فرانسيا بيلىگى بيزنەسمەن مۇحتار ءابليازوۆتى قازاقستانعا قايتارىپ بەرۋى مۇمكىن. ول ءۇشىن ەلىمىزدىڭ باس پروكۋراتۋراسى ءبىر توپ ساراپشىنى پاريجگە جىبەرمەك. وتاندىق پروكۋرورلار قاشقىن بانكيردى ەكستراديسيالاۋعا قاتىستى ەكىجاقتى كەلىسسوز جۇرگىزۋگە دايىندالىپ جاتىر، - دەپ حابارلايدى «قامشى» پورتالى كتك ارناسىنا سىلتەمە جاساپ.
يوگانن مەركەل، ق ر باس پروكۋرورىنىڭ ورىنباسارى:
-ۇلكەن جۇمىستار اتقارىلۋدا. جاقىن كۇندەرى ساراپشىلاردى پاريجگە جىبەرەمىز. ءبىزدىڭ ماماندار ەكى ەل اراسىنداعى ءۇش كەلىسىم بويىنشا جۇمىس ىستەۋى ءتيىس. ازىرگە فرانسيا قارسىلىق بىلدىرگەن جوق، كەلىسىم بەرۋى كەرەك.
استانا مەن پاريج قۇقىقتىق كومەك، ەكستراديسيا جانە سوتتالعان ازاماتتار جازاسىن ەلدە وتەۋ ءۇشىن قايتارۋ سىندى ءۇش ماسەلەنى تالقىلايدى. ويتكەنى ءقازىر ەكى ەل اراسىندا مۇنداي كەلىسىم جوق. سوندىقتان، فرانسيا سوتى مۇحتار ءابليازوۆتى رەسەيگە قايتارىپ بەرۋ تۋرالى شەشىم شىعارعان ەدى. ال قاشقىن بانكيردى ماسكەۋدەن وزگە قازاقستان مەن ۋكراينا دا ەكستراديسيالۋعا ءوتىنىش ءبىلدىرىپ وتىر. ەكس-بانكيرگە ءۇش مەملەكەتتىڭ دە قۇقىق قورعاۋشىلارى «الاياقتىقپەن اينالىستى، جالعان قۇجات جاسادى، قىرۋار قارجى جىمقىردى» دەگەن ايىپتار تاعىپ وتىر.
پىكىر قالدىرۋ