءار سالماق كاتەگورياسىندا ءۇمىت ارتارلىق جاستار جەتكىلىكتى. ءبىز ءۇشىن قازاقستاننىڭ سپورت دەرجاۆاسى رەتىندەگى بەدەلىن ساقتاپ قالۋ ماڭىزدى. (…) قالاي بولعاندا دا ءبىز بارلىق وقيعانى مۇقيات تالداۋىمىز كەرەك. الدا ريو-دە-جانەيروداعى وليمپيادا ويىندارى بار، وعان ءبىز جاقسى ناتيجەلەرمەن شىعىپ وتىرمىز»، – دەپ قورىتىندىلادى مۇحامەدي ۇلى.

قازاقستاندىق باق-تار حابارلاعانداي، 24 جەلتوقسان كۇنى اۋىر اتلەتيكا حالىقارالىق فەدەراسياسى (IWF) دوپينگ-باقىلاۋدىڭ زەرتحانالىق تالدامالارىنىڭ ناتيجەسىندە قازاقستاندىق ءۇش اۋىر اتلەتشىنى – الماس وتەشيەۆ، جاسۇلان قىدىربايەۆتى جانە ەرمەك ءومىرتايدى انتيدوپينگتىك ەرەجەنى بۇزۋى مۇمكىندىگىنەن حالىقارالىق جارىستارعا قاتىسۋدان ۋاقىتشا الاستاتتى.

حابارلانعانداي، سپورتشىلاردان حيۋستونداعى 2015 جىلعى الەم چەمپيوناتىنداعى الىنعان دوپينگ-باقىلاۋدىڭ «ا» سىناماسىندا تىيىم سالىنعان دارىلەر انىقتالعان. حيۋستوندا وتەشوۆ كۇمىس مەدال، قىدىربايەۆ – قولا مەدال العان. سپورتشىلار ريو-دە-جانەيروداعى وليمپياداعا قاتىسۋعا دايىندالىپ جۇرگەن.