الماتىنىڭ ورتالىق كوشەلەرىندە ورنالاسقان 35 باسپانا الداعى ەكى جىلدا سۇرىلەدى. ولاردىڭ ورنىنا كوپ پاتەرلى 14 قاباتتان تۇراتىن ءزاۋلىم ۇيلەر تۇرعىزىلادى. بۇل تۋرالى المالى اۋدانىنىڭ باسشىسى سەرىك قۇسايىنوۆ تۇرعىندارمەن كەزدەسۋ بارىسىندا ءمالىم ەتتى، - دەپ حابارلايدى «قامشى» پورتالى الماتى تەلەارناسىنا سىلتەمە جاساپ.

الداعى ەكى جىلدا شيەۆچەنكو، ماناس، جامبىل جانە بايزاقوۆ كوشەلەرىنىڭ قيىلىسىنداعى 35 ەسكى ءۇي تولىقتاي سۇرىلەتىن بولدى. ولاردىڭ ورنىنا كوپ پاتەرلى 14 قاباتتان تۇراتىن ءزاۋلىم ۇيلەر تۇرعىزىلادى. 10-نان استام كوشە كۇردەلى جوندەۋدەن وتكىزىلەدى. بۇل المالى اۋدانى اكىمىنىڭ حالىق الدىنداعى ەسەپ بەرۋ جيىنىندا ءمالىم بولدى. اۋدان باسشىسى بىلتىرعى اتقارعان جۇمىستاردى سارالاپ، كەلەر جىلعى جوسپارىمەن ءبولىستى. كەزدەسۋدە الەۋمەتتىك ماسەلەلەرگە دە دەن قويىلدى. المالى اۋدانىندا 212 مىڭنان استام ادام تۇرادى.

الماتىنىڭ جەتىسۋ اۋدانى دا قارقىندى دامۋدا. بيىل اتالمىش اۋداندا 18 جەكەمەنشىك، 1 مەملەكەتتىك بالاباقشا جانە شاعىن ورتالىق اشىلادى. ال، مامىر ايىندا 11 ەمحانانانىڭ جانىنا قوسىلعان 3 قاباتتى مەكەمە دە تۇرعىنداردى قابىلداي باستادى. جەرگىلىكتى اتقامىنەرلەر باسپانا ماسەلەسىمەن دە بەلسەندى اينالىسۋدا.

«گونچاروۆ كوشەسىندەگى 4 تۇرعىن ءۇي سۇرىلگەن بولاتىن، ولاردىڭ ورنىنا 9 قاباتتى باسپانا سالىندى. قازىرگى ۋاقىتتا 9 قاباتتى ەكىنشى تۇرعىن ءۇيدىڭ قۇرىلىسى قارقىندى جۇرگىزىلىپ جاتىر»،- دەدى الماتى قالاسى جەتىسۋ اۋدانىنىڭ اكىمى تالعات رازاقوۆ.

بازارلاردىڭ باسىم بولىگى ورنالاسقان جەتىسۋ اۋدانىندا كەلەر ايدا جاڭا "دوۆۋن" بازارى اشىلادى جانە 13ء-ى قايتا جاڭارتىلادى. ال، جەكە كاسىپكەرلەردىڭ قارجىسىنا 20 بالالار ويىن جانە سپورت الاڭدارى سالىنباق. ەسەپ بەرگەن قوس اۋداننىڭ اكىمدەرىنە جولدانعان تۇرعىنداردىڭ ماسەلەلەرىنىڭ وڭتايلى شەشىلۋىن "نۇر وتان" پارتياسىنىڭ وكىلدەرى باقىلاۋعا الادى.