«ۇلتتىق قورداعى قاراجات 6-7 جىلدا تاۋسىلادى» دەپ سۇحبات بەرگەن بەرىك وتەمۇرات قىزمەتىنەن بوساتىلدى. شىندىقتى ايتقانى ءۇشىن ول «ق ر ۇلتتىق بانكىنىڭ ۇلتتىق ينۆەستيسيالىق كورپوراسياسى» اق باسشىسى قىزمەتىنەن قۋىلىپ وتىر. ال ونىڭ ورنىنا ىلە-شالا ەسجان ءبىرتانوۆ تاعايىندالدى. ءبىر قاراعاندا بۇل ماسەلەگە باسا نازار اۋدارۋدىڭ قاجەتى جوق سياقتى. الايدا، بەرىك وتەمۇراتتىڭ ارەكەتىن نازاردان تىس قالدىرۋعا استە بولمايدى.
جالپى جوعارى لاۋازىمدى باسشىلاردىڭ وتكىر ماسەلە كوتەرىپ، بۇقارالىق اقپارات قۇرالدارىنا سۇحبات بەرۋى وتە سيرەك كەزدەسەدى. ال الدا-جالدا اشىق مالىمدەمە جاساي قالعان جاعدايدا ونىڭ باسى داۋعا قالىپ، جۇمىستان قۋىلادى. مۇنى بىلدەي ءبىر كورپوراسيانى باسقارعان بەرىك وتەمۇراتتىڭ بىلمەۋى مۇمكىن ەمەس. الايدا، ول «قازاق ەلىنىڭ ۇلتتىق قورىنداعى 64 ملرد دوللار الداعى التى-جەتى جىل ىشىندە تاۋسىلۋى مۇمكىن» جانە «ءبىز ۇلتتىق ءال-اۋقات قورىن «جەپ جاتىرمىز» دەپ اشىق ايتتى.
ۇزىن ءسوزدىڭ قىسقاسى بەرىك وتەمۇرات كارىم ءماسىموۆ باسقاراتىن مينيسترلەر كابينەتىنىڭ جۇمىسىن سىن ساداعىنا الدى. ويتكەنى، ۇكىمەت ۇلتتىق قوردىڭ ينۆەستيسيالىق مەنەدجمەنتىنە دۇرىستاپ نازار اۋدارماي كەلەدى. قازىرگى تاڭدا بەرىك وتەمۇراتتىڭ وسى سۇحباتى قىزۋ تالقىلانىپ جاتىر. ازاماتتاردىڭ باسىم كوپشىلىگى ونى «شىندىقتى ايتتى» دەپ ماقتاسا، ەكىنشى تاراپ مۇنى «قاندايدا ءبىر ويىن بولۋى مۇمكىن» دەپ كۇماندانۋدا. بۇل ماسەلەنىڭ اق-قاراسىن ايىرۋ استە مۇمكىن ەمەس. الايدا، ءبىزدىڭ ەلدە شىندىقتى ايتقان باسشىنىڭ قىزمەتتە كوپ تۇراقتامايتىنى كوپشىلىككە جاسىرىن ەمەس. ۇلتتىق بانكتىڭ بۇرىنعى ءتوراعاسى ق. كەلىمبەتوۆ تە قىزمەتىنەن تەڭگە باعامىنىڭ تومەندەگەنى ءۇشىن ەمەس، ءبىرىڭعاي جيناقتاۋشى زەينەتاقى قورىنداعى قاراجاتتىڭ اينالىمىنا قاتىستى قۇپيالاردى اشىپ قويعانى ءۇشىن كەتتى دەيدى بىلەتىندەر.
ماسەلەن بۇعان بەرىك ءابدىعاليدىڭ ءبىر كۇندە قىزمەتتەن قۋىلعانى دالەل بولا الادى. اتالعان ازامات ۇلىتاۋ اۋدانىنان باستاپ جەزقازعان، ارقالىق قالالارىن جاقسى باسقارعان بولاتىن. ءتىپتى ارقالىق جۇرتى اكىمدەرىنە ريزا بولعانى سونشا «اق بەرىك» اتتى اندە شىعاردى. وسى ەڭبەگىنىڭ ارقاسى بولار ول قاراعاندى وبلىسى اكىمىنىڭ ورىنباسارى لاۋازىمىنا تاعايىندالدى. ايتسە دە، اتالعان قىزمەتتە ءبىر اي وتىرماستان ونى قىزمەتتەن الىپ تاستادى. سەبەبى، ول الدىنا كەلگەن ءجۋرناليستىڭ سۇراعىنا جاۋاپ بەرىپ، وزگە باسشىلار سياقتى بۇقارالىق اقپارات قۇرالدارىنان قاشپايتىن. مىنە وسى سۇحباتتارىندا الاششىل ازامات شىندىقتى جاسىرماي اشىق اڭگىمە ايتتى.
جالپى ءبىزدىڭ ەلدە وتكىر مالىمدەمە جاساپ، كوزگە تۇسكەن ازاماتتاردى جۇمىستان الىپ تاستايتىن «ءداستۇرى» قالىپتاسقان. اينالىپ كەلگەندە مۇنىڭ ءبارى جابىق ءقوعامنىىڭ سالدارى. ەگەر دە ەلىمىز اشىق قوعامعا ءبىرتابان جاقىن بولسا، بەرىك ءابدىعالي، بەرىك وتەمۇرات سىندى تاعى دا باسقا ازاماتتار جۇمىستان قۋىلماس ەدى. وكىنىشكە قاراي، ءبىز اشىق قوعامنان الشاقتاپ، جابىق قوعامنىڭ قۇشىعانا ەنىپ كەتكەنبىز. ال اشىق قوعامنان نەعۇرلىم الشاقتاي باستاساق، سوعۇرلىم بەرىك ءابدىعالي، بەرىك وتەمۇرات سياقتى ازاماتتاردان ايىرىلا بەرەمىز. ماسەلەن وركەنيەتتى ەلدەردە قاندايدا ءبىر باسشىنى قىزمەتتەن الىپ تاستاسا، ونىڭ نەلىكتەن وتستاۆكاعا كەتكەنى تۋرالى اقپارات بەرىلەدى. ال ءبىزدىڭ ەلدە جۇمىستان بوساتىلعان ازاماتتىڭ نە ءۇشىن ايىپتى بولعانى تۋرالى ەشتەڭە ايتىلمايدى. اينالىپ كەلگەندە مۇنىڭ ءبارى جابىق قوعامنىڭ جازىلماعان زاڭىنىڭ سالدارىنان بولىپ وتىر.
سەرىك جولداسباي
استانا
