Men marqum Ermurat Zeıiphanulymen kezinde Quljanyń kóshesinde, qoltyqtasyp júretindeı qoıý arlasyp ketkemin joq. Óıtkeni, ol jyldary Erekeń ónerdegi kósheli tulǵasyn kisesinen-aq baıqatyp, kópke tanylyp kele jatqan besti aıǵyrdaı belgili jigit edi. Al, biz bolsaq shyny kerek syrtynan súıine kóz tikken kógen kóz kóp baýyrlarynyń qataryndaǵy kók kózdeý bireýi ǵana boldyq. Sebebi, ol kezdiń stýdentteri búgingi kúngi stýdentterdeı emes uıańdaý keletin. Sondyqtan da shyǵar Erekeń alystan qaraǵan bizderge ylǵı da juldyz bolyp kókten kórinetin edi. «Jaılaýym» ánin boıdaqtar jaǵy jarapazandaı jattap alyp, jataǵan jataqhanalarynyń ózin keremet keń jaılaýǵa aınaldyryp áýeletetin de jatatyn. Jalpy bul án boı túzeı bastaǵan bozbalalardyń boıtumaryndaı qasterlenip, ásem Quljanyń qushaǵyn mahabbat besigine aınaldyryp áketetin. Murty tebindeı bastaǵan «tentekter», kóńili burylǵan qyzǵa júrek sózin jetkize almaı jer shuqylaǵan sátterinde: .
Men júrgen jaılaýdyń,
Taýynyń bıigi-aı.
Arýdan aýmaıtyn,
Aıaýly kıigi-aı,-degen án joldaryn sezimderine serik etetin de, áýeletip ala jóneletin. Kerek deseńiz, qurbysynyń qolyn ustap turyp, tumsa mahabbatynyń tusaýyn tuńǵysh keskendeı túshirkenip, sol kúni tilin baılaǵan álgi sulýymen túsinde toı jasap shyǵatyn. Tańǵy shyqtaı móldir de taza mahabbatqa qushtar taý uldarynyń júrek qalaýyn shynaıy taba bilgen bul án, keıingi kúnderi kóp ánder ortasynan taldanyp alynyp, «İle saltanaty» atty kórkem fılminde de eki jastyń toıynda oryndaldy. Qyzyq bolǵanda mundaǵy 2012 jyly, Beıjıńdegi Lý shun ádebıet ınstıtýtynda bolǵan az ult jas qalamgerleriniń úırenýinde, İle pedagogıkalyq ınstıtýynan oqý taýysyp, bul kúnderi ólke ortalyǵy Úrimjide «Shuǵyla» jýrnalynda qyzmet atqaryp otyrǵan, belgili prozık baýyrym Tursynbek Baıjumauly bul ándi «Halyq áni» dep oryndady. Otyrys sońynan inimniń kezektegi oryndaǵany avtorly án ekenine kózin jetkizgenim de baryp, óziniń osyndaı qysylǵan ortada qymsynbaı oryndap, qalyń jurttyń qolqasynan qutylatyn qorjynynda bir-eki án «kóziri» barlyǵyn aıtyp, kózi badanadaı bolyp basyn shaıqap tań –tamasha boldy baýyrym. Árıne, munyń ózin qas ónerdiń qasıeti, nemese, keshegi qushaǵyndaǵy qara domalaq qulynyna Quljanyń bildirmeı taǵylymdap taǵyp jibergen qasıetti tana tumary desek te bolǵandaı edi. Quljadaǵy qazaqtardyń kógildir ekranynan tuńǵysh kórgen tele júrgizýshisi de topyraǵyń torqa bolsyn! Osy erekeń boldy. Biz emes Quljanyń kóshedegi Uıǵurlary da sol kezderde Ermuratty «aýaraı qazaq» dep, syrtynan tańdana, tamsana qarasatyn edi. Óıtkeni, Erekeń ekrannan jergilikti aýa raıy málimetin ol tustary ózi tóte oqı salatuǵyn. Sol «aýaraı qazaq» bula bult bolyp Alataý asyp ketken soń, biz de «jeldir jekendetip» júrip artynan qýyp barǵan jolymyzda, Qazaqstannyń Almaty qalasynda tanystyq. «aqyndar aýylda týyp, Almatyda óledi» degen qaısy bir sáýegeıdiń kezinde aıta salǵan osynaý sózi, sońǵy kezderi oılap otyrsań shyndyqqa aınalyp bara jatqandaı, bul jaǵynan tiri pende bolǵan soń tiksinip te qalady ekensiń. Sonymen, marqum, kezdesken áne sol kúnimizden bastap qaýyzyn erte jarǵan balapandaı qomdanyp, Almatynyń kóshelerinde eteginen bizderdi ertip júretin boldy. Beıne bul jaǵynan óner qýǵan oralman jastardyń baǵyna bitken sol shahardaǵy «jıren atty Jumataı (J.Jaqypbaev)» dersiń. Aǵamyzdyń eńbek aqysy tıgen kúnderi, nemese, toılardan qorjyny tompıyp oralǵan kezderi búıirimiz bultıyp shyǵyp, terlep-tepship, terige túsken qazaqtaı túrlenip shyǵa kelemiz. Almatyda baqytyn bazardan emes, kasipten izdep júrgen jankeshti eki oralman jigiti bar dep estiseńiz, árıne, ekilenbeı sonyń biri Ermurat Zeıiphanuly dep uǵa berińiz, oǵan búkil qazaqstan kýá! Kóp jigitterimiz «qol bulǵap» júrip shaqyryp alǵan óz qandastarynyń qaltasyndaǵy tıyn-tebenin qaltarysta qaǵyp alyp, munyń ózin kapıtalısik qoǵamnyń tirligine saıdyryp, jeztyrnaqtaı saıqaldanyp júrgen sol ortada, Erekeńniń barlyǵyn aryna baǵyndyryp, mańdaı terimen jan asyrap, Almatynyń kóshesinde «Mańǵabyldaı» mań-mań basyp júretin jomarttyǵy qandaı da bir ardyń týyn áspettegen azamattarymyzǵa úlgi bolǵandaı. Marqum ómiriniń sońǵy mınýtyna deıin osy tazalyǵynan taıǵan joq. Pendeliktiń esiginen telmirip kóz satpastan ónerde de, ómirde de óziniń sol baıaǵy bekzattyq (kynazdyq) Qalypyn saqtaı bildi. Esesine kez kelgen qyspaqty jaǵdaıda jalǵyz atyn túsip beretin qas serige tán myrzalyǵy, Almatydaǵy bitken oralman jastarymyzdyń kóńilin bosatatyn. Bolmasa biz aıtqan alaıaq aǵaıyndarymyzdyń jyl on eki aı aqsha jasap kele jatqan ortalyǵy-Almaty qalalyq pasport ústeliniń (vıza ashatyn) bildeı birinshi qol bastyǵy, polkonık Qattaýbaevtyń Erekeńdi tóredeı sılap tórine shyǵaryp, ákesiniń qabyr basyndaǵy eskertkish taqtasyna arnaý sóz jazdyryp alǵanyn kózimyzben de kórgenbiz. Qazaqstannyń tuńǵysh retki «Kóshi-qon zańynyń» avtory, kezindegi depýtat, sol kezderdegi Prezıdent aparatynyń memlekettik aǵartý salasy boıynsha ınspektor ákim Ysqaqtyń Erekeńniń ónerin ulyqtap týǵan aýylyna ertip barǵanyn, kerek deseńiz osy jolynda sol aýyldyń «qurmetti azamaty» ataǵyn bergizip oralǵanyn, marqumnyń Baýyrjan batyr kóshesiniń boıyndaǵy turaǵynda memleket ınspektorymen birge tústenip otyryp, óz et qulaǵymyzben de estigenbiz (bul dastarqanda Almas Ahymetbekuly aǵamyz da boldy). Taǵy sol sáqty qazaqstan memlekettik oqý-aǵartý mınstri (keıingi kezderi depýtat, bul kúnderi memlekettik qyzdar pedagogıkalyq ýnıversıtetinyiń rektory) Shámshá Berkimbaeva Ermuratty kóz jumǵanǵa deıin kekilinen kenje inisindeı syılap erkeletip ótti. Erekeńniń otbasy, bala-shaǵasyn atalǵan mınstr apaıynyń Qazaqstandaǵy eń kórkem saıahat ortalyqtaryna ózimen birge aparyp demaldyryp qaıtatynyn almatydaǵy aralasqan azamattarynyń bári biledi.
(Jalǵasy bar)
Sýrette(soldan ońǵa qaraı): Bilisbek Ábdirazaq, Ermurat Zeıiphanuly, Aýyt Muqıbek
Bilisbek Ábdirazaq
Tóte jazýdan aýdaryp daıyndaǵan: Qýanáli Almasbekuly
