الەۋمەتتىك جەلىلەردە قازاقستاننىڭ ەڭبەك سىڭىرگەن قايراتكەرى، تاۋەلسىزدىك جىلدارى بار قازاقتىڭ كوزايىمىنا اينالعان «باۋىرجان-شوۋ» ءازىل-وسپاق تەاترىنىڭ نەگىزىن قالاعان ونەر تارلانى باۋىرجان يبراگيموۆ پەن الدەبىر قوناق ءۇي قىزمەتشىسىنىڭ اراسىنداعى كيكىلجىڭ جازىلعان ۆيدەو كەڭ تارالىپ، قىزۋ تالقىعا تۇسۋدە. ادەتتەگىدەي، جەلى قولدانۋشىلارىنىڭ باسىم بولىگى ازاماتتى سىنعا الۋدا. ءتىپتى، ويدا-جوقتا پايدا بولعان ۆيدەونى جەردەن جەتى قويان تاپقانداي قۋانا قابىلداعاندار دا بار سياقتى.
ارىدەن ويلاساق، ۆيدەودا جازىلعان جاعدايلار كەز-كەلگەن ادامنىڭ ومىرىندە بولىپ جاتادى. مۇنداي، باۋىرجاننىڭ بار ايىبى – قۇدايبەرگەن بەكىش ايتقانداي، «پروكلياتايا پوپۋليارنوست»، ياعني، تانىمالدىعى. الايدا، ونىڭ تانىمالدىعى ەشكىمگە ونىڭ جەكە قۇپيالارىن اشۋعا، جەر جاھانعا تاراتۋعا، كوپ بولىپ تالقىلاۋعا قۇقىق بەرمەيدى.
ەكىنشىدەن، ول ۆيدەو بولعان جايدىڭ جاي-جاپسارىن تولىق تۇسىنۋگە مۇمكىندىك بەرمەيدى. شىنىمەن دە، ەلگە تانىمال ازامات اشۋلاناتىنداي، داۋىس كوتەرىپ، ىزالاناتىنداي جاعداي بولعان شىعار. ەلىمىزدەگى قاي سالادا بولماسىن، قىزمەت كورسەتۋ ساپاسىنىڭ قانداي دەڭگەيدە ەكەنى بارىمىزگە ايان عوي. الىس جولدان شارشاپ كەلگەن باۋكەڭ شىنىمەن دە ورىنسىز كەدەرگىلەرگە تاپ بولىپ اشىنۋى دا مۇمكىن عوي.
ۇشىنشىدەن، سول ۆيدەونى تۇسىرگەندەردىڭ ارەكەتىن دە زاڭ تالاپتارىنا، ادامگەرشىلىك نورمالارىنا ساي دەپ ايتا المايمىز. ۆيدەونىڭ جاسىرىن، باۋىرجان يبراگيموۆكە ەسكەرتىلمەي تۇسىرىلگەنى انىق كورىنىپ تۇر. ءتۇسىرىپ قانا قويماي، جەكە باسقا قاتىستى قۇپيانى عالامتورعا جاريالاۋدىڭ زاڭ الدىندا دا، ار الدىندا دا قانداي جاۋاپكەرشىلىك جۇكتەيتىنىن ايتپاي-اق قويايىق.
«جوق جەردەن اكتەرگە ادۆوكات تابىلا كەتىپتى» دەپ سوكپەڭىزدەر. باۋىرجانداي ازاماتتىڭ ابىرويى ءبىزدىڭ ءبىر اۋىز سوزىمىزگە قاراپ قالعان جوق. ءتىپتى، مىنا جاعداي دا ونىڭ بەدەلىنە نۇقسان كەلتىرەدى دەپ ويلامايمىز. ول جەردەن الىپ، جەرگە سالارلىقتاي قولىندا بيلىگى بار، ەل تاعدىرىنا جاۋاپتى لاۋازىمدى تۇلعا ەمەس. ايتپەسە، پروكۋرورلاردىڭ اراق ىشكەنىن، پوليسەيلەردىڭ جەزوكشەلەرمەن امپەي-جامپەيلىگىن اشكەرەلەيتىن دە ۆيدەولاردى كورىپ ءجۇرمىز. جوعارى بيلىك باسىنداعىلاردىڭ دا سان پەندەشىلىگىن بىلەمىز. ايتپاعىمىز، ازاماتتىعىمىزدى جوعالتپايىق. ارزان كۇلكى، جەڭىل اڭگىمەگە ەرىپ، اتپال ازاماتتىڭ جەكە ومىرىنە قول سۇقپايىق، ەلگە ماسقارا بولمايىق.
جومارت ابدوللا ۇلى
