2015 جىلى دا داستۇرگە اينالعان كادرلىق وزگەرىستەر بولدى. وبلىس باسشىلارى مەن بانك سەكتورى سالاسىندا ۇلكەن تاعايىنداۋلار ءجۇردى. 7kun.kz وسى جىلى جاڭا قىزمەتتىڭ تىزگىنىن ۇستاعاندارعا شولۋ جاساپتى. 

داريعا نازاربايەۆا – ۆيسە-پرەمەر

2015 جىلدىڭ قىركۇيەك ايىندا داريعا نازاربايەۆا پرەمەر-مينيستردىڭ ورىنباسارى بولىپ تاعايىندالدى. وسىعان بايلانىستى ق ر پارلامەنتى ءماجىلىسى 16 قىركۇيەك كۇنى ەكس-دەپۋتاتتىڭ  وكىلەتتىلىگىن مەرزىمىنەن بۇرىن توقتاتۋ تۋرالى شەشىم قابىلدادى.

بەردىبەك ساپاربايەۆ — اقتوبە وبلىسىنىڭ اكىمى

ورنىن داريعا نۇرسۇلتانقىزىنا بوساتقان بەردىبەك ساپاربايەۆ ۇكىمەتتەگى جىلى ورنىنان اۋىسىپ، اقتوبە وبلىسىنىڭ اكىمى قىزمەتىن تاعايىندالدى. ب.ساپاربايەۆتى ايماقتاردى باسقارۋ بويىنشا تاجىريبەلى جەتەكشى دەۋگە بولادى. ول بۇعان دەيىن شىعىس قازاقستان، قىزىلوردا، وڭتۇستىك قازاقسان وبلىستارىن باسقارعان بولاتىن.

باۋىرجان بايبەك – الماتى قالاسىنىڭ اكىمى

باۋرجان بايبەك الماتى قالاسىنىڭ اكىمى قىزمەتىنە تامىز ايىنىڭ باسىندا كەلدى. ول الماتى قالاسىندا تۋىلىپ، وسى قالانى باسقارىپ وتىرعان العاشقى تۇلعالاردىڭ ءبىرى. اكىم قىزمەتىنە كىرىسكەن ساتتەن باستاپ قالالىق تەحنولوگيالارعا باسا نازار اۋدارۋدا. الماتى قالاسىنىڭ تۇرعىندارى قالا اكىمىنە ۇلكەن ءۇمىت ارتىپ، مەگاپوليستىڭ ەڭ كۇردەلى ەكولوگيا ماسەلەسىن شەشۋگە كوڭىل بولەدى دەگەن نيەتتە.

احمەتجان ەسىموۆ — «استانا ەكسپو-2017» ۇك باسقارماسىنىڭ ءتوراعاسى

تامىز ايىنىڭ باسىندا احمەتجان ەسىموۆ الماتى قالاسى اكىمى قىزمەتىنەن كەتىپ، «استانا ەكسپو-2017» ۇك باسقارماسىنىڭ ءتوراعاسى بولدى. قازاقستاننىڭ ءيميدجى ءۇشىن وتكىزگەلى جاتقان  EXPO-2017 حالىقارالىق كورمەسىندە جەمقورلىققا قاتىستى جاز ايىندا داۋ تۋىنداعان بولاتىن. وسىعان بايلانىستى ا. ەسىموۆكە قابىلەتتى باسقارۋشى رەتىندە كورمەنىڭ شىعىندارىن قىسقارتىپ، دايىندىق شارالارىن بارىنشا تەزدەتۋ جۇمىسى تاپسىرىلدى. جەلتوقسان ايىنىڭ سوڭىندا اتالعان كورمەگە 55 مەملەكەت پەن ونداعان ۇيىمدار جانە ءىرى كومپانيالاردىڭ قاتىساتىنى انىقتالدى.

اسقار مىرزاحمەتوۆ - «نۇر وتان» پارتياسى ءتوراعاسىنىڭ ءبىرىنشى ورىنباسارى

 اسقار مىرزاحمەتوۆ التى جىلدان اسا وڭتۇستىك قازاقستان وبىلسىن باسقارىپ، 2015 جىلعى تامىز ايىنىڭ ورتاسىندا «نۇر وتان» پارتياسى ءتوراعاسىنىڭ ورىنباسارى قىزمەتىنە تاعايىندالدى. ول وزبەكستانداعى قازاقستاننىڭ جەدەل ءارى وكىلەتتى ەلشىسى بولعان. سونىمەن بىرگە، اۋىل شارۋاشىلىعى مينيسترلىگىندە دە باسشىلىق قىزمەتتە ىستەگەن.

​

دانيار اقىشيەۆ – ۇلتتىق بانك ءتوراعاسى

قاراشا ايىنىڭ باسىندا ۇلتتىق بانك ءتوراعاسى قايرات كەلىمبەتوۆ قىزمەتىنەن كەتىپ، ورنىنا الەۋمەتتىك-ەكونوميكالىق مونيتورينگ ءبولىمىنىڭ مەڭگەرۋشىسى بولعان دانيار اقىشيەۆ كەلدى. ق. كەلىمبەتوۆتىڭ قىزمەتتەن كەتۋىن مەملەكەت باسشىسى حالىقتىڭ «تەڭگە مەن ۇلتتىق بانككە» دەگەن سەنىمنىڭ جوعالۋىمەن ءتۇسىندىردى. ال قوعامدا ەسىمى اسا كوپ اتالمايتىن جاڭا بانكيرگە پرەزيدەنت الدىمەن ۇلتتىق ۆاليۋتاعا دەگەن سەنىمدى قايتارۋ تۋرالى تاپسىرما جۇكتەدى.

عابيدوللا ءابدىراحىموۆ — شىمكەنت قالاسىنىڭ اكىمى 

ق ر پرەزيدەنتى اكىمشىلىگى جەتەكشىسىنىڭ ورىنباسارى بولعان عابيدوللا ءابدىراحىموۆ تامىز ايىندا شىمكەن قالاسىنىڭ اكىمى بولدى. ول شىمكەنت قالاسىنىڭ جاستارىمەن بىرىگە وتىرىپ، قالانى ۇلكەن مەگاپوليسكە اينالدىرۋ ءۇشىن جۇمىس ىستەۋدە. قازىرگى تاڭدا عابيدوللا ءابدىراحىموۆ قالا بەزەندىرۋ ءۇشىن جۇمسالاتىن قارجىنى ۇنەمدەپ، از قامتىلعان وتباسىلار مەن الەۋمەتتىك جاعدايى تومەن تۇلعالاردى قولداۋعا جۇمىس ىستەپ جاتىر.

مەملەكەتتىك قىزمەت ىستەرى مينيسترلىگى قۇرىلدى

جەلتوقسان ايىندا ق ر پرەزيدەنتى نۇرسۇلتان نازاربايەۆتىڭ جارلىعىمەن قازاقستان رەسپۋبليكاسىنىڭ مەملەكەتتىك قىزمەت ىستەرى مينيسترلىگى قۇرىلدى. جاڭا مينيسترلىكتى تالعات سوۆەتبەك ۇلى دوناقوۆ باسقاردى. ال مينيسترلىك قۇرامىنداعى سىبايلاس جەمقورلىققا قارسى ءىس-قيمىل ۇلتتىق بيۋروسىن باسقارۋشى رەتىندە قايرات پەرنەش ۇلى قوجامجاروۆ تاعايىندالدى. ەكەۋى دە بۇعان دەيىن اتقارىپ كەلگەن قىزمەتىنەن بوساتىلدى.

قايرات كەلىمبەتوۆ — «استانا» حالىقارالىق قارجى ورتالىعىنىڭ باسشىسى

قايرات كەلىمبەتوۆ ۇلتتىق بانك ءتوراعاسى قىزمەتىنەن كەتكەن سوڭ ەكى ايدان كەيىن «استانا» حالىقارالىق قارجى ورتالىعىنىڭ باسشىسى بولدى. جاڭا قارجى ورتالىعى ەكسپو ينفراقۇرىلىمىنىڭ بازاسى ارقىلى الداعى ۋاقىتتا كوپتەگەن كومپانيالار مەن ينۆەستورلاردى تارتۋ ءۇشىن سالىنىپ جاتىر. سوندىقتان ق. كەلىمبەتوۆكە ورتالىقتى باسقارۋ وڭايعا تۇسپەيتىنى انىق. جوبا 2018 جىلى قولدانىسقا بەرىلەدى.

ۆلاديمير جۇماقانوۆ — ۇلتتىق قاۋىپسىزدىك كوميتەتىنىڭ ءتوراعاسى

جەلتوقسان ايىنىڭ سوڭىندا ۇلتتىق قاۋىپسىزدىك كوميتەتىنىڭ ءتوراعاسى اۋىستى. كوميتەتتى سوڭعى بەس جىلدا باسقارىپ كەلگەن نۇرتاي ابىعايەۆتىڭ ورنىنا ۆلاديمير جۇماقانوۆ كەلدى. ول ۇقك قۇرىلىمىندا 33 جىلدان بەرى جۇمىس ىستەپ كەلەدى.

سونداي-اق، ەلباسى جارلىعىمەن سامات ساتىبالدى ۇلى ءابىش ۇقك ءتوراعاسىنىڭ ءبىرىنشى ورىنباسارى لاۋازىمىنا تاعايىندالدى. ول بۇعان دەيىن ۇقك ءتوراعاسىنىڭ ورىنباسارى لاۋازىمىن اتقارعان ەدى.